Read Nguna Togoa Etafe North JENESIS 2 Bible Online

JENESIS 2 - Nguna Togoa Etafe North bible

JENESIS 2

¹Go nakoroatelagi go maramana ero pei tea marisuaana, go tagona mamau puti kakada.

²Go naaleatia kelarua Sup̃e e mari sua nawosiana aneana waina e mari a go e maromaro naaleatia kelarua ki nawosiana aneana mamau puti waina e mari a.

³Go Sup̃e e pasa m̃ata ki naaleatia kelarua, po dapugoro e nalakena e maromaro asa ki nawosiana aneana mamau puti waina e dawona ki da po mari ra.

⁴Tea maga waia eu pei navakilinaana maga ni nakoroatelagi go maramana ragi waina ero pei tea tawonakiana, naaleatia waina Yehovah Sup̃e e mari maramana go nakoroatelagi.

⁵Go te nakau seara ni namalasi e ko da doko navanua mau, go te nataputea seara ni namalasi e ko da pisou mau nalakena Yehovah Sup̃e e ko da mari usa e p̃owo navanua mau, go naatam̃oli sikai waina ega kili natano e ko da doko mau.

⁶Ma namavu sikai e sake m̃elu dua ki maramana pano, po pue narae ni natano mamau.

⁷Go Yehovah Sup̃e e mari dawona ki nam̃otam̃ota seara ni natano e pei naatam̃oli, po marodua nagisuna namerona ni namauriana go naatam̃oli e po pei naatana mauri.

⁸Go Yehovah Sup̃e e lawo roara sikai Eden taleva ni elo sake kakana go, tokora wanogoe e doropusi naatam̃oli asa waina e mari a.

⁹Go sara nakau waina eu pei tea lom̃atakiana, go waina eu p̃ia ki navinaga, Yehovah Sup̃e e mari ra eu ulua pae natano nakau ni namauriana ma m̃aleoputo ni roara, go nakau ni naataeana ni nawiaana go ni nasaana.

¹⁰Go noaisara sikai e sara pae Eden naga ega vue roara go e pei tea wasiana pae tokora wanogoe, po pei arana pati.

¹¹Nagisa ni tea vea Pishon, nae e pei tea waina e dalivirigoro navanua mamau ni Havilah, tokora waina kold e doko asa.

¹²Go kold ni navanua wanogoe e p̃ia bedelium e doko asa go vatu natap̃alakisi.

¹³Go nagisa ni noai kerua Cihon nae e pei tea waina e dalivirigoro navanua mamau ni Kush.

¹⁴Go nagisa ni noaisara ketolu Hiddekel nae e pei tea waina e pae narae ni Assiria pano. Go noaisara kevati e pei Eufrates.

¹⁵Go Yehovah Sup̃e e piragi naatam̃oli po doropusi a roara ni Eden, naga ega wosiwosi asa po pavaigoro e.

¹⁶Go Yehovah Sup̃e e dip̃aki naatam̃oli, po naga, Sara nakau ni roara, p̃a to gani a.

¹⁷Ma nakau ni naataeana ni nawiaana go ni nasaana, p̃a ta gani a mau nalakena naaleatia waina ku pe kani a ku pe wo mate lomau.

¹⁸Go Yehovah Sup̃e e noa, E da p̃ia mau naga naatam̃oli ega sikina doko aga wo maneana mari tea silae sikai, waina ega wo patakana.

¹⁹Go Yehovah Sup̃e e mari dawona ki natano seara kakana e pei sara nalo tuavati ni namalasi, go sara manu ni namalopa po piragi ra umai punusi naatam̃oli, naga ega vunusi tea waina nae ega soso ra asa go tea waina naatam̃oli e soso sara nalo mauri asa, tea wanogoe e pei nagisada.

²⁰Go naatam̃oli e salagisa ni sara katel, go ni sara manu ni namalopa, go ni sara nalo mila ni namalasi ma tea silae agi naatam̃oli waina e patakana e da pei tea vap̃aiana mau.

²¹Go Yehovah Sup̃e e mari namaturuana warua sikai e dowo naatam̃oli go e maturu, go e dape vidina sikai kakada, po mari p̃onoti nap̃okasina e doko oli a.

²²Go vidina waina Yehovah Sup̃e e dape a m̃elu naatam̃oli, e davagi a e pei nagoroi sikai, po piragi a umai punusi naatam̃oli.

²³Go naatam̃oli e noa, Sala waia tea waia e pei navatu ni navatugu maga, go nap̃okasi ni nap̃okasigu. Ega wo pei tea sosoana ki Nagoroi, nalakena e pei tea tapeana m̃elu Naanoai.

²⁴Nalakena tea wanogoe naanoai ega toropusi tamana go p̃ilana, go ega vuluti anagoroi, go eroga wo pei nap̃okasi sikai maau.

²⁵Go ero dua m̃alam̃ala, naatam̃oli go anagoroi, go ero da m̃aliere mau.