Read Ngombale Mənjwo Jâŋ 9 Bible Online

Mənjwo Jâŋ 9 - Ngombale bible

Mənjwo Jâŋ 9

¹Cwôʼ Sê mbâatə tâa tôŋ ye ntaŋ, n njwô tâʼ cwôʼ-saŋ fû tʉ̌-lə́pû mpfúŋ ndəu ndesé, pə́ ŋə̂ kísʉ laghʼ ńtsóʼ ntsʉ tâa tə́ ləlyəghʼtə́ lə́ zʉ́.

²cwôʼ Sê tsôʼ ntsʉ tâa tə́ ləlyəghʼtə́ zêi, ə ndî fû cər wó nkwár ghíʼ yi kwar yʉʼ yi pə́ tou məkhʉŋ-tsaʼá wó, ə́ fú nkóʼ, ə́ nâa yʉʼ tə káa ŋuu pyér njwô yé ləjôghʼ mə́nəu.

³Pəkə́zaʼ kwatə cər ndî wêi, ə́ nǎa sâr yʉʼ tsəm ndəu ndesé; pə́ ŋə̂ gháp mətəʉ lə̂ ndághʼ ńtsóghʼtə́ pye ghíʼ pəmə́ngáa-tə́fuʼ tsôghʼtə pye ndəu ndesé lə̂.

⁴Pə́ laʼ lə́ páp ńgó koo gháp pfâr ləghěi, ńgó koo gháp pfâr mətʉ̌ tə mbaa zə̂u tsəm yi ə́ pə́ shwítə́, ńgó gháp tsóghʼtə́ pə́ pye pi ləiʼi Sê kâa pə́ yé məzə̌i páp.

⁵Káa pə́ lə pə̂i yé ńgó gháp jwítə́ pye pêi, ə́ mbə́i pə́ ńgó gháp ŋə́ gháp ngwôʼ təcər saŋ tâa. Ə ngwôʼ zêi pə́ ghíʼ yi ŋuu jwô, ə́ mpfu yi mə́ngáa-tə́fuʼ ntsóghʼ yé lə̂.

⁶Ə́ wo pə́ təcər saŋ zêi tâa, pye-mə́soŋ lôu ləwʉ̂, lə́ njwô gháp po, ə́ tsáa lə̂ nkwʉ́ lə́ ləwʉ̂ nkhʉ̂ gháp.

⁷Pəkə́zaʼ pêi lə pə́ ghíʼ pəlwô pi pə́ tsuŋtə́ mə́ gháp tə gháp pəu lə̂ ndághʼ ńdwóʼó ntso. Ə có zə̂u pə̂ tû páp pə́ ghíʼ mənkaghʼə-lə́fou mi pə́ lǎghʼ tə̌ʉ-gôl ńtsúŋú lə̂, məsʉ̂ máp pə̂ ghíʼ məsʉ̂ pye-mə́soŋ.

⁸Mənyuŋu tû máp pə̂ ndʉŋ-ndʉŋ ghíʼ mənyuŋu tû pəngyě, məsoŋ máp pə̂ ghíʼ mi pəsáa-mbaŋə.

⁹Mənzoʼ máp pə̂ ghíʼ məndǐ ntso mi pə́ lǎghʼ tə̌ʉ ńtsúŋú. Gháp pə̂ ndə́m məmbap máp zor ghíʼ pəkə́lə́ghʼə pi nou pəlwô pə́ shǔŋ ndaghʼ ńgwô ńdwóʼo ntso.

¹⁰Mənkəu máp ghwo məfei ghíʼ mi pə́ mə́ngáa-tə́fuʼ. Mənkəu máp mêi lə ghwo mətəʉ lə̂ ndághʼ ńgághʼə́ pye təcər saŋ tâa.

¹¹Gháp lə ghwo tâʼ fou yi a cághʼə gháp, a pə̂ Sə́tə yi a ghwǒ no lə̂ tâa tə́ ləlyəghʼtə́. Pə́ fûŋ yé lə̂ tsâr Hebələ̂ ngô: «Abadôŋ» ə́ fûŋ yé lə̂ tsâr Ngərêghʼ ngô: «Apolyôŋ.» Ləjôghʼ zei laghʼ ńdâʼ ngô: «Mbə́ghʼə.»

¹²Nduŋ-mbi ngwôʼ lêi, lə́ məcó mə́mbwô pə̂ nzəm mə́ ntó.

¹³Cwôʼ Sê mbâatə ntoghʼó tôŋ ye ntaŋ. N nzûʼ cǒ nji kwâr lə̂ məlî lənuŋú poʼ ləkwo, yi ə́ tə́ʉ mbi Sê, ə́ mbə́ yi pə́ lə lǎghʼ tə̌ʉ-gôl ńtsúŋú.

¹⁴Nji zêi lâʼ lə́ cwôʼ Sê mbâatə ntoghʼó yi a ghwǒ ntaŋ mbô zʉ́ lêi ngô: «Kéʼtə́ pəcwôʼ Sə́tə ləkwo pi pə́ lə lǎghʼ pəcêŋ ńkâptə́ gháp, ə́ nkaŋ tə́koʼ nci yi pə́ fûŋ ńgó Efərâtə.»

¹⁵Pə́ kêʼtə pəcwôʼ Sə́tə pei ləkwo. Sê lə tsuŋtə gháp ghíʼ ə́ ghʉ̌ pə́ lə́ mə́nəu wêi, lə́ leʼé-mbî zei, lə́ saŋ wêi, lə́ nguʼ zêi, gháp wó lə́ pye-mə́soŋ ndəu ndesé pi pə́ ghâptə́ yʉʼ tárə́, ə́ njwí tâʼ yʉʼ.

¹⁶Pə́ laʼ ndwuŋ pəsóghəi páp pi gháp laghʼ pəlwô ńdwóʼo ntso. Gháp pə̂ milyôŋ nkʉ pwô.

¹⁷N ndə kə mbyér pə́ cər njwo, n njwó pəlwô, ə pə pye pi gháp nyáŋtə́ ndəu wó maʼ məndǐ ntso, ə́ paŋ ghíʼ mǒghʼ, ə́ shʉ́ŋ ghíʼ có ləghǒ lətəi-ndwuŋ yi pə́ fûŋ ńgó yasêŋtə, ə́ shʉ́ŋ ghíʼ məkaa. Mətû pəlwô páp pə̂ ghíʼ mətû pəsáa-mbaŋə. Ə mǒghʼ gháp ndî, lə̂ məkaa pə̂ nkwátə ntsʉ páp.

¹⁸Ə mǒghʼ, ə́ ngʉ̌ ndî, ə́ nkʉʼʉ́ məkaa mi ə́ lə kwatə ntsʉ pəlwô pêi, ə̂ məzə̂u tə́poŋ mə́ntárə́ mi ə́ lə jwítə́ tâʼ yʉʼ lə́ pye-mə́soŋ ndəu ndesé pi pə́ ghâptə́ gháp yʉʼ tárə́.

¹⁹Ńté no mətəʉ pəlwô pêi lə pə́ ntsʉ páp mbaa lə̂ mənkəu máp. Ə́ yaa ngí pə́, mənkəu máp pə̂ pə́ ghíʼ mənô, mətû máp pə̂ mi gháp laghʼ ńgʉ̂ məno tə́poŋ lə́ pye.

²⁰Ə́ ngwǒ lə́ pfuʼ pye-mə́soŋ cər nzʉ̂ pi káa məngwôʼ mêi mə́ntárə́ lə jwítə́ yé gháp, gháp ləʼ gháp lə̂ méʼ məzə̂u mi gháp ghûʼtə, ə́ fûŋ ńgó məsê, lə́ ə́ pə̂ mi gháp tsuŋú pə́ páp lə̂ mbô máp. Ə́ nkə́ mə́ ngûʼtə pə́ məzəghʼə tə́poŋ gháp pə pətə́tó pi pə́ lǎghʼ tə̌ʉ-gôl, kəʉ tə̌ʉ-nkâp, kəʉ tə̌ʉ mbərôŋzə, kəʉ məghǒ, kəʉ kwə̂i ńtsúŋú, məzə̂u mei kâa pə́ njwô yé yʉʼ, káa pə́ zûʼ yé yʉʼ, káa kə́ pə́ ŋəi yé.

²¹Káa nyêr gháp lə̂ jwítə́ pye, lə̂ ngʉ́ məkaŋ, káa kə́ nyêr gháp lə̂ mbə̂u nzóʼ, káa kə́ nyêr gháp tsǒŋ.