Read Nguna Togoa Etafe North JENESIS 31 Bible Online

JENESIS 31 - Nguna Togoa Etafe North bible

JENESIS 31

¹Go e dogo navasaana maga ki Laban natuna naanoai maga, eu noa, Yakob e po dape lua tea mamau puti waina eu pei tea ki tamagida; go e po mari nasamasamaana mamau waia ki tea waina e pei tea ki tamagida.

²Go Yakob e punusi narae ni Laban, go p̃a leo, e da dakiusi sala vea paki nia mau.

³Go Yehovah e noa ki Yakob, e naga, P̃a liliu paki navanua ki tamam̃a maga, po pa punusi namatarau anigo maga: go aga wo sikoti ko doko.

⁴Go Yakob e dip̃aki lua po soso Rahel go Leah ero umai paki namalasi paki navata aneana,

⁵Go e noa ki da, e naga, Kinau a punusi narae ni tamamu, naga e da dakiusi sala vea paki nau mau; ma Sup̃e ki mama e po sikoti au doko.

⁶Go nimu koro atae naga a magi tamamu suasua ki nakasuaana aginau mamau,

⁷Go tamamu e soro au, po mari namoriana aginau e pano p̃ota paka rualima sikai; ma Sup̃e e da suasua ki nia naga ega mari sa ki nau mau.

⁸E pe noa dapala waia, e pe naga, Tea karakaratia maga euga vei namoriana anigo; go navata mamau eu pe tape tea karakaratia: go e pe noa dapala waia, e pe naga, Tea napuapua maga euga vei namoriana anigo; go navata mamau eu pe tape tea napuapua.

⁹Go Sup̃e e po dape lua katel maga ki tamamu, po dua au ara.

¹⁰Go e pakilina ragi waina navata eu atulake natienaana, naga a sike namatagu, po punusi pae nap̃erea sikai, go p̃a leo, naninani anoai maga waina eu darup̃a navata eu pei napuapua, go karakaratia, go kapukapu.

¹¹Go agelo ki Sup̃e e noa ki nau pae nap̃erea wanogoe, e naga, Yakob: go a naga, Kinau nea.

¹²Go e noa, P̃a sike namatam̃a, po punusi, naninani anoai mamau puti waina eu darup̃a navata eu pei napuapua, go karakaratia, go kapukapu: nalakena a punusi tea mamau puti waina Laban e mari a paki‐go.

¹³Kinau a pei Sup̃e ni Beth‐el, tokora waina ku puvurai ki vatu lawodu sikai asa, tokora waina ku sai nasaiana sikai paki nau asa: tea wanogoe, p̃a tuleana, p̃a m̃elu dua ki navanua waia pano, po liliu paki navanua waina ku pakilina asa.

¹⁴Go Rahel go Leah ero pasadara po noa ki nia, ero naga, Te matele sikai kite tea veanipiolikiana sikai e ko maginami doko nasum̃a ki tamagami kite?

¹⁵E da midoa ki nia naga aro pei nam̃enaki kite? Nalakena e sori gami, go e moro gani puti m̃ane aginami.

¹⁶Nalakena nasogolapaana mamau puti waina Sup̃e e po dape lua e ki tamagami, e pei tea anigida go agi natugida maga: go tea wanogoe, tea mamau puti waina Sup̃e e po noa ki‐go asa, p̃a mari a.

¹⁷Go Yakob e duleana, po pusake natuna maga go anagoroi maga eu doko kamel maga;

¹⁸Go e piragi lua puti katel aneana, go naloriki aneana mamau puti waina e dalua ra, katel maga waina e pakotovi ra, waina e dalua ra Padan‐aram, naga ega va punusi tamana Isaak paki navanua ni Kanaan pano.

¹⁹Go Laban e pano naga ega alati shiip aneana maga: go Rahel e panako terafim waina eu pei tea ki tamana.

²⁰Go Yakob e pano panako ki Laban nawora ni Aram pano, e da noakisai a mau naga ega sava pano.

²¹Go e sava pano nara ma tea mamau puti waina e peani ra; go e duleana, po duagoto Noaisara, po leo pa raki tava ni Kilead.

²²Go e pei tea noasaiana paki Laban naaleatia ketolu naga Yakob e sava pano.

²³Go e piragi taina maga eu sikoti a, po sava dausi a nasurataana ni naaleatia larua; go e pa parati ki nia tava ni Kilead.

²⁴Go Sup̃e e umai punusi Laban nawora ni Aram nap̃erea sikai ni p̃ogi, po noa ki nia, e naga, P̃a tum̃am̃a pavaigoro ko naga p̃a ta noa ki Yakob te navatuna sa mau.

²⁵Go Laban e pa parati ki Yakob. Go Yakob e lawo ki tap̃aup̃au aneana tava: go Laban go taina maga eu lawo ki tap̃aup̃au adeada tava ni Kilead.

²⁶Go Laban e noa ki Yakob, e naga, Ku po mari nasava, waina ku po pano panako ki nau pano, po piragi lua natugu nagoroi maga eu dakiusi tea viragi‐lua‐pavakotoana maga ki lova?

²⁷Ekasana ku sava panako pano, po pano panako ki nau pano; po da noakisai au asa mau, naga a pe tip̃aki lua ko ki nalaelaeaana go ki nalegaana maga, ki tabret go ki harp;

²⁸Go ku da suasua ki nau naga aga tum̃ili natugu naanoai maga go natugu nagoroi maga mau? Ku po mari manumatavusa ragi waia.

²⁹Nam̃elearugu e kasua naga ega mari sa ki mu: ma Sup̃e ki tamamu e pasa ki nau p̃ogi ni nanova, po naga, P̃a tum̃am̃a pavaigoro ko naga p̃a ta noa ki Yakob te navatuna sa mau.

³⁰Go ragi waia, ku po pano, nalakena ku masau p̃arua ki nasum̃a ki tamam̃a, ma ekasana ku po panako sup̃e aginau maga?

³¹Go Yakob e pasadara po noa ki Laban, e naga, Nalakena a mataku: nalakena a noa, Ku pe vuati lua pavakoto natum̃a nagoroi maga kiagu.

³²Naata waina ku pe vap̃ai sup̃e anigo maga eu pe sikoti a doko, ega ta mauri mau: narae ni taigida maga p̃a leop̃otae tea waina e pei tea anigo waina e sikoti au doko, go p̃a tape lua e. Ma Yakob e da atae mau naga Rahel e panako ra.

³³Go Laban e paki ekopu ni tap̃aup̃au ki Yakob, go ni tap̃aup̃au ki Leah, go ni tap̃aup̃au ki tea suasua nagoroi dua; ma e da pap̃ai ra mau. Go e dave tap̃aup̃au ki Leah, po paki ekopu ni tap̃aup̃au ki Rahel.

³⁴Go Rahel e dape terafim, po doropusi ra eu sili naloriki maga ni kamel, po dasake ara. Go Laban e dovidogo usuraki tap̃aup̃au mamau, ma e da pap̃ai ra mau.

³⁵Go e noa ki tamana, e naga, Nawota aginau ega ta maeto mau nalakena a pe ta duleana naraem̃a mau, nalakena a sua naleo ki nagoroi maga. Go e laaga ma e da pap̃ai terafim mau.

³⁶Go Yakob e maeto, po pasa kasua ki Laban: go Yakob e pasadara po noa ki Laban, e naga, Nasava e pei natapiriana aginau? Nasava e pei namarinaleosaana aginau, naga ku po sava dausi au?

³⁷Nalakena ku po dovidogo sara naleo aginau, ku po pap̃ai nasava ni naleo maga ni nasum̃a anigo? P̃a toropusi a nea narae ni taigida maga, naga euga vasap̃otae namawota kakagida toro dua.

³⁸Natau rualima dua waia a sikoti ko doko; shiip goroi anigo maga go naninani goroi anigo maga eu da pisola sa mau, go tea anoai maga ni navata anigo maga a da gani ra mau.

³⁹Tea katip̃oraeana ki nalo mila maga a da dape a umai dua ko asa mau; kinau a dua oli dua ko asa; e pe vei tea vanakoana aleati kite e pe vei tea vanakoana p̃ogi, ku pe tatago asa paki nam̃elearugu.

⁴⁰A dapala waia doko; navivitinuana e gani au aleati, go namaladiana e gani au p̃ogi; go namaturuana aginau e sava dua ki namatagu pano.

⁴¹Natau rualima dua waia a doko nasum̃a anigo; a manigo suasua natau rualima sikai tamate pati raki natum̃a nagoroi dua, go natau latesa raki navata anigo: go ku mari namoriana aginau e pano p̃ota paka rualima sikai.

⁴²Sup̃e ki mama, Sup̃e ki Abraham, go Tea Mataukiana ki Isaak, e pe ta sikoti au doko mau, ku pe alagoro dip̃aki lua au a pe p̃alo pano. Sup̃e e punusi narogokitesaana aginau go nawosiana ni nam̃elearugu, po pasa kasua ki‐go p̃ogi ni nanova.

⁴³Go Laban e pasadara po noa ki Yakob, e naga, Nagoroi maga waia eu pei natugu nagoroi maga, go piakiki naanoai maga waia eu pei piakiki naanoai aginau maga, go navata maga waia eu pei navata aginau maga, go tea mamau puti waina nigo ku punusi ra eu pei tea aginau maga: go natugu nagoroi maga waia aga mari nasava paki da masoso, kite paki natuda maga waina eu po dape ra?

⁴⁴Go ragi waia p̃a umai, toroga mari navasasokiana sikai, kinau go nigo; go ega vei tea noasokisoki namawota kakagida.

⁴⁵Go Yakob e dape vatu sikai, po sike a e pei tea lawodu.

⁴⁶Go Yakob e noa ki taina maga, e naga, Kuga vilae saisai ki vatu maga; go eu dape vatu maga, po mari taua sikai: go eu ganikani tokora wanogoe pisari taua.

⁴⁷Go Laban e soso e ki Yekar‐sahudutha: ma Yakob e soso e ki Caleed.

⁴⁸Go Laban e noa, Taua waia e pei tea noasokisoki namawota kakagida masoso. Nalakena tea wanogoe nagisana e pei tea sosoana ki Caleed:

⁴⁹Go Mispah, nalakena e noa, Yehovah ega vavai namawota kakagida, ragi waina toroga wo dum̃agida puoli ki gida.

⁵⁰Ku pe mari natugu nagoroi dua ero pe rogokitesa, go ku pe viragi nagoroi seara sokari natugu nagoroi dua, te naata e da sikoti gida doko mau; p̃a vunusi, Sup̃e e pei tea noasokisoki namawota kakagida.

⁵¹Go Laban e noa ki Yakob, e naga, P̃a leo taua waia, go p̃a leo vatu lawodu, waina a po lawo ki nia namawota kakagida.

⁵²Taua waia ega vei tea noasokisoki, go vatu lawodu ega vei tea noasokisoki, naga kinau aga wo da liu taua waia punusi ko, go naga nigo p̃a wo da liu taua waia go vatu lawodu waia punusi au, naga toroga tum̃agida mari sa ki gida mau.

⁵³Sup̃e ki Abraham, go Sup̃e ki Nahor, Sup̃e ki tamada, ega vasap̃otae namawota kakagida. Go Yakob e pivisa pae Tea Mataukiana ki tamana Isaak.

⁵⁴Go Yakob e pitua ki naviriana sikai tava wanogoe, po soso taina maga naga euga kani navinaga: go eu gani navinaga, po m̃enaki tava wanogoe.

⁵⁵Go Laban e duleana malip̃ogi sa, po dum̃ili natuna naanoai maga go natuna nagoroi maga, po pasa m̃ata ki da: go Laban e pano, po liliu paki tokora aneana pano.