Read Nguna Togoa Etafe North JENESIS 14 Bible Online

JENESIS 14 - Nguna Togoa Etafe North bible

JENESIS 14

¹Go e pakilina naaleatia maga ki Amrafel nawota ni Shinar, Ariok nawota ni Ellasar, Kedorlaomer nawota ni Elam, go Tidal nawota ni Koim,

²Naga eu mari navakalo paki Bera nawota ni Sodom, go paki Birsha nawota ni Comorrah, Shinab nawota ni Admah, go Shemeber nawota ni Seboim, go nawota ni (Bela waina e pei Soar.)

³Tea mamau puti wanogoe eu saisai dum̃ada p̃alugoro ra nap̃aloa ni Siddim (waina e pei Natasi ni Natasimena).

⁴Natau rualima sikai tamate dua eu magi Kedorlaomer suasua, go natau tamate ketolu eu dip̃aki lua e asa.

⁵Go natau tamate kevati Kedorlaomer, go nawota maga waina eu sikoti a doko eu rumai, po atugi naworawora ni Refaim waina eu doko Ashteroth‐karnaim, go naworawora ni Susim waina eu doko Ham, go naworawora ni Emim waina eu doko Shaveh‐kiriathaim,

⁶Go naworawora ni Hor waina eu doko tava adeada Seir, pa pa paki El‐paran, waina e doko pisari masop̃alo.

⁷Go eu liliu, po umai paki En‐mishpat (waina e pei Kadesh), po atugi navanua mamau ki naworawora ni Amalek, go eu moro atugi naworawora ni Amor, waina eu doko Hasason‐tamar.

⁸Go nawota ni Sodom e pano, nara ma nawota ni Comorrah, go nawota ni Admah, go nawota ni Seboim, go nawota ni Bela (waina e pei Soar) eu mamau; go eu mari ovara ni navakalo dip̃a ra nap̃aloa ni Siddim;

⁹Dip̃a Kedorlaomer nawota ni Elam, go Tidal nawota ni Koim, go Amrafel nawota ni Shinar, go Ariok nawota ni Ellasar; nawota pati eu dip̃a elima.

¹⁰Go nap̃aloa ni Siddim e pei m̃oru ni bitumen; go nawota ni Sodom go ni Comorrah ero sava pano, go ero dowo tokora wanogoe, go tea maga waina eu mauri doko eu sava paki tava pano.

¹¹Go eu dape puti naloriki ni Sodom go ni Comorrah, go navinaga mamau puti adeada, po pano.

¹²Go eu puati Lot, natu ni tai ni Abram, waina e doko Sodom, go naloriki aneana maga, po pano.

¹³Go tea sava pano sikai e umai, po noakisai Abram nawora ni Heberu asa: go nae e doko nalake ni oak maga ki Mamre nawora ni Amor, tai ni Eshkol, go tai ni Aner; go nara ma Abram eu dum̃ada silae ra.

¹⁴Go ragi waina Abram e dogo naga taina e pei tea vuatiana pano, e maraki lua tea vasapiseikiana naanoai aneana maga, waina eu pakilina nasum̃a aneana, p̃onotia dolu rualima takuna sikai tamate latolu, po sava dausi ra pa pa paki Dan.

¹⁵Go e dum̃ana dap̃otae a dip̃a ra p̃ogi, nae go tea suasua aneana maga, po atu ra, po kopasi ra pa pa paki Hobah, waina e doko taleva ni mawiri ni Damaseko.

¹⁶Go e piragi puti naloriki liliu, go e piragi taina Lot, go naloriki aneana maga liliu, go nagoroi maga ma, go narei.

¹⁷Go nawota ni Sodom e pano naga ega sua e, edaku ki e liliu pae naatugiana ni Kedorlaomer go nawota maga waina eu sikoti a doko, nap̃aloa ni Shaveh (waina e pei Nap̃aloa ki Nawota).

¹⁸Go Melkisedek nawota ni Salem e dape bred go waine dave umai: go nae e pei tea viri ki Sup̃e Vakilagi Mau.

¹⁹Go e pasa m̃ata ki nia, po noa, Abram ega vei tea vasam̃atakiana ki Sup̃e Vakilagi Mau, talakea ni nakoroatelagi go maramana:

²⁰Go Sup̃e Vakilagi Mau ega vei tea vasam̃atakiana, waina e po pitua ki tea kokona ki‐go maga paki nam̃elearum̃a. Go e dua e kerualima sikai ni sara naleo.

²¹Go nawota ni Sodom e noa ki Abram, e naga, P̃a tua au naatam̃oli maga, go p̃a tum̃am̃a dape naloriki maga.

²²Go Abram e noa ki nawota ni Sodom, e naga, A po sike nam̃elearugu paki Yehovah, Sup̃e Vakilagi Mau, talakea ni nakoroatelagi go maramana,

²³Naga aga wo da dape te nalolo kite te natali ni nam̃elevasiana kite te navatuna seara waina e pei tea anigo mau, ku pe noa, A po mari Abram e pei sogolapa:

²⁴Kinau aga tika, ma tea waina natureai maga eu po gani a ega sikina pei aginau, go namagovai agi naatam̃oli maga waina eu sikoti au pano; Aner, Eshkol, go Mamre, nara euga tape namagovai adeada.