Read Nguna Togoa Etafe North JENESIS 23 Bible Online

JENESIS 23 - Nguna Togoa Etafe North bible

JENESIS 23

¹Go namauriana ki Sarah e pei natau p̃onotia sikai rualima takuna dua tamate larua tea maga wanogoe eu pei natau maga ni namauriana ki Sarah.

²Go Sarah e mate Kiriath‐arba (waina e pei Hebron), navanua ni Kanaan: go Abraham e umai naga ega susue Sarah, po dagisi a.

³Go Abraham e duleana m̃elu dua ki narae ni tea mate aneana, po pasa paki Heth natuna maga, po noa,

⁴Kinau a pei nam̃enaki go atatoko sikoti mu. Kuga tua au naveaniana ni matigo sikai sikoti mu, naga aga ova ki tea mate aginau ega vuoli ki naraegu.

⁵Go Heth natuna maga eu pasadara Abraham, po noa ki nia, eu naga,

⁶P̃a rogo gami, nawota aginau: nigo ku pei tea maraki sikai ki Sup̃e m̃aleoputo kakagami: matigo matadoaana aginami p̃a ova ki tea mate anigo asa; te naata kakagami ega wo da mauti ko matigo aneana mau, naga p̃a ta ova ki tea mate anigo asa mau.

⁷Go Abraham e duleana, po kolo suai natano paki naatam̃oli maga ni navanua, paki Heth natuna maga.

⁸Go e pasa paki da, po naga, E pe vei namidodoana animu naga aga ova ki tea mate aginau ega vuoli ki naraegu, kuga rogo au, po maginau pavara ni Efron natu ni Sohar,

⁹Naga ega tua au valea ni Makpelah, waina e peani a, waina e doko namatap̃ago ni vanua aneana; ega tua au asa m̃aleoputo kakamu raki silver waina e patakana naga aga veani a ega vei matigo.

¹⁰Go Efron e do natano m̃aleoputo ni Heth natuna maga: go Efron nawora ni Heth e pasadara Abraham nadaliga ni Heth natuna maga, nadaliga ni tea mamau puti waina eu pae namata‐pua paki natokoana aneana,

¹¹e naga, Ee nawota aginau, p̃a rogo au: vanua wanogoe a dua ko asa, go valea waina e doko asa, a dua ko asa; namata ni naatam̃oli aginau maga natuda maga a dua ko asa: p̃a ova ki tea mate anigo.

¹²Go Abraham e kolo suai natano narae ni naatam̃oli maga ni navanua.

¹³Go e pasa paki Efron nadaliga ni naatam̃oli maga ni navanua, po naga, Ma ku pe suasua, p̃a rogo au, a pavara ni ko asa: aga wo pitua ki m̃ane raki vanua wanogoe; p̃a tape a kiagu, go aga wo ova ki tea mate aginau asa.

¹⁴Go Efron e pasadara Abraham, po noa ki nia, e naga, Nawota aginau, p̃a rogo au: matele

¹⁵ni navanua ni shekel ni silver p̃onotia pati, tea wanogoe e pei nasava namawota kakagida? E p̃ia p̃a ova ki tea mate anigo.

¹⁶Go Abraham e dogo parati ki Efron; go Abraham e magi Efron dowogi silver, waina e noa e nadaliga ni Heth natuna maga, shekel ni silver p̃onotia pati, tea vituatuakiana ki tea vakokoto.

¹⁷Go vanua ki Efron, waina e doko Makpelah, waina e doko narae ni Mamre, vanua wanogoe, go valea waina e doko asa, go nakau mamau puti waina eu doko vanua wanogoe, waina eu doko nadigina mamau daliviri,

¹⁸Eu magi Abraham du pei aneana naveaniana namata ni Heth natuna maga, narae ni tea mamau puti waina eu pae namata‐pua paki natokoana aneana.

¹⁹Go edaku ki tea wanogoe, Abraham e ova ki anagoroi Sarah valea ni vanua ni Makpelah narae ni Mamre (waina e pei Hebron), navanua ni Kanaan.

²⁰Go vanua wanogoe, go valea waina e doko asa, ero magi Abraham du pei aneana naveaniana ni matigo pae Heth natuna maga.