Read Nguna Togoa Etafe North JENESIS 33 Bible Online

JENESIS 33 - Nguna Togoa Etafe North bible

JENESIS 33

¹Go Yakob e sike namatana, po leopunusi, go p̃a leo, Esau e umai, go naatam̃oli p̃onotia pati eu sikoti a umai. Go e dap̃otae piakiki maga paki Leah, go paki Rahel, go paki tea suasua nagoroi dua.

²Go e lawo ki tea suasua nagoroi go piakiki adeada maga eu pea, go Leah go piakiki aneana maga eu dausi ra, go Rahel go Yosef ero edaku mau.

³Go nae e surata duagoto e pea ki da, po kolo suai natano paka larua, pa pa e umai paki m̃aladigi ki taina.

⁴Go Esau e sava naga ega sua e, go e doti a, po dowo nanoana, po dum̃ili a: go ero dum̃ada dagisi ra.

⁵Go e sike namatana, po punusi nagoroi maga go piakiki maga; go e noa, Tea maga wanana anigo eu pei sei maga? Go e noa, Piakiki maga waina Sup̃e e po saup̃ia ki tea suasua anigo ara.

⁶Go tea suasua nagoroi ero umai paki m̃aladigi, nara ma piakiki adeada maga, po kolo suai natano.

⁷Go Leah ma go piakiki aneana maga eu rumai paki m̃aladigi, po kolo suai natano: go Yosef e po edaku umai paki m̃aladigi nara ma Rahel, go ero kolo suai natano.

⁸Go e noa, P̃a kasa ki taua mamau waia waina a sua ra? Go e noa, Naga aga vap̃ai nasaup̃iaana namata ni nawota aginau.

⁹Go Esau e noa, A peani tea laapa; taigu, tea waina ku peani a ega vei tea anigo.

¹⁰Go Yakob e noa, Ee, a pe wo pap̃ai nasaup̃iaana namatam̃a, p̃a tape, a pavara ni ko asa, nadodomiana aginau ki nam̃elearugu: nalakena waia, a po punusi naraem̃a, dakiusi a pe vunusi narae ni Sup̃e, go ku po maro au.

¹¹P̃a tape, a pavara ni ko asa, navasam̃atakiana aginau waina e manigo pei tea viragiana umai; nalakena Sup̃e e po saup̃ia ki nau, go nalakena a peani sara naleo. Go e pasadie a asa, go e dape a.

¹²Go e noa, Tuga rakai, go tuga vano, go aga wo do pea ki‐go pano.

¹³Go e noa ki nia, e naga, Nawota aginau e atae naga piakiki maga eu manainai, go naga navata maga ni shiip go ni naninani go navata maga ni kau waina a piragi ra eu pakasusu: go eu pe kopasi kasua ki da naaleatia sikai navata mamau eu pe mate.

¹⁴Nawota aginau ega surata duaduru pano ega vea ki tea suasua aneana, a pavara ni ko asa: go kinau aga wo purasa surata, ega vataka ni natua ni katel maga waina eu pea kinau, go ega vataka ni natua ni piakiki maga, pa pa aga wo paloti punusi ko Seir.

¹⁵Go Esau e noa, Aga manigo doropusi naatam̃oli seara waina eu sikoti au. Go e noa, Ekasana? Aga vap̃ai nasaup̃iaana namata ni nawota aginau.

¹⁶Go Esau e liliu naaleatia wanogoe naga ega vaki Seir pano.

¹⁷Go Yakob e surata paki Sukkoth, po davagi nasum̃a aneana sikai, go e magi katel aneana maga mari tap̃aup̃au maga: nalakena tea wanogoe nagisa ni tokora wanogoe e pei tea sosoana ki Sukkoth.

¹⁸Go Yakob e umai natam̃ateana paki natokoana ki Shekem, waina e doko navanua ni Kanaan, ragi waina e pae Padan‐aram umai; go e sike tap̃aup̃au aneana narae ni natokoana.

¹⁹Go e pakotovi matele ni natano waina e pukesi tap̃aup̃au aneana asa, paki nam̃elearu ni Hamor natuna maga, Shekem tamana, ki matele ni m̃ane p̃onotia sikai.

²⁰Go e lawo ki wede ni naviriana sikai tokora wanogoe, po soso e ki El‐elohe‐Israel.