Read Ngombale Mənjwo Jâŋ 8 Bible Online

Mənjwo Jâŋ 8 - Ngombale bible

Mənjwo Jâŋ 8

¹Môu ndənzʉ lêi tə ŋéʼ lei ŋwâʼ lə̂ yʉʼ mbâatə saambwô, yʉʼ nâʼ tʉ̌-lə́pû ńgó ntə́uʼ, təcər mənzaʼ no mə̂m-tárə́.

²Məŋ mbôu njwó pəcwôʼ Sê saambwô pi ə́ tə̂ʉ mbi Sê; pə́ ŋə̂ məntaŋ saambwô lə́ páp.

³Cǒ tâʼ cwôʼ Sê tô ntə́ʉ mbəʉ lənuŋú poʼ Sê, ə́ ngwǒ tôʼ yi pə́ laghʼ ńtôu cǒ mbə̂u lei yi pə́ fûŋ ńgó aŋsáŋsʉ, ə́ pə̂ yi pə́ lǎghʼ tə̌ʉ-gôl ńtsúŋú. Pə́ ŋə̂ aŋsáŋsʉ wêi lə́ zʉ́ tə a zâa zǎa ghíʼ a wo təmtə́ məsʉ̂ʉtə pye Sê pə́tsəm mə́u, ə́ tǒu ndəu lənuŋú poʼ Sê, lənuŋú poʼ zêi pə̂ yi pə́ lə lǎghʼ tə̌ʉ-gôl ńtsúŋú. Ə́ tǒu yə́rə́ mbi lwoŋ-lə́fou lə̂ ndághʼ ńgúʼtə́ Sê.

⁴Ə ndî aŋsáŋsʉ wêi gháp pə məsʉ̂ʉtə pye Sê cʉ̂ʼ mə́ fû pô cwôʼ Sê ə́ nkôʼ mbi Sê.

⁵cwôʼ Sê khwôr tôʼ yi pə́ tou aŋsáŋsʉ cər wó, ə́ mbyé mǒghʼ ndəu lənuŋú poʼ, ə́ ncóghʼ cər wó tə ə́ loghʼó, a mâʼ ndəu ndesé, ləfaŋ pyêtə gháʼate, pə́ zûʼ mənji, ə́ njwó mənyǐ mbʉŋ ŋwaŋtə, ndesé cʉʼʉ gháʼate.

⁶Pəcwôʼ Sê saambwô pi gháp lə ghwǒ məntaŋ saambwô ntsuŋtə mbəʉ záp lə̂ ntóŋ.

⁷Nduŋ-mbi cwôʼ Sê tôŋ ye ntaŋ. Məghʉʉ gháp pə mǒghʼ ghi pə́ cwərə ndəu ndesé, məci wátə mə́u. Ndəu ndesé ghaptə puʼ tárə́, tâʼ yʉʼ sʉ̂. Pə́ ghaptə mətʉ̌ yʉʼ tárə́, tâʼ yʉʼ sʉ̂. Ləghěi tsəm kə̂ sʉ̂ yé lə́wó.

⁸Cwôʼ Sê mbâatə pwô tôŋ ye ntaŋ. Pə́ maʼ cǒ tə́koʼ zə̂u cər mə̂i-nci, ə́ pə̂ ghíʼ tə́koʼ ləkôr yi ə́ pə́ sʉ́. Mə̂i-nci ghaptə puʼ tárə́, tâʼ yʉʼ shə́rə ncʉ́ʼ məci.

⁹Məzə̂u mə́tsəm mi cî cər nci ghaptə yʉʼ tárə́, tâʼ yʉʼ kwʉ̂. Pəláanji pi ə́ pə́ nci ghaptə yʉʼ tárə́, tâʼ yʉʼ mê.

¹⁰Cwôʼ Sê mbâatə tárə́ pôu ntóŋ ye ntaŋ. Cǒ tə́koʼ cwôʼ-saŋ fû tʉ̌-lə́pû ə́ mə́ nkʉ̂ ghíʼ lə̂ʉ mǒghʼ, ə́ mpfúŋ lə́ tâʼ yʉʼ lə̂ mənci mi pə́ ghâptə́ yʉʼ tárə́, mbaa lə̂ məsâʼ-nci.

¹¹Ləjôghʼ cwôʼ-saŋ wêi pə̂ (Absêŋtə, ə́ ndaghʼ ndâʼ ńgó məcap mi ə́ pə́ ndǐ.) Tâʼ yʉʼ lə̂ mənci mêi shə́rə ncʉ́ʼ ndî lǐ. Pye tə nzáa pi gháp lə nó nci wêi kwʉ̂tə ńté ńgó məcap lə pə́ mə́u.

¹²Cwôʼ Sê mbâatə ləkwo pôu ntóŋ ye ntaŋ, ləjôghʼ mə́nəu ghaptə yʉʼ tárə́, tâʼ yʉʼ shə́rə shʉ́ŋ, mə́saŋ ghaptə yʉʼ tárə́, tâʼ yʉʼ shə́rə shʉ́ŋ, pəcwôʼ-saŋ ghaptə yʉʼ tárə́, tâʼ yʉʼ shə́rə shʉ́ŋ. Ghíʼ tâʼ tâʼ yʉʼ lə̂ mənkeʼ mêi shə́rə́ shʉ́ŋ lêi, ntə̌ʉ-nəu ghâptə́ yʉʼ tárə́, tâʼ yʉʼ shə́rə shʉ́ŋ; ə́ kə̂ mbə́ pə́ yə́rə́ lə̂ lətwûʼ.

¹³N nkə̂ mə́ nâŋ naŋə́, ə́ njwó cǒ mbə̂u mə́ghə́u yi pə́ fûŋ ńgó koʼ pə̂ ndə̂m tətə tʉ̌, n nzúʼ a pə̂ ndâʼ lə̂ təʉ ngô: «Pəcwôʼ Sê pə́tárə́ wo kə́ cí tôŋ máp məntaŋ. Pəndʉʉ tə́poŋ pye pi gháp pə́ cî ndəu ndesé. Ghâp pəndʉʉ tə́poŋ! Ghâp kwaʼ pəndʉʉ tə́poŋ!»