Read Nguna Togoa Etafe North JENESIS 30 Bible Online

JENESIS 30 - Nguna Togoa Etafe North bible

JENESIS 30

¹Go ragi waina Rahel e punusi naga e da magi Yakob dapetape mau, Rahel e doitoi taina; go e noa ki Yakob, e naga, P̃a tua au piakiki maga, kite ku pe ta dua au mau kinau a pe mate.

²Go namaetoana ki Yakob e pavaga dip̃a Rahel: go e noa, Kinau a doko oli Sup̃e, waina e po mauti ko nawa ni nap̃elem̃a kite?

³Go e noa, P̃a leo tea suasua nagoroi aginau Bilhah, p̃a va punusi a; go ega wo dapetape nap̃atuagu, go kinau ma aga wo pei tea tavagiana pae asa.

⁴Go e dua e tea suasua nagoroi aneana Bilhah naga ega vei anagoroi: go Yakob e pa punusi a.

⁵Go Bilhah e diena, po magi Yakob dape natuna naanoai sikai.

⁶Go Rahel e noa, Sup̃e e po pasap̃otae au, go e po dogo nadaleogu, po dua au natugu naanoai sikai: nalakena tea wanogoe e soso nagisana ki Dan.

⁷Go Bilhah tea suasua nagoroi ki Rahel e moro diena, po magi Yakob dape natuna naanoai kerua.

⁸Go Rahel e noa, Kinami ma taigu aro dum̃agami pau gami napauana kasua maga ki Sup̃e, go a po marimatua: go e soso nagisana ki Naftali.

⁹Ragi waina Leah e punusi naga e makoto ki natapeana, e puati Silpah tea suasua nagoroi aneana, po dua Yakob asa, naga ega vei anagoroi.

¹⁰Go Silpah tea suasua nagoroi ki Leah e magi Yakob dape natuna naanoai sikai.

¹¹Go Leah e noa, Taua sikai e umai!

¹²Go e soso nagisana ki Cad. Go Silpah tea suasua nagoroi ki Leah e magi Yakob dape natuna naanoai kerua.

¹³Go Leah e noa, A maropa! Nalakena natuda nagoroi maga euga wo soso au ki tea maropa: go e soso nagisana ki Asher.

¹⁴Go Reuben e pano naaleatia maga ni natagaukotoviana ni whiit, po pap̃ai nawa ni dudai maga namalasi, po dape a umai dua p̃ilana Leah asa. Go Rahel e noa ki Leah, e naga, P̃a tua au dudai seara ki natum̃a, a pavara ni ko asa.

¹⁵Go e noa ki nia, e naga, Ku po dape lua naanoai aginau, tea wanogoe e kiki kite? Go ku naga p̃a moro dape lua dudai maga ki natugu kite? Go Rahel e noa, Nalakena tea wanogoe ega wo one sikoti ko p̃ogi waia raki dudai maga ki natum̃a.

¹⁶Go Yakob e pae namalasi umai ragi melu, go Leah e dave pano naga ega sua e, go e noa, E one ako one naga p̃a umai punusi au; nalakena a po pakotovi ko lomau ki dudai maga ki natugu. Go e one sikoti a nap̃ogiana wanogoe.

¹⁷Go Sup̃e e daki dorogo Leah, go e diena, po magi Yakob dape natuna naanoai kelima.

¹⁸Go Leah e noa, Sup̃e e po dua au namoriana aginau, nalakena a dua naanoai aginau tea suasua nagoroi aginau: go e soso nagisana ki Issakar.

¹⁹Go Leah e moro diena, po magi Yakob dape natuna naanoai kelatesa.

²⁰Go Leah e noa, Sup̃e e po dua au navituaana wia sikai; ragi waia naanoai aginau ega wo doko sikoti au doko, nalakena a po maneana dape natuna naanoai latesa: go e soso nagisana ki Sebulun.

²¹Go e edaku dape natuna nagoroi sikai, po soso nagisana ki Dinah.

²²Go Sup̃e e midoa ki Rahel, go Sup̃e e dogo parati ki nia, po p̃olagati nap̃elena.

²³Go e diena, po dape natuna naanoai sikai: po noa, Sup̃e e po dape lua namidoakidao‐au‐ana:

²⁴Go e soso nagisana ki Yosef, e naga, Yehovah ega sokari au ki natugu naanoai p̃ota sikai.

²⁵Go e pakilina, ragi waina Rahel e dape sua Yosef, naga Yakob e noa ki Laban, e naga, P̃a tip̃aki lua au naga aga vaki tokora aginau, go navanua aginau pano.

²⁶P̃a tua au nagoroi aginau maga go natugu maga waina a po manigo suasua raki da, go aga vano: nalakena nigo ku atae nasuasuaana aginau waina a manigo suasua asa.

²⁷Go Laban e noa ki nia, e naga, A pe wo pap̃ai nasaup̃iaana namatam̃a, p̃a ko du: nalakena a midoa ki nia naga Yehovah e po pasa m̃ata ki nau nalakena nigo.

²⁸Go e noa, P̃a noap̃otae namoriana anigo waina e one au one, go aga wo pitua ki nia.

²⁹Go e noa ki nia, e naga, Nigo ku atae dapala waina a manigo suasua, go dapala waina katel anigo maga eu doko ragi waina a leo parati ki da.

³⁰Nalakena ku peani tea kiki e pea ki a umai, go e po p̃arua pa pa e po laapa sa; go Yehovah e po pasa m̃ata ki‐go edaku ki a umai: go ragi waia kinau aga wo magi nasum̃a aginau p̃osiwosi seve ragi?

³¹Go e noa, Aga tua ko nasava? Go Yakob e noa, P̃a ta dua au te navatuna mau: ku pe wo maginau mari naleo waia, a pe wo moro pakale navata anigo po leo parati ki da.

³²Aga wo pa duaduru navata mamau anigo masoso, po piragi lua tea mamau puti waina eu pei karakaratia go waina eu pei wotuwotu kiada, go tea loa mamau puti ni shiip, go tea wotuwotu maga go tea karakaratia maga ni naninani: go tea tapala nogoe euga vei namoriana aginau.

³³Go namarinaleoleanaana aginau ega wo maginau pasadara ragi edaku, waina p̃a wo umai asa nalo ni namoriana aginau waina e doko naraem̃a: tea mamau puti ni naninani waina eu da pei karakaratia go waina eu da pei wotuwotu mau, go tea mamau puti ni shiip waina eu da loa mau, eu pe sikoti au doko eu pe vei tea midoakiana naga eu pei tea vanakoana.

³⁴Go Laban e noa, P̃a leo, a masauna naga ega tapala waina ku po noa e.

³⁵Go e piragi lua naaleatia wanogoe naninani anoai maga waina eu pei napuapua go wotuwotu, go naninani goroi mamau puti waina eu pei karakaratia go wotuwotu, tea mamau puti waina tea tare seara e doko ara, go tea loa maga ni shiip, po pitua ki da paki nam̃elearu ni natuna naanoai maga;

³⁶Go e mari nasurataana ni naaleatia dolu e doko namawota kakada ma Yakob: go Yakob e pakale navata p̃ota maga ki Laban.

³⁷Go Yakob e dape nakau kiki maga ni poplar, go ni lus go ni armon: po soe napua tare maga ara, po mari tea tare waina e doko nakau kiki maga eu dokolina.

³⁸Go e lawo ki nakau kiki maga waina e soe ra eu doko narae ni navata maga nap̃ap̃a maga go siloa maga waina navata maga eu rumai paki asa naga euga munu; go eu atulake natienaana ragi waina eu rumai naga euga munu.

³⁹Go navata maga eu atulake natienaana narae ni nakau kiki maga, go navata maga eu dape tea waina eu pei napuapua, go karakaratia, go wotuwotu.

⁴⁰Go Yakob e piragi lua natuda maga, po mari narae ni navata maga eu doko p̃ai tea waina eu pei napuapua go tea loa mamau puti ni navata ki Laban; go e mari navata aneana maga eu doko mamau, e da mari ra eu pilake navata ki Laban mau.

⁴¹Go e pakilina, ragi waina tea kasua maga ni navata eu atulake natienaana, naga Yakob e doropusi nakau kiki maga narae ni namata maga ni navata nap̃ap̃a maga, naga euga atulake natienaana m̃aleoputo ni nakau kiki maga;

⁴²Ma ragi waina navata eu manainai, e da doropusi ra mau: go tea manainai maga eu pei tea ki Laban, go tea kasua maga eu pei tea ki Yakob.

⁴³Go naatam̃oli wanogoe e p̃ora po p̃arua sa, po peani navata warua maga, go tea suasua nagoroi maga go tea suasua naanoai maga, go katel maga go ass maga.