Read Ngombale Mənjwo Jâŋ 6 Bible Online

Mənjwo Jâŋ 6 - Ngombale bible

Mənjwo Jâŋ 6

¹Mêi mwo lei, n nkə̂ ncí njwó Môu ndənzʉ ŋêʼ nduŋ-mbi yʉʼ lei ŋwâʼ lə̂ məlei ŋwâʼ mə̂ saambwô, n nzûʼ cǒ tâʼ lə̂ mə́nye mə̂ ləkwo lâghʼ cǒ nji ntə̌i, ə́ ndâʼ ngô: «Tô!» Nji zêi pyétə pə́ ghíʼ ləfaŋ lə̂.

²N nkə̂ mə́ nâŋtə naŋtə́, ə́ njwó fúfú lwô tə̂ʉ. Ŋuu yi a nyǎŋ ndəu wó ghwô tyêr, pə́ ŋə̂ nkaghʼə-ləfou lə́ zʉ́. A lə̂r ghíʼ tâʼ maʼ-nzʉ́, lə̂ ngwó nkə́ mâʼ ńzʉ́.

³Môu ndənzʉ ŋêʼ lei ŋwâʼ lə̂ yʉʼ mbâatə pwô, n nzûʼ mbâatə pwô lə̂ mə́nye mə̂ ləkwo lâʼ ngô: «Tô!»

⁴Cǒ lwô cʉ́ŋə yé ntó, ə́ mbǎŋ ghíʼ mǒghʼ; pə́ ŋə̂ mətəʉ mbó ŋuu yi a nyǎŋ ndəu wó, lə̂ ndághʼ ńgʉ̌ mbwórə mê ndəu ndesé, ńjí ńgó pye-mə́soŋ sápə məmbəʉ máp ńkwʉ́tə́. Pə́ ŋə̂ tə́koʼ nyǐ ntso lə́ zʉ́.

⁵Môu ndənzʉ ŋêʼ lei ŋwâʼ lə̂ yʉʼ mbâatə tárə́, n nzûʼ mə́nye mbâatə tárə́ lâʼ ngô: «Tô!» N nkə̂ mə́ nâŋtə naŋtə́, ə́ njwó shíshí lwo, ŋuu yi a nyǎŋ ndəu wó ghwô kíləu mbô zʉ́,

⁶n nzûʼ có zə̂u, ə́ pə̂ pə́ ghíʼ nji ŋuu, ə́ fú təcər pəmə́nye pə̂ ləkwo ə́ ndǎʼ ngô: «Pə́ laghʼ pêi faʼ tâʼ leʼé-lâʼ, ə́ nzə̂u tâʼ kíləu ngəsâŋ-ncʉ̂ŋ. Ə́ ndǎghʼ pêi faʼ tâʼ leʼé-lâʼ, ə́ nzə́u ngəsáŋ yi pə́ fûŋ ńgó ôrəjə lə̂, ə́ kíləu tárə́. Ə́ ngwǒ lə̂ məwə̂r gháp məluʼ, koo o côŋ-coŋə́.»

⁷Môu-ndənzʉ ŋêʼ lei ŋwâʼ lə̂ yʉʼ mbâatə ləkwo, n nzûʼ mbâatə ləkwo lə́ pəmə́nye pə̂ lâʼ ngô: «Tô!»

⁸N nkə̂ mə́ nâŋtə naŋtə́, ə́ njwô cǒ lwo, ə mbəʉ ye pə̂ ghíʼ ndî mǒghʼ. Ləjôghʼ ŋuu yi a nyǎŋ ndəu wó pə̂ ləwʉ̂. Pye pi gháp pə́ nzəm zʉ́ mə́ ŋə̂i pə̂ pəpfû-sê. Pə́ ghap ndesé yʉʼ ləkwo ə́ ŋə́ tâʼ ndyə́ghʼə́ lə́ páp, ə́ ŋə́ gháp mətəʉ lə̂ ndághʼ ntso gháp nji, ə́ nkʉʼʉ́ məghou mbə̂u lə̂ mbə̂u mbaa pəmə́nye pi péi gháʼate, ə́ njwítə́ pye pə́tsəm pi gháp cî lə́ wêi ndyə́ghʼə́.

⁹Môu ndənzʉ ŋêʼ lei ŋwâʼ lə̂ yʉʼ mbâatə tâa, n njwô pəmə́jʉ̂ŋtə pye pi pə́ lə jwítə́ gháp ńté no gháp lə zúʼ tsâr Sê, ə́ ŋə̌i ghíʼ ə́ pə́ ntúŋú ə́ mbou mə́ ndâʼ no yi gháp pə́ njî lə́ Yěso Kəlísto, nuŋtə cʉŋə yʉʼ yi pə́ nuŋu poʼ Sê wó.

¹⁰Ə́ mbə́ yʉʼ wó mə́ ndâʼ lə̂ təʉ ngô: «Nde, o pə́ tə́ lǒʼ, ə́ mbə́ ndʉŋ-ndʉŋ. O wo zʉ́ʼtə́ tə kə́u pə́ shʉ́ŋə́ poŋə́ tó záʼ kôr, ə́ pʉ̌ŋ mbəu lə̂ no yi pye-mə́soŋ ndəu ndesé lə jwítə́ wághʼ?»

¹¹Ə́ mə́ ndâʼ yə́rə́, pə́ ŋə̂ tâʼ təsə fúfú ndǐ lə́ wǒwó təcər páp, ə́ ndǎʼ lə́ páp ńgó gháp kə́ ncí nyéʼ shə̂ghʼ, ə́ nzʉ́ʼtə́ tə nkə́u mpfu yi pə́ wo myaghʼə́ ngaŋə-ku záp pi gháp pə pǎp lə faʼ tâʼ faʼ gháp pə pəfə̌r páp jwítə́ ghíʼ pə́ lə jwítə́ gháp záp lə́wó.

¹²N nkə̂ mə́ nâŋtə naŋtə́, ə́ njwó Môu ndənzʉ ŋêʼ lei-ŋwâʼ lə̂ yʉʼ mbâatə ntoghʼó, ndesé cʉʼʉ gháʼate, mə́nəu shərə shʉ́ŋ ghíʼ məlínaa lə̂. Mə́saŋ shə́rə mbâŋ ghíʼ məci lə̂.

¹³Pəcwôʼ-saŋ fú tʉ̌-lə́pû ncwə́rə ndəu ndesé ghíʼ fárə məntǎa-ntʉ́, ə́ mpfu yi fə̂m pə́ nděi.

¹⁴Ləfaŋ kâr mbəʉ ye ghíʼ ləpuʼú ŋwaʼa lə̂ ə́ mě. Məkôr mə́tsəm gháp pə məlâʼ mi nci lə zə́mə́ ńŋə́ soŋ me.

¹⁵Pəfou ndəu ndesé, pəsǎʼ lâʼ, pəfou pəlwóʼó-ntso, pəghaŋə-zə̂u, pəghaŋə mətəʉ, məpuʼ mbaa pəfou-ndʉʉ. Pye pə́tsəm nkhʉ̂ ńgwó ndwǒ cər mənguʼ-ləghǒ, mbaa ndəu məkôr məfaŋə pətə́koʼ məghǒ.

¹⁶Ə́ ncʉ́ʼ mə́ ndâʼ lə́ məkôr mbaa lə́ pətə́koʼ məghǒ ngô: «Pei kə́mə́ ńfár wághʼ, ə́ ndaghʼ ńkə́ʼtə́ ŋuu yi a nyǎŋ ndəu lwoŋ-lə́fou lə̂ njwó wághʼ, mbaa Môu ndənzʉ lə̂ ntághʼ ngwôʼ tû paghʼ.

¹⁷Paghʼ laʼ yə́rə́ ńté ńgó leʼé jwǐ yi gháp wo nyárə záŋə-lóŋ záp kuʼ mə́. Tə wǒ ŋuu wo lwǒghʼ?»