Read Nguna Togoa Etafe North JENESIS 27 Bible Online

JENESIS 27 - Nguna Togoa Etafe North bible

JENESIS 27

¹Go e pakilina, ragi waina Isaak e pei tea matua, go namatana e kesa, dapala e marisa punusi, naga e soso natuna takalapa Esau, po noa ki nia, e naga, Natugu: go e noa ki nia, e naga, Kinau nea.

²Go e noa, P̃a leo, a pei tea matua, a da atae naaleatia ni namateana aginau mau.

³Go ragi waia p̃a tape, a pavara ni ko, nalikau anigo maga, p̃olaga anigo go naasu anigo, go p̃a tave paki namalasi pano, po maginau palako ki tea valakokiana;

⁴Po maginau mari navinaga lolo, ega tapala waina a masauna, po maginau dape a umai, naga aga kanikani; naga naatagu ega vasa m̃ata ki‐go ragi waina a ko da mate mau.

⁵Go Rebekah e dogo ragi waina Isaak e pasa ki natuna Esau. Go Esau e paki namalasi naga ega valako ki tea valakokiana, naga ega tape a umai.

⁶Go Rebekah e pasa ki natuna Yakob, po naga, P̃a leo, a dogo tamam̃a e pasa ki taim̃a Esau, po naga,

⁷P̃a maginau dape tea valakokiana, po maginau mari navinaga lolo, naga aga kanikani, po pasa m̃ata ki‐go narae ni Yehovah ega vea ki namateana aginau.

⁸Go ragi waia, natugu, p̃a rogo parati ki nadaleogu ega tapala waina kinau a dip̃aki‐go asa.

⁹P̃a vaki navata pano, po maginau dape naninani natuda wia ega rua kakada umai; go aga wo magi tamam̃a mari navinaga lolo, ega tapala waina e masauna:

¹⁰Go p̃a wo dape a umai dua tamam̃a asa, go ega wo ganikani, naga ega vasa m̃ata ki‐go ega vea ki namateana aneana.

¹¹Go Yakob e noa ki p̃ilana Rebekah, e naga, P̃a leo, taigu Esau e pei naatam̃oli uluulua, go kinau a pei naatam̃oli m̃om̃oa.

¹²Mase mama e pe wo dovidogo au, go a pe wo dakiusi tea mari saudoa namatana; go a pe wo piragi navasasakiana sikai paki nau, go a pe wo da piragi navasam̃atakiana sikai mau.

¹³Go p̃ilana e noa ki nia, e naga, Navasasaki‐go‐ana ega toko au doko, natugu: ma p̃a rogo parati ki nadaleogu, go p̃a vano po maginau dape ra umai.

¹⁴Go e pano, po puati ra, po dape ra umai dua p̃ilana ara: go p̃ilana e mari navinaga lolo, dapala waina tamana e masauna.

¹⁵Go Rebekah e dape sugoro wia maga ki natuna takalapa Esau, waina e doko pisari a ekopu ni nasum̃a, po sugoro natuna takariki Yakob ara:

¹⁶Go e soki nawili ni naninani natuna dua wanogoe doko naruna maga, go tea m̃om̃oa ni nanoana:

¹⁷Go e pitua ki navinaga lolo go bred, waina e mari a, paki nam̃elearu ni natuna Yakob.

¹⁸Go e umai punusi tamana po noa, Mama: go e noa, Kinau nea; nigo ku pei sei, natugu?

¹⁹Go Yakob e noa ki tamana, e naga, Kinau a pei Esau tea takalapa anigo; a po mari dapala waina ku noa kinau asa: p̃a toko leana, a pavara ni ko asa, p̃a toko p̃ia po gani tea valakokiana aginau seara, naga naatam̃a ega vasa m̃ata ki nau.

²⁰Go Isaak e noa ki natuna, e naga, Ku po pap̃ai a m̃araverave dapale sava, natugu? Go e noa, Nalakena Yehovah Sup̃e anigo e mari a e pakilina ki nau.

²¹Go Isaak e noa ki Yakob, e naga, P̃a umai paki m̃aladigi, a pavara ni ko asa, naga aga tovidogo ko, natugu, nigo ku pe vei natugu Esau lomau kite ku pe vei tea p̃ota.

²²Go Yakob e paki m̃aladigi ki tamana Isaak; go e dovidogo e, po noa, Nadaleona e pei nadaleo ni Yakob, ma naruna ero pei naru ni Esau.

²³Go e da midoaki p̃otae a mau, nalakena naruna ero uluulua, dakiusi naru ni taina Esau: go e pasa m̃ata ki nia.

²⁴Ma e moro pususu naga, nigo kupei natugu Esau lomau kite? Go e noa, Kinau nea .

²⁵Go e noa, P̃a tape a umai paki m̃aladigi ki nau, go aga wo gani tea valakokiana seara ki natugu, naga naatagu ega vasa m̃ata ki‐go. Go e dape a umai paki m̃aladigi ki nia, go e ganikani: go e maneana dape waine umai, go e munu.

²⁶Go tamana Isaak e noa ki nia, e naga, P̃a umai paki m̃aladigi, a pavara ni ko, po dum̃ili au, natugu.

²⁷Go e umai paki m̃aladigi, po dum̃ili a: go e sidogo nap̃o ni sugoro aneana maga, po pasa m̃ata ki nia, po noa, P̃a vunusi, nap̃o ni natugu E dakiusi nap̃o ni vanua sikai waina Yehovah e po pasa m̃ata ki nia;

²⁸Go Sup̃e ega tua ko nasovaki ni nakoroatelagi, Go nam̃anopunopuana ni maramana, Go korn go waine ega laapa:

²⁹Narei maga euga manigo suasua, Go nalauna maga euga suai natano paki‐go: P̃a vei nawota dap̃au taim̃a maga, Go p̃ilam̃a natuna maga euga suai natano paki‐go: Tea mamau puti waina eu pasasa ki‐go, euga vei tea vasasakiana, Go tea mamau puti waina eu pasa m̃ata ki‐go, euga vei tea vasam̃atakiana.

³⁰Go e pakilina, ragi waina Isaak e pasa m̃ata ki sua Yakob, go Yakob e po dave m̃elu dua ki narae ni tamana Isaak pano, naga taina Esau e pae navalakoana aneana umai paki ekopu.

³¹Go nae ma e mari navinaga lolo, po dape a umai dua tamana asa; go e noa ki tamana, e naga, Mama ega toko leana, po gani tea valakokiana ki natuna, naga naatam̃a ega vasa m̃ata ki nau.

³²Go tamana Isaak e noa ki nia, e naga, Nigo ku pei sei? Go e noa, Kinau a pei natum̃a, tea takalapa anigo, Esau.

³³Go Isaak e durururu ki namatakuana warua sa, po noa, Go sei e po palako ki tea valakokiana, po dape a umai dua au asa, go a po gani kovai puti a ragi waina ku ko da umai mau, go a po pasa m̃ata ki nia? Io, go ega wo pei tea vasam̃atakiana.

³⁴Ragi waina Esau e dogo navasaana maga ki tamana, e kua ki nakuaana warua sa go ni nasusueana warua sa, po noa ki tamana, e naga, P̃a vasa m̃ata ki nau, p̃a moro pasa m̃ata ki nau, mama O.

³⁵Go e noa, Taim̃a e umai pilake nasorosoroana, po dape lua navasam̃atakiana anigo.

³⁶Go e noa, Nagisana e da pei tea soso‐gara‐ana ki Yakob kite? Nalakena e po sielua au paka rua waia: e dape lua tea ni naveitakalapa‐ana aginau; go p̃a leo, ragi waia e po dape lua navasam̃atakiana aginau. Go e noa, Ku da maginau mauti navasam̃atakiana sikai kite?

³⁷Go Isaak e pasadara po noa ki Esau, e naga, P̃a leo, a po mari a e pei nawota anigo, go a po dua e taina mamau puti naga euga maneana suasua; go a po silae a ki korn go waine: go aga wo moro manigo mari nasava, natugu?

³⁸Go Esau e noa ki tamana, e naga, Ku peani navasam̃atakiana sikai maau, mama, kite? P̃a vasa m̃ata ki nau, p̃a moro pasa m̃ata ki nau, mama O. Go Esau e sike nadaleona, po dagi.

³⁹Go tamana Isaak e pasadara po noa ki nia, e naga, P̃a leo, natokoana anigo ega wo doko nam̃anopunopuana ni maramana, Go nasovaki ni nakoroatelagi waina e pae elagi umai;

⁴⁰Go p̃a wo mauri ki lova anigo, go p̃a wo magi taim̃a suasua; Go ragi waina p̃a wo pilakoto, P̃a wo marip̃ori nakau ni nanoa aneana ega m̃elu dua ki nanoam̃a.

⁴¹Go Esau e pilosi Yakob nalakena navasam̃atakiana waina tamana e pasa m̃ata ki nia asa: go Esau e noa nap̃op̃ona, e naga, Naaleatia maga ni nasusue‐mama‐ana eu pei m̃aladigi; ragi wanogoe aga wo maripunue taigu Yakob asa.

⁴²Go navasaana maga ki natuna takalapa Esau e pei tea rogorogokiana paki Rebekah; go e dip̃aki lua po soso natuna takariki Yakob, po noa ki nia, e naga, P̃a leo, taim̃a Esau e dum̃ana pasapakavakale a ako, naga ega maripunue ko.

⁴³Go ragi waia, natugu, p̃a rogo parati ki nadaleogu; go p̃a tuleana, p̃a sava paki Haran pano punusi goregu Laban;

⁴⁴Go p̃a toko sikoti a doko naaleatia seara, pa pa namaritausuana ki taim̃a ega liliu;

⁴⁵Pa pa namaetoana ki taim̃a ega liliu m̃elu dua ki‐go pano, go ega malio ki tea waina ku po mari a paki nia: ragi wanogoe aga wo dip̃aki lua, po piragi ko pae tokora wanogoe umai: ekasana koroga wo dua puoli ki nau ki namateana naaleatia sikai maau?

⁴⁶Go Rebekah e noa ki Isaak, e naga, A mamale ki namauriana aginau nalakena Heth natuna nagoroi maga: Yakob e pe viragi nagoroi sikai ni Heth natuna nagoroi maga, dakiusi tea maga waia, ni nagoroi maga ni navanua, namauriana aginau e pe mari au a pe wia dapale sava?