Read Nguna Togoa Etafe North JENESIS 15 Bible Online

JENESIS 15 - Nguna Togoa Etafe North bible

JENESIS 15

¹Ragi edaku ki naleo maga wanogoe navasaana ki Yehovah e umai paki Abram navunusiana sikai, po noa, P̃a ta mataku mau, Abram; kinau a pei nakokoro anigo, go namoriana warua liu anigo.

²Go Abram e noa, Talakeagu Yehovah O, p̃a wo dua au nasava? Go kinau a pano a dika natugu, go tea waina ega wo pei talakea ni nasum̃a aginau e pei Damaseko Elieser.

³Go Abram e noa, P̃a leo, ku da dua au te natugu mau: go p̃a leo, tea waina e pakilina nasum̃a aginau e peani p̃aumaso aginau.

⁴Go p̃a leo, navasaana ki Yehovah e umai paki nia, po noa, Naatam̃oli wanogoe ega wo da peani p̃aumaso anigo mau; ma tea waina ega wo dave m̃elu dua ki namaritam̃a nae ega wo peani p̃aumaso anigo.

⁵Go e piragi a paki katama, po noa, P̃a leo paki nakoroatelagi, po peve m̃asoe maga, ku pe veve atae ra: go e noa ki nia, e naga, naworaworam̃a euga wo dapalana.

⁶Go e saralomau Yehovah; go e midoa ki nia naga ega maneana pei namarinaleoleanaana.

⁷Go e noa ki nia, e naga, Kinau a pei Yehovah waina e piragi lua ko m̃elu dua ki Ur ki Kaldea maga umai, naga aga tua ko navanua waia naga p̃a veani a.

⁸Go e noa, Talakeagu Yehovah O, aga atae dapale sava naga aga wo peani a?

⁹Go e noa ki nia, e naga, P̃a maginau puati kau goroi sikai ni natau dolu, go naninani goroi sikai ni natau dolu, go shiip anoai sikai ni natau dolu, go turi sikai, go tokopea vusavusa sikai.

¹⁰Go e maneana puati tea mamau puti wanogoe, po dap̃orae ra m̃aleoputo, po doropusi sara matele eu doko pisari matele kerua kakada: ma e da dap̃orae manu mau.

¹¹Go manu seresere eu siwo umai paki nalo mate maga wanogoe, go Abram e suipuro ra pano.

¹²Go ragi waina elo e m̃aladigi musu, namaturuana warua sikai e dowo Abram; go p̃a leo, namatakuana warua sikai ni namaligo warua e dowo asa.

¹³Go e noa ki Abram, e naga, P̃a atae m̃ata ki nia naga naworaworam̃a euga wo pei nam̃enaki atatoko navanua sikai waina e da pei tea adeada mau, po madeada suasua; go euga wo mari ra euga wo dogokitesa natau p̃onotia pati;

¹⁴Go nalauna wanogoe ma, waina euga wo maneana suasua, aga wo pasap̃otae a: go euga wo edaku m̃elu dua ki nia umai po dape naloriki laapa umai.

¹⁵Ma nigo p̃a wo pa punusi tamam̃a maga natam̃ateana; p̃a wo pei tea ovakiana ragi waina p̃a wo kapuara p̃ia.

¹⁶Go tagona kevati euga wo liliu umai paki nea: nalakena namarinaleotageleana ki naworawora ni Amor e ko da pura ragi waia mau.

¹⁷Go e pakilina, naga, ragi waina elo e musu, go e maligo, p̃a leo, m̃oru ni upu asua sikai, go nasulu soro sikai waina e duaduru namawota ni matele maga wanogoe pano.

¹⁸Naaleatia wanogoe Yehovah e mari navasasokiana sikai paki Abram, po noa, A po dua naworaworam̃a navanua waia, pae noaisara ni Ityipt pa pa paki noaisara warua, noaisara Eufrates:

¹⁹Naworawora ni Kain, go naworawora ni Kenis, go naworawora ni Kadmon,

²⁰Go naworawora ni Heth, go naworawora ni Peris,

²¹go naworawora ni Refaim, Go naworawora ni Amor, go naworawora ni Kanaan, go naworawora ni Cirkash, go naworawora ni Yebus.