Read Nguna Togoa Etafe North JENESIS 24 Bible Online

JENESIS 24 - Nguna Togoa Etafe North bible

JENESIS 24

¹Go Abraham e pei tea matua, tea ni naaleatia laapa: go Yehovah e pasa m̃ata ki Abraham sara naleo.

²Go Abraham e noa ki tea suasua aneana, tea matua ni nasum̃a aneana, tea maraki tea mamau puti waina e peani ra, e naga, P̃a toropusi nam̃elearum̃a etano ni namaogu, a pavara ni ko asa:

³Go aga wo mari ko p̃a vivisa pae Yehovah, Sup̃e ni nakoroatelagi, go Sup̃e ni maramana, naga p̃a wo da magi natugu piragi nagoroi sikai ni naworawora ni Kanaan natuda nagoroi maga, waina kinau a doko m̃aleoputo kakada.

⁴Ma p̃a vano paki navanua aginau, po pa punusi namatarau aginau, po magi natugu Isaak piragi nagoroi sikai.

⁵Go tea suasua wanogoe e noa ki nia, e naga, Mase nagoroi wanogoe e pe wo da masauna naga ega rausi au umai paki navanua waia mau: e pe one au one naga aga viragi natum̃a ega liliu paki navanua waina ku pae asa umai kite?

⁶Go Abraham e noa ki nia, e naga, P̃a vavaigoro naga p̃a ta piragi natugu ega liliu paki tokora wanogoe mau.

⁷Yehovah, Sup̃e ni nakoroatelagi, waina e piragi lua au m̃elu dua ki nasum̃a ki mama, go navanua waina a pakilina asa, go waina e pasa ki nau, go waina e pivisa paki nau, po noa, Aga wo dua naworaworam̃a navanua waia; nae ega wo dip̃aki lua agelo aneana ega wo pea ki‐go, go p̃a wo magi natugu piragi nagoroi sikai pae tokora wanogoe.

⁸Go nagoroi wanogoe e pe wo da masauna naga ega rausi ko mau, ragi wanogoe navivisaana aginau waia e pe wo da soko ki‐go mau; ma p̃a ta piragi natugu ega liliu paki tokora wanogoe mau.

⁹Go tea suasua wanogoe e doropusi nam̃elearuna etano ni namao ni nawota aneana Abraham, po pivisa paki nia naleo wanogoe.

¹⁰Go tea suasua wanogoe e puati kamel rualima sikai, ni kamel maga ki nawota aneana, po pano; go sara naleo wia ki nawota aneana e doko nam̃elearuna: go e duleana, po pano paki Mesopotamia, paki natokoana ki Nahor.

¹¹Go e mari kamel maga eu ditip̃atua etaku ni natokoana wanogoe pisari m̃oru noai ragi melu, ragi waina nagoroi maga eu dave pano naga euga vautu.

¹²Go e noa, Yehovah, Sup̃e ki nawota aginau Abraham, p̃a mari a ega vakilina ki nau masoso, go p̃a mari nadodomiana paki nawota aginau Abraham.

¹³P̃a leo, kinau a lawodu pisari namata noai; go naatam̃oli maga ni natokoana natuda nagoroi maga eu dave umai naga euga vautu noai:

¹⁴Go ega vakilina, naga nagoroi atara waina aga wo noa ki nia, P̃a toro napura noai anigo, a pavara ni ko asa, naga aga munu; go nae ega wo noa, P̃a munu, go aga wo dua kamel anigo maga nara ma euga munu: nae ega vei tea waina ku po magi tea suasua anigo Isaak noap̃otae a; go aga wo atae ki tea wanogoe naga ku po mari nadodomiana paki nawota aginau.

¹⁵Go e pakilina, ragi waina nae e ko da pasa sua mau, naga, p̃a leo, Rebekah e dave umai, waina e magi Bethuel pakilina natu ni Milkah, nagoroi ki Nahor, tai ni Abraham, go napura noai aneana e doko napauna.

¹⁶Go naatara wanogoe e pei tea lom̃atakiana warua liu, e da laki mau, go te naanoai e da atae a mau: go e siwo paki namata noai pano, po pakavuro napura noai aneana, po sake umai.

¹⁷Go tea suasua wanogoe e sava naga ega sua e, go e noa, P̃a tua au aga munu, a pavara ni ko asa, noai kiki ni napura noai anigo.

¹⁸Go e noa, P̃a munu, nawota aginau: go e mari m̃araverave, po doro napura noai aneana e doko nam̃elearuna, po duae e munu.

¹⁹Go ragi waina e duae e munu sua, e noa, Aga magi kamel anigo maga pautu, pa pa pa nara ma euga munu sua.

²⁰Go e mari m̃araverave, po daki noai ni napura noai aneana paki siloa, po moro sava paki m̃oru noai naga ega vautu, go e magi kamel aneana mamau puti pautu.

²¹Go naatam̃oli wanogoe e leo soki a; e punuta doko, naga ega atae Yehovah e po mari napua aneana e disu p̃ia kite?

²²Go e pakilina, ragi waina kamel maga eu munu sua, naga naatam̃oli wanogoe e dape rig ni kold sikai ni narowogiana ni shekel namagovai, go lela dua agi naruna dua ki narowogiana ni kold shekel rualima sikai;

²³Po noa, Nigo ku pei natu ni sei? P̃a noakisai au asa, a pavara ni ko asa. Nasum̃a ki tamam̃a e pei tokora waina kinami auga m̃enaki asa kite?

²⁴Go e noa ki nia, e naga, Kinau a pei natu ni Bethuel natu ni Milkah, waina e magi Nahor dape a.

²⁵Go e moro noa ki nia, e naga, Au peani nam̃enau go napura laapa, go tokora waina kuga m̃enaki asa.

²⁶Go naatam̃oli wanogoe e kolo, po suai natano paki Yehovah.

²⁷Go e noa, Yehovah, Sup̃e ki nawota aginau Abraham, ega vei tea vasam̃atakiana, waina e da dape lua nadodomiana go nalomauana aneana ki nawota aginau mau Kinau a doko napua. Yehovah e po piragi au paki nasum̃a ki nawota aginau taina maga.

²⁸Go naatara wanogoe e sava, po noakisai tea ni nasum̃a ki p̃ilana dapala navasaana maga wanogoe.

²⁹Go Rebekah e peani gorena sikai, go nagisana Laban: go Laban e sava pano punusi naatam̃oli wanogoe, paki namata noai pano.

³⁰Go e pakilina, ragi waina e punusi rig, go lela dua doko naru ni gorena, go ragi waina e dogo navasaana maga ki gorena Rebekah, waina e noa, Naatam̃oli wanogoe e pasa paki nau dapala nogoe; naga e umai punusi naatam̃oli wanogoe; go p̃a leo, e lawodu pisari kamel maga pisari namata noai.

³¹Go e noa, P̃a umai paki ekopu, tea vasam̃atakiana ki Yehovah; ekasana ku lawodu katama? Go kinau a po mari m̃ata ki nasum̃a, go tokora sikai agi kamel maga.

³²Go naatam̃oli wanogoe e umai paki ekopu, go e peresi natali tasoki ni kamel maga; go e pitua ki nam̃enau go napura agi kamel maga, go noai naga ega sarue natuana go natua ni naatam̃oli maga waina eu sikoti a doko.

³³Go navinaga e pei tea toropusiana naraena naga ega kanikani: ma e noa, Aga ta ganikani mau, pa pa aga vasa sua navasaana aginau maga.

³⁴Go e naga, P̃a vasa. Go e noa, Kinau a pei tea suasua ki Abraham.

³⁵Go Yehovah e po pasa m̃ata ki p̃arua ki nawota aginau; go e po p̃arua: go e po dua e navata maga ni shiip go naninani go navata maga ni kau maga, go silver go kold, go tea suasua naanoai maga go tea suasua nagoroi maga, go kamel maga go ass maga.

³⁶Go Sarah nawota aginau anagoroi e magi nawota aginau dape natuna naanoai sikai edaku ki navei‐tea‐matua‐ana aneana: go e po dua e tea mamau puti waina e peani ra.

³⁷Go nawota aginau e mari au a pivisa, e noa, P̃a ta magi natugu piragi nagoroi sikai ni naworawora ni Kanaan natuda nagoroi maga mau, waina kinau a doko navanua adeada doko:

³⁸Ma p̃a vano paki nasum̃a ki mama, po pa punusi namatarau aginau, po magi natugu piragi nagoroi sikai.

³⁹Go a noa ki nawota aginau, a naga, Mase nagoroi wanogoe e pe wo da dausi au mau.

⁴⁰Go e noa ki nau, e naga, Yehovah, waina a surata naraena, ega wo dip̃aki lua agelo aneana sikoti ko pano, po mari napua anigo ega wo disu p̃ia; go p̃a wo magi natugu piragi nagoroi sikai ni namatarau aginau, go ni nasum̃a ki mama:

⁴¹Ragi wanogoe navivisaana aginau ega wo da soko ki‐go mau, ragi waina p̃a wo umai punusi namatarau aginau; go eu pe ta dua ko asa mau, navivisaana aginau e pe wo da soko ki‐go mau.

⁴²Go a umai masoso paki namata noai, po noa, Yehovah, Sup̃e ki nawota aginau Abraham, ku pe mari napua aginau waina a pae asa e pe risu p̃ia:

⁴³P̃a leo, kinau a lawodu pisari namata noai; go ega vakilina, naga nagoroi atara waina ega wo dave umai naga ega vautu, waina aga wo noa ki nia, P̃a tua au aga munu, a pavara ni ko asa, noai kiki ni napura noai anigo;

⁴⁴Go ega wo noa ki nau, Nigo p̃a munu, go aga wo magi kamel anigo maga pautu: nae ega vei nagoroi waina Yehovah e po magi nawota aginau natuna noap̃otae a.

⁴⁵Go ragi waina a ko da pasa sua nap̃op̃ogu mau, p̃a leo, Rebekah e dave umai go napura noai aneana e doko napauna; go e siwo paki namata noai, po pautu: go a noa ki nia, a naga, P̃a tua au aga munu, a pavara ni ko asa.

⁴⁶Go e mari m̃araverave, po doro napura noai aneana pae napauna, po noa, P̃a munu, go aga wo dua kamel anigo maga nara ma euga munu: go a munu, go e dua kamel maga eu munu.

⁴⁷Go a pusuusu paki nia, po noa, Nigo ku pei natu ni sei? Go e noa, Natu ni Bethuel, natu ni Nahor, waina Milkah e maneana dape a: go a sai ki rig nadigi ni nagisuna, po sara ki lela dua naruna dua.

⁴⁸Go a kolo, po suai natano paki Yehovah, po pasa m̃ata ki Yehovah, Sup̃e ki nawota aginau Abraham, waina e piragi au a pae napua ni nalomauana naga aga magi nawota aginau natuna naanoai piragi taina natuna nagoroi.

⁴⁹Go ragi waia ku pe mari nadodomiana go nalomauana paki nawota aginau, kuga noa ki nau asa: go e pe tika, kuga noa ki nau asa; naga aga tawasi paki taleva ni matua, kite paki taleva ni mawiri.

⁵⁰Go Laban go Bethuel ero pasadara po noa, Naleo waia e pae Yehovah umai: au marisa noa ki‐go tea sa kite tea wia.

⁵¹P̃a leo, Rebekah e doko naraem̃a, p̃a viragi a, po pano, go ega vei nawota anigo natuna anagoroi, ega takiusi waina Yehovah e po noa e.

⁵²Go e pakilina, naga, ragi waina tea suasua ki Abraham e dogo navasaana adeada, e kolo suai natano paki Yehovah.

⁵³Go tea suasua wanogoe e dape lua naloriki wia maga ni silver, go naloriki wia maga ni kold, go sugoro maga, po dua Rebekah ara: go e dua gorena go p̃ilana naloriki wia maga ni naulu laapa.

⁵⁴Go eu ganikani po munu, nara ma naatam̃oli maga waina eu sikoti a doko, po m̃enaki. Go eu duleana malip̃ogi, go e noa, Kuga tip̃aki lua au pano punusi nawota aginau.

⁵⁵Go gorena go p̃ilana ero noa, Naatara wanogoe ega toko sikoti gami doko naaleatia seara, mase rualima sikai, go ega wo edaku pano.

⁵⁶Go e noa ki da, e naga, Kuga ta mari au aga edaku pano mau, nalakena Yehovah e po mari napua aginau, e disu p̃ia kuga tip̃aki lua au naga aga va punusi nawota aginau.

⁵⁷Go eu noa, Auga soso naatara wanogoe, po pusuusu paki nawokana.

⁵⁸Go eu soso Rebekah, po noa ki nia, eu naga, P̃a wo pano sikoti naatam̃oli waia kite?

⁵⁹Go e noa, Aga wo pano. Go eu dip̃aki lua goreda Rebekah, go tea vakale a, go tea suasua ki Abraham, go naatam̃oli aneana maga.

⁶⁰Go eu pasa m̃ata ki Rebekah, po noa ki nia, eu naga, Goregami, p̃a vei p̃ila ni tivilia manu maga, go naworaworam̃a euga veani namata‐pua ki tea maga waina eu pilosi ra.

⁶¹Go Rebekah e duleana, nara ma nagoroi atara aneana maga eu mamau, go eu sakesaake kamel maga, po dausi naatam̃oli wanogoe go tea suasua wanogoe e piragi lua Rebekah po pano.

⁶²Go Isaak e pae napua ni Beer‐lahai‐roi umai; nalakena e doko navanua ni Sauth.

⁶³Go Isaak e dave pano naga ega midodoa namalasi ragi melu: go e sike namatana, po punusi, go p̃a leo, kamel maga eu rumai.

⁶⁴Go Rebekah e sike namatana, go ragi waina e punusi Isaak, e dowo siwo nam̃adu ni kamel.

⁶⁵Go e noa ki tea suasua, e naga, Naatam̃oli wanae waina e surata namalasi naga ega sua gida e pei sei? Go tea suasua e noa, Nae e pei nawota aginau: go e dape nakulukulu taugororae aneana, po dum̃ana kulugoro e asa.

⁶⁶Go tea suasua e dogorogo paki Isaak naleo mamau puti waina e mari ra.

⁶⁷Go Isaak e piragi a paki ekopu ni tap̃aup̃au ki p̃ilana Sarah, po piragi Rebekah, go e po pei anagoroi; go e dodomi a: go Isaak e makoto ki nasusueana edaku ki p̃ilana.