Read Nguna Togoa Etafe North JENESIS 11 Bible Online

JENESIS 11 - Nguna Togoa Etafe North bible

JENESIS 11

¹Go maramana mamau e pei nagole sikai maau go navasaana sikai maau.

²Go e pakilina, ragi waina eu do surata paki taleva ni elo sake, naga eu pap̃ai malo matemate sikai navanua ni Shinar; go eu doko tokora wanogoe doko.

³Go eu dum̃ada noa ki da, eu naga, Ita, tuga mari brik maga, go tuga tao ni m̃ata ki nia. Go eu peani brik e pei vatu adeada, go eu peani bitumen e pei laime adeada.

⁴Go eu naga, Ita, tuga tum̃agida davagi natokoana sikai, go nasum̃a varau pakilagi sikai, go nap̃auna ega toko nakoroatelagi, go tuga tum̃agida manigida mari nagisa sikai; naga tuga ta pei tea taperaverakiana paki narae ni maramana mamau mau.

⁵Go Yehovah e siwo umai naga ega vunusi natokoana go nasum̃a varau pakilagi, waina naatam̃oli natuda maga eu davagi a.

⁶Go Yehovah e noa, P̃a leo, eu pei narei sikai maau, go eu mamau puti peani nagole sikai maau; go tea waia e pei tea waina eu atulake asa naga euga mari a: go ragi waia te navatuna sikai waina eu midoa ki nia naga euga mari a, ega wo da pei tea taeluaana ki ara mau.

⁷Ita, tuga siwo pano, po mari nagoleda ega vinovinoi tokora wanana, naga euga ta dum̃ada dogoatae nagoleda mau.

⁸Go Yehovah e daperavera ki da m̃elu dua ki tokora wanogoe paki narae ni maramana mamau: go eu makoto ki natavagiana ni natokoana.

⁹Nalakena tea wanogoe nagisana e pei tea sosoana ki Babel; nalakena Yehovah e mari nagole ni maramana mamau e pinovinoi tokora wanogoe: go Yehovah e daperavera ki da m̃elu dua ki tokora wanogoe paki narae ni maramana mamau.

¹⁰Tea maga waia eu pei navakilinaana maga ni Shem. Shem e pei tea ni natau p̃onotia sikai, po pesi Arpakshad edaku ki natave natau dua:

¹¹Go Shem e mauri edaku ki e pesi Arpakshad natau p̃onotia lima, po pesi natuna naanoai maga, go natuna nagoroi maga.

¹²Go Arpakshad e mauri natau rualima dolu tamate lima, po pesi Shelah:

¹³Go Arpakshad e mauri edaku ki e pesi Shelah natau p̃onotia pati tamate dolu, po pesi natuna naanoai maga, go natuna nagoroi maga.

¹⁴Go Shelah e mauri natau rualima dolu, po pesi Eber:

¹⁵Go Shelah e mauri edaku ki e pesi Eber natau p̃onotia pati tamate dolu, po pesi natuna naanoai maga go natuna nagoroi maga.

¹⁶Go Eber e mauri natau rualima dolu tamate pati, po pesi Pelek:

¹⁷Go Eber e mauri edaku ki e pesi Pelek natau p̃onotia pati rualima takuna dolu, po pesi natuna naanoai maga go natuna nagoroi maga.

¹⁸Go Pelek e mauri natau rualima dolu, po pesi Reu:

¹⁹Go Pelek e mauri edaku ki e pesi Reu natau p̃onotia dua tamate loveti, po pesi natuna naanoai maga go natuna nagoroi maga.

²⁰Go Reu e mauri natau rualima dolu tamate dua, po pesi Seruk:

²¹Go Reu e mauri edaku ki e pesi Seruk natau p̃onotia dua tamate larua, po pesi natuna naanoai maga go natuna nagoroi maga.

²²Go Seruk e mauri natau rualima dolu, po pesi Nahor:

²³Go Seruk e mauri edaku ki e pesi Nahor natau p̃onotia dua, po pesi natuna naanoai maga go natuna nagoroi maga.

²⁴Go Nahor e mauri natau rualima dua tamate loveti, po pesi Terah:

²⁵Go Nahor e mauri edaku ki e pesi Terah natau p̃onotia sikai rualima takuna sikai tamate loveti, po pesi natuna naanoai maga go natuna nagoroi maga.

²⁶Go Terah e mauri natau rualima larua, po pesi Abram, Nahor, go Haran.

²⁷Go tea maga waia eu pei navakilinaana maga ni Terah. Terah e pesi Abram, Nahor, go Haran; go Haran e pesi Lot.

²⁸Go Haran e mate narae ni tamana Terah navanua waina e pakilina asa, Ur ki tea ni Kaldea maga.

²⁹Go Abram go Nahor ero piragi nagoroi: nagisa ni nagoroi ki Abram e pei Sarai; go nagisa ni nagoroi ki Nahor, Milkah, natu ni Haran, tama ni Milkah, go tama ni Iskah.

³⁰Go Sarai e dim̃o; e dika natuna.

³¹Go Terah e piragi lua natuna Abram, go Lot natu ni Haran, natu ni natuna, go sulina Sarai, nagoroi ki natuna Abram; go ero sikoti ra pano m̃elu dua ki Ur ki tea ni Kaldea maga, naga euga vaki navanua ki Kanaan; go eu rumai paki Haran, po doko tokora wanogoe.

³²Go naaleatia maga ki Terah eu pei natau p̃onotia dua tamate lima: go Terah e mate Haran.