Read Nguna Togoa Etafe North JENESIS 29 Bible Online

JENESIS 29 - Nguna Togoa Etafe North bible

JENESIS 29

¹Go Yakob e surata pano, po umai paki navanua ki naka ni ist.

²Go e leo punusi, po p̃a leo m̃oru noai sikai e doko namalasi, go p̃a leo, navata dolu ni shiip eu one pisari a tokora wanogoe; nalakena eu dua navata maga eu munu noai ni m̃oru noai wanogoe: go vatu waina e one nawoka ni m̃oru noai e p̃arua.

³Go navata mamau puti eu pei tea saisaikiana paki tokora wanogoe: go eu malulua ki vatu m̃elu dua ki nawoka ni m̃oru noai, po dua shiip maga eu munu, po moro doropusi vatu naliana nawoka ni m̃oru noai.

⁴Go Yakob e noa ki da, e naga, Taigu maga, nimu ku pei tea ni esava? Go eu noa, Kinami au pei tea ni Haran.

⁵Go e noa ki da, e naga, Ku atae Laban natu ni Nahor kite? Go eu noa, Au atae a.

⁶Go e noa ki da, e naga, Nae e p̃ia kite? Go eu noa, E p̃ia: go p̃a leo, natuna Rahel e puati shiip maga umai.

⁷Go e noa, P̃a leo, naaleatia e ko parau doko, go e ko da pei ragi waina katel maga euga vei tea saisaikiana mau: kuga tua shiip maga euga munu, go kuga vano po dua ra euga kanikani.

⁸Go eu noa, Au marisa mari a, pa pa navata mamau puti eu pei tea saisaikiana, go eu malulua ki vatu m̃elu dua ki nawoka ni m̃oru noai; ragi wanogoe au dua shiip maga eu munu.

⁹Ragi waina e ko do pasa ki da, Rahel e umai e puati shiip maga ki tamana; nalakena nae e leo parati ki da.

¹⁰Go e pakilina, ragi waina Yakob e punusi Rahel natu ni Laban gore ni p̃ilana, go shiip maga ki Laban gore ni p̃ilana, naga Yakob e paki m̃aladigi, po malulua ki vatu m̃elu dua ki nawoka ni m̃oru noai, po dua navata ki Laban gore ni p̃ilana eu munu.

¹¹Go Yakob e dum̃ili Rahel, po sike nadaleona, po dagi.

¹²Go Yakob e noakisai Rahel naga nae e pei tai ni tamana, go naga nae e pei natu ni Rebekah: go e sava po noakisai tamana asa.

¹³Go e pakilina, ragi waina Laban e dogo narogorogoana ni Yakob natu ni gorena, naga e sava naga ega sua e, po doti a, po dum̃ili a, po piragi a umai paki nasum̃a aneana. Go e dogorogo paki Laban ki naleo mamau puti wanogoe.

¹⁴Go Laban e noa ki nia, e naga, Ku pei navatugu go nap̃okasigu lomau. Go e doko sikoti a doko atelagi sikai.

¹⁵Go Laban e noa ki Yakob, e naga, Nalakena ku pei taigu, p̃a wo maginau suasua m̃oli kite? P̃a noakisai au, namoriana anigo ega vei nasava?

¹⁶Go Laban e peani natuna nagoroi dua: nagisa ni tea takalapa Leah, go nagisa ni tea takariki Rahel.

¹⁷Go namata ni Leah e manainai; ma Rahel e pei tea lom̃atakiana nap̃atokona go naraena.

¹⁸Go Yakob e dodomi Rahel; go e noa, Aga wo manigo suasua natau larua raki Rahel natum̃a takariki.

¹⁹Go Laban e noa, A pe tua naatam̃oli p̃ota asa e pe wia kiki, a pe tua ko asa e pe wia p̃arua: p̃a toko sikoti au doko.

²⁰Go Yakob e suasua natau larua raki Rahel; go eu dakiusi naaleatia visa maau namatana, nalakena nadodomiana aneana paki nia.

²¹Go Yakob e noa ki Laban, e naga, P̃a tua au nagoroi aginau, nalakena naaleatia aginau maga eu nopu, naga aga va punusi a.

²²Go Laban e piragi saisai ki puti naatam̃oli maga ni tokora wanogoe, po mari nakaniana sikai.

²³Go e pakilina ragi waina e maligo, naga e puati natuna Leah po piragi a umai punusi a; go e pa punusi a.

²⁴Go Laban e pitua ki tea suasua nagoroi aneana Silpah paki natuna Leah naga ega vei tea suasua nagoroi aneana.

²⁵Go e pakilina malip̃ogi naga, p̃a leo, nae e pei Leah: go e noa ki Laban, e naga, Nasava waia ku po mari a paki nau? A da manigo suasua raki Rahel kite? Go ekasana ku po soro au?

²⁶Go Laban e noa, Eu da mari dapala nogoe tokora aginami mau, naga euga vitua ki tea takariki ega vea ki tea takalapa.

²⁷P̃a vakavuro wiik ki tea waia, go auga wo moro dua ko kerua nalakena nasuasuaana waina p̃a wo moro maginau suasua asa natau larua kerua.

²⁸Go Yakob e mari dapala nogoe, po pakavuro wiik aneana: go e dua e natuna Rahel naga ega vei anagoroi.

²⁹Go Laban e dua natuna Rahel tea suasua nagoroi aneana Bilhah naga ega vei tea suasua nagoroi aneana.

³⁰Go e moro pa punusi Rahel, go e dodomi p̃arua ki Rahel, e dodomi kiki ki Leah, go e ko maneana suasua natau larua kerua.

³¹Go Yehovah e punusi naga Leah e pei tea vilosiana, go e p̃olagati nap̃elena: ma Rahel e dim̃o.

³²Go Leah e diena, po dape natuna naanoai sikai, go e soso nagisana ki Reuben: nalakena e noa, Nalakena Yehovah e po punusi narogokitesaana aginau; nalakena ragi waia naanoai aginau ega wo dodomi au.

³³Go e moro diena, po dape natuna naanoai sikai; po noa, Nalakena Yehovah e dogo naga a pei tea vilosiana, go e po moro dua au tea waia; go e soso nagisana ki Simeon.

³⁴Go e moro diena, po dape natuna naanoai sikai; po noa, Sala waia naanoai aginau ega wo puluti au, nalakena a po maneana dape natuna naanoai dolu: nalakena tea wanogoe nagisana e pei tea sosoana ki Levi.

³⁵Go e moro diena, po dape natuna naanoai sikai: go e noa, Sala waia aga wo samasamani Yehovah: nalakena tea wanogoe e soso nagisana ki Yudah; go e makoto ki natapeana.