Read Nguna Togoa Etafe North JENESIS 13 Bible Online

JENESIS 13 - Nguna Togoa Etafe North bible

JENESIS 13

¹Go Abram e sake m̃elu dua ki Ityipt pano, nae, go anagoroi, go tea mamau puti waina e peani ra, go Lot e sikoti a, eu mamau paki Sauth pano.

²Go Abram e pei sogolapa warua ni katel maga, go ni silver, go ni kold.

³Go e pano, pae nasurataana aneana maga, pae Sauth pa pa pa po paki Beth‐el, paki tokora waina tap̃aup̃au aneana e doko asa sala vea, namawota ni Beth‐el go ni Ai;

⁴Paki tokora ni wede ni naviriana, waina e mari a tokora wanogoe sala vea: go Abram e soso nagisa ni Yehovah tokora wanogoe.

⁵Go Lot, waina e sikoti Abram pano, nae ma e peani navata maga ni shiip go ni naninani, go navata maga ni kau, go tap̃aup̃au maga.

⁶Go navanua e mari sa ova ra, naga eroga dum̃ada sikoti ra doko: nalakena naloriki adeada e p̃arua, dapala ero mari sa dum̃ada sikoti ra doko.

⁷Go navululuana sikai e doko namawota ni tea leoparatiki maga ni katel ki Abram, go ni tea leoparatiki maga ni katel ki Lot. Go naworawora ni Kanaan go naworawora ni Peris eu doko navanua ragi wanogoe.

⁸Go Abram e noa ki Lot, e naga, Navululuana seara, a pavara ni ko asa ega ta doko namawota kakagida go namawota ni tea leoparatiki aginau maga go tea leoparatiki anigo maga mau, nalakena toro pei tamataida.

⁹Navanua mamau e da doko naraem̃a kite? P̃a va dua ki nau pano, a pavara ni ko asa: ku pe vaki taleva ni mawiri, a pe wo paki taleva ni matua; kite ku pe vaki taleva ni matua, a pe wo paki taleva ni mawiri.

¹⁰Go Lot e sike namatana po punusi Malo Matemate mamau ni Yordan, naga e pei noai sara mau, e pea ki Yehovah e mari sa ki Sodom go Comorrah, e dakiusi roara ki Yehovah, e dakiusi navanua ni Ityipt, waina ku paki Soar.

¹¹Go Lot e matadoa Malo Matemate mamau ni Yordan; go Lot e surata paki ist pano: go ero dum̃ada padua ki da pano.

¹²Abram e doko navanua ni Kanaan, go Lot e doko natokoana maga ni Malo Matemate, po disurisugi tap̃aup̃au aneana pa pa paki Sodom.

¹³Go naatam̃oli maga ni Sodom eu sigisigileo po pei tea marinaleosa warua liu paki Yehovah.

¹⁴Go Yehovah e noa ki Abram, edaku ki Lot e padua ki nia pano, e naga, P̃a sike namatam̃a, po leo pae tokora waina ku du asa, po leo paki north, go paki sauth go paki ist go paki west:

¹⁵Nalakena navanua mamau waina ku punusi a, aga wo dua mu ma naworaworam̃a asa, pa pa ega tu du po du mau du.

¹⁶Go aga wo mari naworaworam̃a euga wo dakiusi nam̃otam̃ota ni navanua: waina te naata e pe veve atae nam̃otam̃ota ni navanua, naworaworam̃a ma eu pe wo pei tea veveana.

¹⁷P̃a tuleana, p̃a surata duaduru navarauana kakana go naweleweleana kakana; nalakena aga wo dua ko asa.

¹⁸Go Abram e disugi tap̃aup̃au aneana, po umai doko nalake ni oak maga ni Mamre, waina eu doko Hebron, go e magi Yehovah davagi wede ni naviriana sikai tokora wanogoe.