Read Ngombale Mənjwo Jâŋ 7 Bible Online

Mənjwo Jâŋ 7 - Ngombale bible

Mənjwo Jâŋ 7

¹Mêi mwo məno lei yə́rə́, n njwô pəcwôʼ Sê ləkwo tə̂ʉtə lə̂ məsaghʼə́ nzʉ̂ ləkwo, ə́ mə́ nkə̂ʼ pəkəfwor ləkwo pi ə́ pə́ ndəu ndesé ńgó koo cǒ tâʼ lə́ páp nkhʉ̂ ndəu ndesé, ə́ ndəu mə̂i-nci, mbaa lə̂ mətʉ̌.

²M mbôu njwó cǒ cwôʼ Sê kwâr sʉ̂ sǎʼ-nəu, ə́ ngwǒ zə̂u yi Sê yi a pə̌ ntəʉ laghʼ ńcôghʼ ləiʼi lə́ pye pé. Wêi cwôʼ Sê pə̂ ndâʼ no lə̂ təʉ lə́ pəcwôʼ Sê ləkwo pi Sê lə ŋə́ gháp mətəʉ lə̂ ndághʼ ńcǒŋ ndəu ndesé gháp pə mə̂i-nci ngô:

³«Pei zʉ́ʼtə́ paghʼ tsə̌mbi ncóghʼ mələiʼi məzə̌i pəghaŋə-faʼ Sê zághʼə, pei poŋə́ cǒŋ ndesé gháp mə̂i-nci mbaa mətʉ̌.»

⁴M mbôu nzúʼ ndwuŋ pye pi pə́ cóghʼ mələiʼi məzə̌i páp, gháp pə̂ pye tóusʉ nkʉ lə̂ ntsap ləkwo lə̂ mə̂m kwo (144.000) ə́ fú lə̂ məcʉŋə-ndə̂ Ísə́lahêl mə́tsəm.

⁵Ə́ laghʼ ḿbə̂ pye tóusʉ ntsap pwô lə̂ ləghə̂m (12.000) lə̂ cʉŋə-ndə̂ Yúda pi pə́ wo cóghʼ ləiʼi məzə̌i páp; ə́ mbə́ pye tóusʉ ntsap pwô lə̂ ləghə̂m (12.000) lə́ cʉŋə-ndə̂ Rwíbêŋ; ə́ mbə́ pye tóusʉ ntsap pwô lə̂ ləghə̂m (12.000) lə̂ cʉŋə-ndə̂ Ngâdə;

⁶ə́ mbə́ pye tóusʉ ntsap pwô lə̂ ləghə̂m (12.000) lə̂ cʉŋə-ndə̂ Azêh; ə́ mbə́ pye tóusʉ ntsap pwô lə̂ ləghə̂m (12.000) lə̂ cʉŋə-ndə̂ Neftalî; ə́ mbə́ pye tóusʉ ntsap pwô lə̂ ləghə̂m (12.000) lə̂ cʉŋə-ndə̂ Manasê;

⁷ə́ mbə́ pye tóusʉ ntsap pwô lə̂ ləghə̂m (12.000) lə̂ cʉŋə-ndə̂ Simeyôŋ; ə́ mbə́ pye tóusʉ ntsap pwô lə̂ ləghə̂m (12.000) lə̂ cʉŋə-ndə̂ Levî; ə́ mbə́ pye tóusʉ ntsap pwô lə̂ ləghə̂m (12.000) lə̂ cʉŋə-ndə̂ Isakâa;

⁸ə́ mbə́ pye tóusʉ ntsap pwô lə̂ ləghə̂m (12.000) lə̂ cʉŋə-ndə̂ Zabulôŋ; ə́ mbə́ pye tóusʉ ntsap pwô lə̂ ləghə̂m (12.000) lə̂ cʉŋə-ndə̂ Yosêp; ə́ mbə́ pye tóusʉ ntsap pwô lə̂ ləghə̂m (12.000) lə̂ cʉŋə-ndə̂ Benjamêŋ.

⁹Zêi no lei, n nkə̂ mə́ nâŋ naŋə́, ə́ njwó tâʼ tə́koʼ nou lâʼ tə̂ʉ, ə́ nzáa tə mbə́ tə kwǎʼ njí ndwuŋ. Ə́ mbə́ pi gháp kwatə́ lə̂ məngoŋ mə́tsəm, lə̂ məcʉŋə-ndə̂ mə́tsəm, lə̂ məlâʼ, pətsár mətsâr mbə̂u lə̂ mbə̂u; gháp tə̂ʉ mbi lwoŋ-lə́fou mbaa mbi Môu ndənzʉ, ə́ máʼ pəfúfú məndǐ, ə́ ngwǒ məzâŋ lətwǒ mbô páp.

¹⁰Ə́ mə́ ndâʼ lə̂ təʉ ngô: «Sê zaghʼə nyǎŋ lə̂ lwoŋ-lə́fou, ləcwôr pôu fû mbó páp Môu ndənzʉ!»

¹¹Pəcwôʼ Sê pə́tsəm pi gháp lə tə́ʉ ńzə́mə́ lwoŋ-lə́fou, ə́ ŋə́ soŋ, ə́ nzə́mə́ pəkə̌m, ə́ nzə́mə́ pəmə́nye pə̂ ləkwo, shîʼ ńkʉ́ʼtə́ sê, ə́ sǎp sʉ̂ gháp sê, ə́ ngúʼtə́ Sê,

¹²ə́ mə́ ndâʼ ngô: «Ə̂ pə́ yə́rə́! Sê zaghʼə kuʼ ŋuu yi mboʼ pə́ zap ləjôghʼ yé, ə́ mbou ngúʼtə́ yé, ə́ mbə́ ngaŋə-jîno, ə́ mbə́ ŋuu yi mboʼ pə́ ŋə̂ nkhwo lə́ zʉ́, ə́ mbə́ yi mboʼ pə́ ŋə̂ məkuʼ mé; ə́ njí ńgó â ngaŋə mətəʉ, ə́ mbou tə̂i gháʼate. Ə́ mə́ ngʉ̂ yə́rə́ lə̂ mənguʼ mənguʼ. Ə̂ pə́ yə́rə́!»

¹³Cǒ tâʼ lə́ pəkə̌m pə̂ ntsap ləkwo lə̂ mə̂m mbwô pfû tsâr, ə́ ntúŋú ghâa ngô: «Pye pwo pi gháp mǎʼ pəfúfú məndǐ lo ə̂ pə wǒ? Ə́ fû ghó?»

¹⁴M mbwôr ngô: «Nde ghâa gho lə̂ pə̌ njí.» A kə̂ ncí ndâʼ lə́ məŋ ngô: «Ə̂ pye pi gháp kwar cər ngwôʼ yi njwǐ. Gháp lə soghʼ məndǐ máp, ə́ ntsə̌p cər məci Môu ndənzʉ, ə́ ndaghʼ ńsôghʼ pəi yi ə́ lə pə́ mə́u, ńjí ńgó měi fôghʼ.

¹⁵Ə̂ zə̂u yi ə́ ghʉ̌, gháp tə̂ʉ ndə̂ Sê, ə́ mbi lwoŋ-lə́fou yé, ə́ mə́ ngûʼtə yé ntə̌ʉ-nəu gháp lətwûʼ. Ŋuu yi a nyǎŋ lə̂ lwoŋ-lə́fou ghʉ̌ lǎghʼ jûŋ yé kə́ptə́ gháp.

¹⁶Ə nji láʼ nkə́ nzáŋə yé gháp po, lə́u ndě-nci láʼ nkə́ nzə̂u yé gháp po. Mə́nəu kə́ ntôu yé gháp po, lə́u có zə̂u pôu nkə́ ndəu yé tə mbə́ yi mboʼ ə́ tou gháp po.

¹⁷Ńté no Môu ndənzʉ tə̌ʉ mbəʉ lwoŋ-lə́fou, ə́ mbə́ ŋuu yi a ghʉ̌ pə́ pápə gháp. Ə́ wǒ caghʼə́ gháp lə̂ məyʉʼ məsâʼ-nci mi ə́ ghʉ pə́ pə̂ wó. Ə Sê ghʉ́ mbou nzâghʼ nci nyôghʼ gháp.»