Read Nguna Togoa Etafe North JENESIS 34 Bible Online

JENESIS 34 - Nguna Togoa Etafe North bible

JENESIS 34

¹Go Dinah, Leah natuna nagoroi, waina e magi Yakob dape a, e pano naga ega vunusi nagoroi maga ni navanua.

²Go Shekem, natu ni Hamor nawora ni Hivah, nawota ni navanua, e punusi a; go e puati a, po one sikoti a, po mari sa ki nia.

³Go naatana e puluti Dinah, Yakob natuna nagoroi, go e dodomi naatara wanogoe, po pasa m̃om̃oa ni naatara wanogoe.

⁴Go Shekem e pasa ki tamana Hamor, po noa, P̃a maginau piragi naatara waia ega vei nagoroi aginau.

⁵Go Yakob e dogo naga e mari natuna nagoroi Dinah e loa; go natuna naanoai maga eu doko raki katel aneana maga namalasi: go Yakob e punuta doko pa pa eu rumai.

⁶Go Hamor, Shekem tamana, e pano punusi Yakob naga ega vusum̃aki paki nia.

⁷Go Yakob natuna naanoai maga eu pae namalasi umai ragi waina eu dogo e: go naatam̃oli maga wanogoe nap̃op̃oda e dogokitesa asa, go eu maeto p̃arua, nalakena e mari navei‐lala‐ana doko Israel, nalo ni e one sikoti Yakob natuna nagoroi; waina e da pei tea waina ega mari a mau.

⁸Go Hamor e pasa paki da, po noa, Naata ni natugu naanoai e puluti natumu nagoroi: kuga tua e asa ega vei anagoroi, a pavara ni mu asa.

⁹Go kuga vitua paki gami euga laki; kuga tua gami natumu nagoroi maga, go kuga tum̃amu manimu piragi natugami nagoroi maga.

¹⁰Go kuga wo doko sikoti gami doko: go navanua ega wo doko narae mu; kuga toko asa doko po pakokoto asa, go kuga tape tea veaniana maga asa.

¹¹Go Shekem e noa ki tamana go gorena maga, e naga, Aga vap̃ai nasaup̃iaana namatamu, go aga wo pitua ki tea waina kuga wo noa ki nau asa.

¹²Kuga tatagovi au ki navakokotoana warua go ki navituaana warua, go aga wo pitua ega tapala waina kuga wo noa ki nau asa: ma kuga tua au naatara wanogoe ega vei nagoroi aginau.

¹³Go Yakob natuna naanoai maga eu pasadara Shekem go tamana Hamor ki nasorosoroana, po pasa, nalakena e mari goreda Dinah e loa, po noa ki da,

¹⁴Eu naga, Au mari sa mari naleo wanogoe, waina auga vitua ki goregami paki naata waina e da pei tea tovadaviviana mau; nalakena tea wanogoe e pei tea waina au pe vei tea dododaoana asa:

¹⁵Naleo sikai maau e doko waina ku pe mari a au pe suasua ki tea waina ku masauna: ku pe wo dakiusi gami po pei tea tovadaviviana sara naanoai kakamu;

¹⁶Kinami ma au pe wo dua mu natugami nagoroi maga, go au pe wo piragi natumu nagoroi maga, go au pe wo doko sikoti mu doko, go tu pe wo pei narei sikai maau.

¹⁷Ma ku pe wo da dogo parati ki gami mau, naga kuga vei tea tovadaviviana; au pe wo puati natugami nagoroi, go au pe wo pano.

¹⁸Go navasaana adeada e p̃ia namata ni Hamor, go namata ni Shekem, Hamor natuna.

¹⁹Go natureai wanogoe e da mari daliali mau naga ega mari naleo wanogoe, nalakena e dodomi Yakob natuna nagoroi: go e pei tea dodomadaganiana warua liu tea mamau puti ni nasum̃a ki tamana.

²⁰Go Hamor go natuna Shekem ero umai paki namata‐pua ni natokoana adeada, po pasa paki naatam̃oli maga ni natokoana adeada,

²¹po noa, Naatam̃oli maga waia eu datam̃ate paki gami; go euga wo doko navanua, po pakokoto asa; go p̃a leo, navanua e p̃arua narae da; tuga viragi natuda nagoroi maga euga vei nagoroi anigida maga, go tuga tua ra natugida nagoroi maga.

²²Naleo sikai maau e doko waina tu pe mari a naatam̃oli maga wanogoe eu pe suasua naga euga toko sikoti gida doko, naga euga vei narei sikai maau, sara naanoai kakagida eu pe vei tea tovadaviviana, dakiusi waina nara eu pei tea tovadaviviana.

²³Katel adeada maga go naleo veaniana adeada maga go nalo tuavati warua adeada mamau puti euga wo da pei tea anigida kite? Tuga suasua ki nia, go euga wo doko sikoti gida doko.

²⁴Go tea mamau puti waina eu pae namata‐pua ni natokoana aneana paki etaku eu dogo parati ki Hamor go ki natuna Shekem; go sara naanoai eu pei tea tovadaviviana, tea mamau puti waina eu pae namata‐pua ni natokoana aneana paki etaku.

²⁵Go naaleatia ketolu, ragi waina eu pitinu, Yakob natuna maga tea rua kakada, Simeon go Levi, Dinah gorena maga, ero puati lova adeada, po piviari umai paki natokoana, po maripunue puti naanoai maga.

²⁶Go ero maripunue Hamor go natuna Shekem ki nawoka ni lova, po piragi lua Dinah m̃elu dua ki nasum̃a ki Shekem, po pano.

²⁷Yakob natuna maga eu rumai paki tea maripunueana maga, po dapepavakoto natokoana, nalakena eu mari goreda e loa.

²⁸Eu dape navata maga ni shiip go ni naninani adeada go navata maga ni kau adeada go ass adeada maga, go tea maga waina e doko natokoana, go tea maga waina e doko namalasi;

²⁹Go eu dape lua pavakoto naleo veaniana adeada mamau puti, go piakirikiri adeada mamau puti go nagoroi adeada maga, po dape pavakoto tea mamau puti waina e doko nasum̃a.

³⁰Go Yakob e noa ki Simeon go Levi, e naga, Koro po mari duletulea ki nau, po mari au aga vei tea p̃oa m̃aleoputo ni naatatoko maga ni navanua, m̃aleoputo ni naworawora ni Kanaan go m̃aleoputo ni naworawora ni Peris: go kinau, a pei tea visa maau, go euga wo saisai po atugi au; go aga wo pei tea maripuolikiana, kinau go nasum̃a aginau.

³¹Go eu naga, Ega mari goregami ega takiusi nagoroi masausara kite?