Read Nguna Togoa Etafe North JENESIS 18 Bible Online

JENESIS 18 - Nguna Togoa Etafe North bible

JENESIS 18

¹Go Yehovah e pakilina ki nia nalake ni oak maga ki Mamre, go nae e do natano namata ni tap̃aup̃au ragi ni sui ni aleati;

²Go e sike namatana po leo, go p̃a leo, naatam̃oli dolu eu lawodu naraena: go ragi waina e punusi ra, e sava dua ki namata ni tap̃aup̃au pano naga ega sua ra, go e kolo suai natano, Po noa,

³Nawota aginau, a pe vap̃ai nasaup̃iaana namatam̃a, p̃a ta liu dua ki tea suasua anigo mau, a pavara ni ko asa:

⁴P̃a suasua naga noai kiki ega vei tea tapeana umai, go kuga sarue natuamu, po kere one etano ni nakau.

⁵Go aga wo dape matele navinaga kiki umai, go kuga silae nap̃op̃omu; kuga wo edaku surata pano nalakena ku po umai punusi tea suasua animu. Go eu noa. P̃a mari dapala waina ku po noa e.

⁶Go Abraham e paki ekopu m̃araverave punusi Sarah, po noa, P̃a m̃araverave p̃a tape totowo ni flaur wia ega tolu, p̃a m̃oli a, ega vei keke seara, go p̃a tao ni a.

⁷Go Abraham e sava paki navata ni kau maga, po puati kau natuna vusavusa sikai waina e manainai go e p̃ia, go e dua tea suasua asa; go e mari m̃araverave mari usi peni a.

⁸Go e dape batar, go milk, go kau natuna vusavusa waina e mari usi peni sua e, po doropusi a naraeda; go e lawodu pisari ra etano ni nakau, go eu ganikani.

⁹Go eu noa ki nia, eu naga, Am̃agoroi Sarah wai? Go e noa, P̃a leo. E doko ekopu ni tap̃aup̃au.

¹⁰Go e noa, Aga wo liliu umai lomau punusi ko ragi vusavusa ni natau vau; go p̃a leo, am̃agoroi Sarah ega wo dape natuna naanoai sikai. Go Sarah e dogo e namata ni tap̃aup̃au, waina e doko natakuna.

¹¹Go Abraham go Sarah ero pei tea matua, naaleatia adeada eu laapa; Sarah e makoto ki navunusiana adeada nagoroi.

¹²Go Sarah e muru nap̃alauna, po noa, Ragi waina a po pei tea tuai aga wo peani namaroana kite? Go nawota aginau ma e pei tea matua.

¹³Go Yehovah e noa ki Abraham, e naga, Ekasana Sarah e muru, po noa, Kinau, waina a po pei tea matua, aga wo dape piakiki sikai lomau kite?

¹⁴Te navatuna e pei tea ni namagaana dapala Yehovah e marisa mari a kite? Ragi tatutakiana aga wo liliu umai asa punusi ko, ragi vusavusa ni natau vau, go Sarah ega wo dape natuna naanoai sikai.

¹⁵Go Sarah e pasagoro e, po noa, A da muru mau; nalakena a mataku. Go e noa, Ee; ma ku muru.

¹⁶Go naatam̃oli maga wanogoe eu duleana m̃elu dua ki tokora wanogoe, po leo paki narae ni Sodom: go Abraham e sikoti ra pano naga ega vitana ki da.

¹⁷Go Yehovah e noa, Kinau aga tasuru ki Abraham tea waina kinau a naga aga mari a kite?

¹⁸Go Abraham ega wo pei nalauna warua go kasua lomau, go nalauna mamau puti ni maramana euga wo pei tea vasam̃atakiana asa.

¹⁹Nalakena a po atae a, naga ega tip̃aki natuna maga go tea ni nasum̃a aneana maga waina euga wo edaku ki nia, naga euga vavaigoro napua ki Yehovah, naga euga mari namarinaleoleanaana go navasap̃otaeana; naga Yehovah ega viragi umai paki Abraham tea waina e po noa e asa.

²⁰Go Yehovah e noa, Nalakena nakuapiosoana ni Sodom go Comorrah e p̃arua, go nalakena namarinaleosaana adeada e madaga sa;

²¹Aga wo siwo pano, po punusi eu po mari dapala nakuapiosoana kakana, waina e po umai paki nau kite?

²²Go e pe tika, a pe wo atae. Go naatam̃oli maga wanogoe ero dum̃ada doa ra m̃elu dua ki tokora wanogoe, po surata paki Sodom pano: ma Abraham e ko lawodu narae ni Yehovah.

²³Go Abraham e umai paki m̃aladigi, po noa, P̃a wo mari puoli ki tea leana maga sikoti tea sigisigileo maga kite?

²⁴Mase tea leana rualima lima eu pe toko natokoana wanogoe: p̃a wo mari puoli ki nia po da p̃op̃osoki tokora wanogoe nalakena tea leana rualima lima waina eu doko asa kite?

²⁵Tea wanogoe ega madu uvea ki‐go naga p̃a mari dapala naleo wanogoe, naga p̃a maripunue tea leana maga sikoti tea sigisigileo maga, go naga tea leana maga euga takiusi tea sigisigileo maga; tea wanogoe ega madu uvea ki‐go: Tea Vasap̃otae ni maramana mamau ega wo da mari leana kite?

²⁶Go Yehovah e noa, A pe vap̃ai tea leana rualima lima Sodom eu pe toko natokoana wanogoe, a pe wo p̃op̃osoki tokora wanogoe mamau nalakena nara.

²⁷Go Abraham e pasadara po noa, P̃a leo, a piviari pasa ki Talakeagu, go kinau a pei nam̃otam̃ota go natanoapu:

²⁸mase elima ni tea leana rualima lima eu pe vuoli: p̃a wo mari sa ki natokoana mamau nalakena elima kite? Go e noa, A pe vap̃ai rualima pati tamate lima asa, a pe wo da mari sa ki nia mau:

²⁹Go e moro sokari navasaana paki nia, po noa, Mase rualima pati eu pe vei tea vap̃aiana asa. Go e noa, A pe wo da mari a mau nalakena rualima pati wanogoe.

³⁰Go e noa, Talakeagu ega ta maeto mau, go aga wo pasa: mase rualima dolu eu pe vei tea vap̃aiana asa. Go e noa, A pe vap̃ai rualima dolu a pe wo da mari a mau.

³¹Go e noa, P̃a leo, a po piviari pasa ki Talakeagu: mase rualima dua eu pe vei tea vap̃aiana asa. Go e noa, A pe wo da mari sa ki nia mau nalakena rualima dua wanogoe.

³²Go e noa, Talakeagu ega ta maeto mau, go aga wo moro pasa paka sikai maau waia: mase rualima sikai eu pe vei tea vap̃aiana asa. Go e noa, A pe wo da mari sa ki nia mau nalakena rualima sikai wanogoe.

³³Go Yehovah e pano, ragi waina e makoto ki navasaana paki Abraham: go Abraham e liliu paki tokora aneana.