Read Nguna Togoa Etafe North JENESIS 25 Bible Online

JENESIS 25 - Nguna Togoa Etafe North bible

JENESIS 25

¹Go Abraham e piragi nagoroi p̃ota sikai, go nagisana e pei Keturah.

²Go e maneana dape Simran, go Yokshan, go Medan, go Midian, go Ishbak, go Shuah.

³Go Yokshan e pesi Sheba, go Dedan. Go Dedan natuna naanoai maga eu pei Ashurim, go Letushim, go Leummim.

⁴Go Midian natuna naanoai maga; Efah, go Efer, go Hanok, go Abida go Eldaah. Tea mamau puti wanogoe eu pei Keturah natuna maga.

⁵Go Abraham e dua Isaak tea mamau puti waina e peani ra.

⁶Ma natu maga ni narup̃a dua, waina Abraham e peani ra, Abraham e dua ra navituaana maga; go e dip̃aki lua ra m̃elu dua ki natuna Isaak pano, ragi waina e ko mauri doko, paki ist, paki navanua ni ist pano.

⁷Go tea maga waia eu pei naaleatia maga ni natau maga ni namauriana ki Abraham waina e mauri asa, natau p̃onotia sikai rualima takuna larua tamate lima.

⁸Go Abraham e marodua ki namerona, po mate ragi waina e kapuara p̃ia, tea matua, po pura ki natau maga; po pei tea saisaikiana paki namatarau aneana maga.

⁹Go natuna dua Isaak go Ishmael ero ova ki nia valea ni Makpelah, vanua ki Efron natu ni Sohar nawora ni Heth, waina e doko narae ni Mamre;

¹⁰Vanua waina Abraham e pakotovi a paki Heth natuna maga: tokora wanogoe Abraham e pei tea ovakiana asa, nara ma anagoroi Sarah.

¹¹Go e pakilina edaku ki namateana ki Abraham, naga Sup̃e e pasa m̃ata ki natuna Isaak; go Isaak e doko pisari Beer‐lahai‐roi doko.

¹²Go tea maga waia eu pei navakilinaana maga ni Ishmael, Abraham natuna naanoai, waina Hakar nagoroi ni Ityipt, tea suasua nagoroi ki Sarah, e magi Abraham dape a:

¹³Go tea maga waia eu pei nagisa ni Ishmael natuna naanoai maga, nagisada maga, pae navakilinaana adeada maga: tea takalapa ni Ishmael, Nebaioth; go Kedar, go Adbeel, go Mibsam,

¹⁴Go Mishma, go Dumah, go Massa;

¹⁵Hadad, go Tema, Yetur, Nafish, go Kedemah:

¹⁶Tea maga wanogoe eu pei Ishmael natuna naanoai maga, go tea maga wanogoe eu pei nagisada maga, pae natokoana adeada maga, go nasum̃a ni p̃aaka adeada maga; tea maraki rualima sikai tamate dua pae nalauna adeada maga.

¹⁷Go tea maga waia eu pei natau ni namauriana ki Ishmael, natau p̃onotia sikai rualima takuna dolu tamate larua: go e marodua ki namerona po mate; po pei tea saisaikiana paki namatarau aneana maga.

¹⁸Go eu doko pae Havilah pa pa paki Assiria waina e doko narae ni Ityipt, napua waina ku pae asa paki Assiria: e doko narae ni taina mamau puti.

¹⁹Go tea maga waia eu pei navakilinaana maga ni Isaak, Abraham natuna: Abraham e pesi Isaak.

²⁰Go Isaak e pei tea ni natau rualima pati ragi waina e piragi Rebekah, natu ni Bethuel nawora ni Aram ni Padan‐aram, gore ni Laban nawora ni Aram, naga ega vei anagoroi.

²¹Go Isaak e magi anagoroi pavara ni Yehovah, nalakena e dim̃o: go Yehovah e dogo navavaraniana aneana, go anagoroi Rebekah e diena.

²²Go natuna dua ero dum̃ada pau ra nap̃alauna; go e noa, E pe tapala nogoe, ekasana a dapala waia? Go e pano naga ega vusuusu paki Yehovah.

²³Go Yehovah e noa ki nia, e naga, Nalauna dua ero doko nap̃elem̃a, Go narei dua eroga wo pei tea tap̃otaeana pae namaritam̃a: Go narei sikai ega wo kasua liu narei kerua; Go tea takalapa ega wo magi tea takariki suasua.

²⁴Go ragi waina naaleatia aneana maga eu nopu naga ega visola, p̃a leo, nedue ero doko nap̃elena.

²⁵Go tea vea e pakilina e miala, e mamau dakiusi sugoro kovagoro sikai ni nam̃au; go eu soso nagisana ki Esau.

²⁶Go edaku ki tea wanogoe taina e pakilina, go nam̃elearuna e puati nam̃ago natua ni Esau; go nagisana e pei tea sosoana ki Yakob: go Isaak e pei tea ni natau rualima latesa ragi waina e dape ra.

²⁷Go piakiki naanoai wanogoe ero atum̃aki: go Esau e pei naatam̃oli atae navalakoana, naatam̃oli ni namalasi: go Yakob e pei naatam̃oli matemate, e doko tap̃aup̃au maga.

²⁸Go Isaak e dodomi Esau, nalakena e gani tea valakokiana aneana: go Rebekah e dodomi Yakob;

²⁹Go Yakob e peni tea veniana ni pan: go Esau e pae namalasi umai go e manainai:

³⁰Go Esau e noa ki Yakob, e naga, P̃a tua au aga kani seara ni tea miala, tea miala waia, a pavara ni ko asa; nalakena a manainai: nalakena tea wanogoe nagisana e pei tea sosoana ki Edom.

³¹Go Yakob e noa, P̃a sori paki nau masoso tea ni navei‐takalapa‐ana anigo.

³²Go Esau e noa, P̃a leo, kinau a m̃aladigi mate: go aga kasa ki tea ni navei‐takalapa‐ana waia?

³³Go Yakob e noa, P̃a vivisa paki nau masoso; go e pivisa paki nia: go e sori paki Yakob tea ni naveitakalapa‐ana aneana.

³⁴Go Yakob e dua Esau bred go lentil veniana ni pan; go e ganikani po munu, po duleana, po pano: go Esau e midoaki p̃alo ki tea ni navei‐takalapa‐ana aneana.