Read Nguna Togoa Etafe North JENESIS 12 Bible Online

JENESIS 12 - Nguna Togoa Etafe North bible

JENESIS 12

¹Go Yehovah e noa ki Abram, e naga, P̃a m̃elu dua ki navanua anigo, go ki namatarau anigo, go ki nasum̃a ki tamam̃a, po paki navanua waina aga wo pisei ki‐go asa:

²Go aga wo mari ko p̃a wo pei nalauna warua, go aga wo pasa m̃ata ki‐go, po mari nagisam̃a ega wo p̃arua; go p̃a vei nalakena ni navasam̃atakiana:

³Go aga wo pasa m̃ata ki tea maga waina eu pasa m̃ata ki‐go, go naata waina e pasasa ki‐go aga wo pasasa ki nia: go naworawora mamau puti ni maramana euga wo pei tea vasam̃atakiana ako.

⁴Go Abram e pano, dapala waina Yehovah e pasa ki nia asa; go Lot e sikoti a pano; go Abram e pei tea ni natau rualima larua tamate lima ragi waina e m̃elu dua ki Haran pano.

⁵Go Abram e piragi lua anagoroi Sarai, go Lot natu ni taina, go naloriki adeada mamau puti waina eu dalua e, go naatam̃oli maga waina eu piragi soki ra Haran: go eu m̃elu pano naga euga vaki navanua ni Kanaan; go eu rumai paki navanua ni Kanaan.

⁶Go Abram e surata duaduru navanua pa pa paki tokora ki Shekem, pa pa paki oak ki Moreh. Go ragi wanogoe naworawora ni Kanaan eu doko navanua.

⁷Go Yehovah e pakilina ki Abram, po noa, Aga wo dua naworaworam̃a navanua waia: go e magi Yehovah waina e pakilina ki nia, e maneana davagi wede ni naviriana sikai tokora wanogoe.

⁸Go e m̃elu dua ki tokora wanogoe po paki tava ni taleva ni elo sake ni Beth‐el, po sike tap̃aup̃au aneana asa, Beth‐el e doko taleva ni elo musu, go Ai e doko taleva ni elo sake: go e magi Yehovah davagi wede ni naviriana sikai tokora wanogoe, po soso nagisa ni Yehovah.

⁹Go Abram e dakai po surata, e do disurisu paki Sauth.

¹⁰Go navitoloana sikai e doko navanua: go Abram e siwo paki Ityipt pano naga ega m̃enaki asa; nalakena navitoloana e p̃arua navanua.

¹¹Go e pakilina ragi waina e po umai paki m̃aladigi naga ega sili Ityipt, naga e noa ki anagoroi Sarai, e naga, P̃a leo, a pavara ni ko, a atae naga nigo ku pei nagoroi raewia ni navunusiana:

¹²Go ega wo pakilina, ragi waina naka ni Ityipt euga wo punusi ko, naga euga wo noa, Tea waia e pei anagoroi: go euga wo maripunue au, ma euga wo mauti ko p̃a wo mauri.

¹³P̃a noa naga ku pei goregu, a pavara ni ko asa: naga ega wia ki nau nalakena nigo, go naga naatagu ega mauri nalakena nigo.

¹⁴Go e pakilina, ragi waina Abram e umai paki Ityipt, naga naka ni Ityipt eu punusi nagoroi wanogoe naga nae e pei raewia liu.

¹⁵Go tea maraki maga ki Faraoh eu punusi a, po pasa samasamani a paki Faraoh: go nagoroi wanogoe e pei tea viragiluaana paki ekopu ni nasum̃a ki Faraoh.

¹⁶Go e mari m̃ata ki Abram nalakena nae: go e peani shiip maga, go kau maga, go ass anoai maga, go tea suasua naanoai maga, go tea suasua nagoroi maga, go ass goroi maga, go kamel maga.

¹⁷Go Yehovah e atugi Faraoh go nasum̃a aneana ki naatugiana warua maga nalakena Sarai Abram anagoroi.

¹⁸Go Faraoh e soso Abram, po noa, Nasava waia ku po mari a paki nau? Ekasana ku da noa ki nau naga e pei am̃agoroi?

¹⁹Ekasana ku noa, Nae e pei goregu? E pei nalakena a piragi lua e naga ega vei agugoroi: go ragi waia p̃a leo am̃agoroi, p̃a viragi lua e, go p̃a vano.

²⁰Go Faraoh e dip̃aki naatam̃oli seara asa: go eu pitana ki nia pano, go anagoroi, go tea mamau puti waina e peani ra.