Read Nguna Togoa Etafe North JENESIS 22 Bible Online

JENESIS 22 - Nguna Togoa Etafe North bible

JENESIS 22

¹Go e pakilina edaku ki naleo maga wanogoe, naga Sup̃e e maridogo Abraham. Po noa ki nia, e naga, Abraham; go e noa, Kinau nea.

²Go e noa, P̃a viragi lua natum̃a, natum̃a sikedau, waina ku dodomi a, Isaak nogo, go p̃a vano paki navanua ni Moriah; po pitua ki nia tokora wanogoe, ega vei naviriana tap̃arakiana sikai tava maga sikai kakada waina aga wo noa ki‐go asa.

³Go Abraham e duleana malip̃ogi sa, po sawa ki tea sawagoro nam̃adu ni ass aneana, po piragi lua natureai aneana maga tea rua kakada ero sikoti a pano, nara ma natuna Isaak; go e dap̃orae nakau kokolo ni naviriana tap̃arakiana, po duleana, po pano paki tokora waina Sup̃e e noa ki nia asa.

⁴Naaleatia ketolu Abraham e sike namatana, po punusi tokora wanogoe e madu uvea.

⁵Go Abraham e noa ki natureai aneana dua, e naga, Koroga toko tokora waia nimu ma ass, go kinami ma natureai aroga vano pa pa paki tokora wanana; go aroga wo lotu, po liliu umai punusi mu.

⁶Go Abraham e dape nakau kokolo ni naviriana tap̃arakiana, po doropusi a natuna Isaak; go e dape nakapu vavaga go masimasi ero doko nam̃elearuna; go nara dua ero surata pano.

⁷Go Isaak e pasa paki tamana Abraham, po noa, Mama. Go e noa, Kinau nea, natugu. Go e noa, P̃a leo, nakapu vavagu go nakau kokolo nea: ma shiip natuna waina ega wo pei naviriana tap̃arakiana wai.?

⁸Go Abraham e noa, Sup̃e ega wo dum̃ana punusi shiip natuna waina ega wo pei naviriana tap̃arakiana sikai, natugu: go nara dua ero surata pano.

⁹Go ero umai paki tokora waina Sup̃e e noa ki nia asa; go Abraham e davagi wede ni naviriana tokora wanogoe, po daua ki nakau kokolo, po soli natuna Isaak, po doropusi a e one wede ni naviriana elagi ni nakau kokolo.

¹⁰Go Abraham e sai ki nam̃elearuna, po puati masimasi naga ega maripunue natuna.

¹¹Go agelo ki Yehovah e pioso pae nakoroatelagi paki nia, po noa, Abraham, Abraham: go e noa, Kinau nea.

¹²Go e noa, P̃a ta sai ki nam̃elearum̃a paki natureai mau, go p̃a ta mari te navatuna paki nia. Nalakena ragi waia a atae naga nigo ku matau ki Sup̃e, go ku da mauti au natum̃a, natum̃a sikedau mau.

¹³Go Abraham e sike namatana, po punusi, go p̃a leo, shiip anoai sikai natakuna e pei tea vuasokiana namalasi wono ki napati ni nap̃auna: go Abraham e pano po puati shiip anoai wanogoe, po pitua ki nia e pei naviriana tap̃arakiana e suruoli natuna.

¹⁴Go Abraham e soso nagisa ni tokora wanogoe ki Yehovah Yireh. Waina e pei tea noaana pa pa paki naaleatia waia, eu naga, Ega wo pei tea vunusiana tava ki Yehovah e pitua .

¹⁵Go agelo ki Yehovah e pioso pae nakoroatelagi paki Abraham sala kerua,

¹⁶Po noa, A po dum̃agu pivisa pae au, Yehovah e noa e, nalakena ku po mari naleo waia, po da mauti natum̃a, natum̃a sikedau mau:

¹⁷Naga aga wo pasa m̃ata ki, pasa m̃ata ki p̃arua ki‐go, po mari naworaworam̃a euga wo laapa, euga wo laapa dapala m̃asoe maga ni nakoroatelagi, go dapala naworaone waina e one nagole ni natasi; go naworaworam̃a euga wo peani namata‐pua ki tea maga waina eu kokona ki da;

¹⁸Go naworaworam̃a nalauna mamau puti ni maramana euga wo pei tea vasam̃atakiana asa; nalakena ku po dogo parati ki nadaleogu.

¹⁹Go Abraham e liliu umai punusi natureai aneana dua, go ero duleana po mamau surata paki Beer‐sheba pano; go Abraham e doko Beer‐sheba doko.

²⁰Go e pakilina edaku ki naleo maga wanogoe, naga e pei tea noasaiana paki Abraham, e naga, P̃a leo, Milkah, nae ma e magi taim̃a Nahor dape natuna maga;

²¹Tea takalapa Us, go taina Bus, go Kemuel tama ni Aram;

²²Go Kesed, go Haso, go Pildash, go Yidlaf, go Bethuel.

²³Go Bethuel e pesi Rebekah: nara latolu Milkah e magi Nahor, Abraham taina, dape ra.

²⁴Go narup̃a aneana, waina nagisana e pei Reumah, nae ma e dape Tebah, go Caham, go Tahash, go Maakah.