Read Nguna Togoa Etafe North JENESIS 3 Bible Online

JENESIS 3 - Nguna Togoa Etafe North bible

JENESIS 3

¹Go m̃aata e mari manumatua liu sara nalo mila ni namalasi waina Yehovah Sup̃e e mari ra. Go e noa ki nagoroi, e naga, Sup̃e e po noa naga, Koroga ta gani sara nakau ni roara kite?

²Go nagoroi e noa ki m̃aata, e naga, Nawa ni nakau maga ni roara aroga kani a.

³Ma nawa ni nakau waina e doko m̃aleoputo ni roara, Sup̃e e po noa, Koroga ta gani a mau, go koroga ta kisidogo e mau, koro pe mate.

⁴Go m̃aata e noa ki nagoroi, e naga, Koroga wo da mate lomau mau:

⁵Nalakena Sup̃e e atae naga naaleatia waina koro pe kani a, namatamu ero pe wo pei tea wolagatiana, go koro pe wo dakiusi Sup̃e, koro pe wo atae nawiaana go nasaana.

⁶Go ragi waina nagoroi e punusi naga nakau wanogoe e p̃ia ki navinaga, go naga e pei tea lom̃atakiana, go naga e pei nakau masauana raki namanumatuaana, e dape nawana seara, po ganikani; go e dua anawota waina e sikoti a, go nae e ganikani.

⁷Go namata ni nara dua ero pei tea wolagatiana, go ero atae naga ero m̃alam̃ala; go ero duri saisai ki naulu ni napuliva, po dum̃ada madeada mari nam̃asere maga.

⁸Go ero dogo nadaleo ni Yehovah Sup̃e e surata roara nasau ni naaleatia: go naatam̃oli go anagoroi ero dokoloku padua ki narae ni Yehovah Sup̃e m̃aleoputo ni nakau maga ni roara.

⁹Go Yehovah Sup̃e e pioso paki naatam̃oli, po noa ki nia, e naga, Nigo wai?

¹⁰Go e naga, A dogo nadaleom̃a roara, go a mataku, nalakena a m̃alam̃ala; go a dokoloku.

¹¹Go e naga, Sei e noakisai ko naga ku m̃alam̃ala? Nigo ku po gani nakau waina a dip̃agoro ko asa, naga p̃a ta gani a mau kite?

¹²Go naatam̃oli e noa, Nagoroi waina ku pitua ki nia naga ega sikoti au doko, nae e dua au nakau wanogoe, go a ganikani.

¹³Go Yehovah Sup̃e e noa ki nagoroi, e naga, Nasava waia ku po mari a? Go nagoroi e noa, M̃aata e surue au, go a ganikani.

¹⁴Go Yehovah Sup̃e e noa ki m̃aata, e naga, Nalakena ku po mari tea waia, ku pei tea vasasakiana warua liu sara katel, go sara nalo mila ni namalasi; p̃a wo soka ki nap̃elem̃a, go p̃a wo gani nam̃otam̃ota sara naaleatia ni namauriana anigo:

¹⁵Go aga wo lawo ki navivilosiana namawota kakamu ma nagoroi, go namawota ni naworam̃a go ni naworana: nae ega wo papua nap̃aum̃a go nigo p̃a wo kati nam̃ago ni natuana.

¹⁶E noa ki nagoroi, e naga, Aga wo mari narogokitesaana anigo go natienaana anigo eroga wo laapa; p̃a wo dape piakiki maga pilake narogokitesaana; go namasauana anigo ega wo paki am̃awota, go nae ega wo maramara dap̃au ko.

¹⁷Go e noa ki Adam, e naga, Nalakena ku po dogo parati ki nadaleo ni am̃agoroi, po gani nakau waina a dip̃agoro ko asa, po noa, P̃a ta gani a mau: natano e pei tea vasasakiana nalakena nigo; p̃a wo p̃osiwosi asa raki nakaniana sara naaleatia ni namauriana anigo;

¹⁸Go ega wo manigo dape tea vivitip̃a maga go tea makalikali maga; go p̃a wo gani nataputea ni namalasi;

¹⁹P̃a wo gani navinaga pilake natorotoroana ni naraem̃a, pa pa p̃a wo liliu paki natano; waina ku pei tea tapeana m̃elu asa umai: nalakena ku pei nam̃otam̃ota, go p̃a wo liliu paki nam̃otam̃ota.

²⁰Go naatam̃oli e soso nagisa ni anagoroi ki Havah; nalakena e pei p̃ila ni tea mauri mamau puti.

²¹Go Yehovah Sup̃e e magi Adam go anagoroi mari sugoro maga ni nawili, po sugoro ra asa.

²²Go Yehovah Sup̃e e noa, P̃a leo, naatam̃oli e po dakiusi gida sikai, e atae nawiaana go nasaana; go ragi waia, e pe sai ki nam̃elearuna po moro dape nakau ni namauriana, po ganikani, po mauri pa pa e pe tu du po du mau du:

²³Go Yehovah Sup̃e e dip̃aki lua e m̃elu dua ki roara ni Eden, naga ega kili natano waina e pei tea tapeana m̃elu asa umai.

²⁴Go e kopasi naatam̃oli paki etaku; go e mari Kerub maga eu doko taleva ni elo sake ni roara ni Eden, go lova sikai ni mena ni nakapu, waina e do dum̃ana doa e naga ega vavaigoro napua ni nakau ni namauriana.