Read Nguna Togoa Etafe North JENESIS 28 Bible Online

JENESIS 28 - Nguna Togoa Etafe North bible

JENESIS 28

¹Go Isaak e soso Yakob, po pasa m̃ata ki nia, po dip̃aki nia, po noa ki nia, e naga, P̃a ta piragi nagoroi sikai ni nagoroi maga ni Kanaan mau.

²P̃a tuleana, p̃a vaki Padan‐aram pano, paki nasum̃a ki Bethuel p̃ilam̃a tamana; po manigo piragi nagoroi sikai pae tokora wanogoe ni Laban natuna nagoroi maga p̃ilam̃a gorena.

³Go Sup̃e Kasua Mau ega vasa m̃ata ki‐go, po mari ko p̃a wo pavakawora, po mari ko p̃a wo laapa, naga p̃a wo pei taua sikai ni narei maga;

⁴Go ega tua ko navasam̃atakiana ki Abraham, ega vei anigo go agi naworaworam̃a sikoti ko; naga p̃a veani navanua ni nam̃enaki‐atatokoana anigo maga, waina Sup̃e e dua Abraham asa.

⁵Go Isaak e dip̃aki lua Yakob: go e paki Padan‐aram pano punusi Laban, natu ni Bethuel nawora ni Aram, gore ni Rebekah, Yakob go Esau p̃ilada.

⁶Go Esau e punusi naga Isaak e pasa m̃ata ki Yakob po dip̃aki lua e paki Padan‐aram, naga ega viragi nagoroi sikai pae tokora wanogoe; go naga ragi waina e pasa m̃ata ki nia e dip̃aki nia, po noa, P̃a ta piragi nagoroi sikai ni nagoroi maga ni Kanaan mau;

⁷Go naga Yakob e dogo parati ki tamana go p̃ilana, po paki Padan‐aram pano:

⁸Go Esau e punusi naga nagoroi maga ni Kanaan eu sa namata ni tamana Isaak;

⁹Go Esau e pano punusi Ishmael, po piragi sokari nagoroi dua waina e peani sua ra Mahalath natu ni Ishmael natu ni Abraham, gore ni Nebaioth, naga ega vei anagoroi.

¹⁰Go Yakob e m̃elu dua ki Beer‐sheba, po surata pano naga ega vaki Haran.

¹¹Go e pa parati ki tokora sikai, po m̃enaki asa nap̃ogiana mamau, nalakena elo e musu; go e dape vatu maga sikai kakada ni tokora wanogoe, po p̃aua asa, po one natano tokora wanogoe naga ega maturu.

¹²Go e p̃erea, go p̃a leo napua vavadu sikai e lawodu natano, go nap̃auna e paki nakoroatelagi: go p̃a leo agelo maga ki Sup̃e eu do sake po do siwo asa.

¹³Go p̃a leo, Yehovah e lawodu elagi ki nia, po noa, Kinau a pei Yehovah, Sup̃e ki tamam̃a Abraham, go Sup̃e ki Isaak: navanua waina ku one asa, aga wo dua mu ma naworaworam̃a asa;

¹⁴Go naworaworam̃a euga wo dakiusi nam̃otam̃ota ni natano, go p̃a wo peravera paki west, go paki ist, go paki north, go paki sauth: go nimu ma naworaworam̃a naworawora mamau puti ni maramana euga wo pei tea vasam̃atakiana mu.

¹⁵Go p̃a leo, kinau a sikoti ko doko, go aga wo pavaigoro ko nasurataana anigo mamau puti, go aga wo moro piragi ko liliu umai paki navanua waia; nalakena aga wo da doropusi ko mau, pa pa aga wo mari tea waina a po pasa ki‐go asa.

¹⁶Go Yakob e darapa m̃elu dua ki namaturuana aneana, go e noa, Yehovah e doko tokora waia lomau; go kinau a da atae a mau.

¹⁷Go e mataku, po noa, Tokora waia e pei tokora mataukiana pa! Tokora waia e pei nasum̃a ki Sup̃e e da pei tea p̃ota mau, go tokora waia e pei namata‐pua ni nakoroatelagi.

¹⁸Go Yakob e duleana malip̃ogi sa, po dape vatu waina e p̃aua asa, po sike a naga ega vei tea lawodu, po daki naroro nap̃auna.

¹⁹Go e soso nagisa ni tokora wanogoe ki Beth‐el: ma nagisa ni natokoana wanogoe sala vea e pei Lus.

²⁰Go Yakob e sai nasaiana sikai, po noa, Sup̃e e pe wo sikoti au doko, po pavaigoro au napua waia waina a pae asa pano, po dua au navinaga waina aga kani a, go sugoro waina aga suni a,

²¹Dapala a pe wo moro liliu umai paki nasum̃a ki mama natam̃ateana, go Yehovah e pe wo pei Sup̃e aginau,

²²Go vatu waia, waina a po sike a naga ega vei tea lawodu, e pe wo pei nasum̃a ki Sup̃e: go tea mamau puti waina p̃a wo dua au ara, a pe wo dua ko kerualima kakada lomau.