Read Nguna Togoa Etafe North JENESIS 20 Bible Online

JENESIS 20 - Nguna Togoa Etafe North bible

JENESIS 20

¹Go Abraham e dakai po surata m̃elu dua ki tokora wanogoe paki navanua ni Sauth pano, po doko namawota ni Kadesh go ni Shur; go e m̃enaki atatoko Cerar.

²Go Abraham e noa anagoroi Sarah, e naga, E pei goregu: go Abimelek nawota ni Cerar e dip̃aki lua, po piragi lua Sarah.

³Ma Sup̃e e umai punusi Abimelek nap̃erea sikai ni p̃ogi, po noa ki nia, e naga, P̃a leo, ku pei tea mate, nalakena nagoroi waina ku po piragi lua e; nalakena e laki anawota.

⁴Go Abimelek e da umai paki m̃aladigi ki nia mau: go e noa, Talakeagu, p̃a wo maripunue nalauna leana kite?

⁵Nae e da dum̃ana noa ki nau, Nae e pei goregu, kite? Go nagoroi, nae ma e dum̃ana noa, Nae e pei goregu: namarinaleoleanaana ni nap̃op̃ogu go natautauana ni nam̃elearugu a po mari tea waia asa.

⁶Go Sup̃e e noa ki nia nap̃erea wanogoe, e naga, Io, kinau a atae naga ku po mari tea waia namarinaleoleanaana ni nap̃op̃om̃a, go kinau ma a mauti ko ku da mari naleo sa dip̃a au asa mau: nalakena tea wanogoe a da suasua ki‐go naga p̃a kisidogo e mau.

⁷Go ragi waia p̃a tua naatam̃oli wanogoe anagoroi ega liliu; nalakena e pei profeta sikai, go ega wo manigo dapasavasa, go p̃a wo mauri: go ku pe ta pitua ki nia liliu mau, p̃a atae naga p̃a wo mate lomau, nimu ma tea anigo mamau puti.

⁸Go Abimelek e duleana malip̃ogi sa, po soso tea suasua aneana mamau puti, po dogorogo ki naleo mamau puti wanogoe paki nadaligada: go naatam̃oli maga wanogoe eu mataku p̃arua.

⁹Go Abimelek e soso Abraham, po noa ki nia, e naga, Ku po mari nasava paki gami? Go a mari naleo sa nasava paki‐go, e pei nalakena ku po piragi namarinaleosaana warua sikai umai paki gami ma nalauna aginau? Ku po mari namariana maga paki nau waina e da p̃ia naga euga vei tea mariana mau.

¹⁰Go Abimelek e noa ki Abraham, e naga, Ku punusi nasava, e pei nalakena ku po mari naleo waia?

¹¹Go Abraham e noa, nalakena a midoa ki nia, naga namatauki‐Sup̃e‐ana e alagoro da doko tokora waia mau; go naga euga wo maripunue au nalakena agugoroi.

¹²Ma e pei goregu lomau, e pei natu ni mama, ma e da pei natu ni teete mau; go e po pei agugoroi.

¹³Go ragi waina Sup̃e e mari au a surata m̃elu dua ki nasum̃a ki mama pano, a noa ki nia, a naga, Tea waia ega vei nadodomiana anigo waina p̃a mari a paki nau; sara tokora waina toroga wo umai paki asa, p̃a noa au, p̃a naga, Nae e pei goregu.

¹⁴Go Abimelek e puati shiip maga go kau maga, go tea suasua naanoai maga go tea suasua nagoroi maga, po dua Abraham ara, po dua e anagoroi Sarah e liliu.

¹⁵Go Abimelek e noa, P̃a leo, navanua aginau e doko naraem̃a: p̃a toko tokora waina e p̃ia namatam̃a.

¹⁶Go e noa ki Sarah, e naga, P̃a leo, a po dua gorem̃a matele ni silver manu sikai: p̃a leo, nae e manigo pei tea kovagoro ni namatam̃a paki tea mamau puti waina eu sikoti ko; go ku pei tea marim̃atakiana paki tea mamau puti.

¹⁷Go Abraham e dapasavasa ki Sup̃e: go Sup̃e e mauripauri Abimelek, go anagoroi, go tea suasua nagoroi aneana maga; go eu dape piakiki maga.

¹⁸Nalakena Yehovah e p̃ogoro soki nap̃ele ni nagoroi mamau puti ni nasum̃a ki Abimelek, nalakena Sarah Abraham anagoroi.