Read Nguna Togoa Etafe North JENESIS 38 Bible Online

JENESIS 38 - Nguna Togoa Etafe North bible

JENESIS 38

¹Go e pakilina ragi wanogoe, naga Yudah e siwo pano m̃elu dua ki taina maga, po dawasi punusi naatam̃oli sikai ni Adullam, nagisana Hirah.

²Go tokora wanogoe Yudah e punusi nagoroi sikai natu ni naatam̃oli sikai ni naworawora ni Kanaan waina nagisana e pei Shua; go e piragi a, po pa punusi a.

³Go e diena, po dape piakiki naanoai sikai; go tamana e soso nagisana ki Er.

⁴Go e moro diena, po dape piakiki naanoai sikai; go p̃ilana e soso nagisana ki Onan.

⁵Go e moro sokari a po dape piakiki naanoai sikai, po soso nagisana ki Shelah: go tamana e doko Kesib ragi waina p̃ilana e dape a.

⁶Go Yudah e magi natuna takalapa Er piragi nagoroi sikai, go nagisana e pei Tamar.

⁷Go Er, Yudah natuna takalapa, e sigisigileo namata ni Yehovah; go Yehovah e mari punue a.

⁸Go Yudah e noa ki Onan, e naga, P̃a va punusi taim̃a anagoroi, po maneana mari tea waina e one naanoai aneana taina one naga ega mari a, po magi taim̃a mari natuna ega vakilina.

⁹Go Onan e atae naga natuna wanogoe ega ta pei tea aneana mau; go ragi waina e pa punusi taina anagoroi, e daki nia paki natano, naga ega ta dua taina natuna mau.

¹⁰Go tea waina e mari a e sa namata ni Yehovah: go e moro mari punue a.

¹¹Go Yudah e noa ki sulina Tamar, e naga, P̃a ko pei malepu doko po doko nasum̃a ki tamam̃a doko, pa pa natugu Shelah ega wo p̃arua; nalakena e noa, Nae e pe moro mate, dakiusi taina maga. Go Tamar e pano po doko nasum̃a ki tamana doko.

¹²Go te ragi Shua natuna nagoroi, Yudah anagoroi, e mate; go Yudah e pei tea vasakorokoroana sua, po sake pano punusi tea maga waina eu maneana alati shiip aneana maga Timnah, nara ma tana ri Hirah ni Adullam ero dua.

¹³Go eu noa ki Tamar, eu naga, P̃a leo, atiam̃a e sake paki Timnah pano naga ega alati shiip aneana maga.

¹⁴Go e sawolua sugoro ni navei‐malepu‐ana maga kiana, po dum̃ana kulugoro e ki nakulukulu taugororae aneana, po dum̃ana kulugoro e, po do natano namata‐pua ni Enaim, waina e doko pisari napua waina e paki Timnah; nalakena e punusi naga Shelah e po p̃arua, go e da pei tea vituakiana paki nia naga ega vei anagoroi mau.

¹⁵Go Yudah e punusi a, go e midoa ki nia naga e pei nagoroi masausara sikai; nalakena e kulugoro naraena.

¹⁶Go e dawasi punusi a e doko pisari napua, po noa, Ita, aga valoti punusi ko, a pavara ni ko asa: nalakena e da atae naga e pei sulina mau. Go e noa, P̃a wo dua au nasava naga p̃a umai punusi au?

¹⁷Go e noa, Aga wo manigo dip̃aki lua naninani natuna sikai ni navata ni naninani paloti. Go e noa, P̃a wo dua au nanadisokiana sikai pa pa p̃a wo dip̃aki lua e umai kite?

¹⁸Go e noa, Aga tua ko nasava ega vei nanadisokiana? Go e noa, Tea vulusoki anigo go natali anigo, go tiko anigo waina e doko nam̃elearum̃a. Go e dua e ara, po pa punusi a, go e diena pae asa.

¹⁹Go e duleana, po pano, po sawolua nakulukulu taugororae kiana, po suni sugoro maga ni navei‐malepu‐ana aneana.

²⁰Go Yudah e dip̃aki lua naninani natuna sikai ni naninani maga pano pae nam̃elearu ni tana ri ni Adullam, naga ega tape nanadisokiana aneana ki nam̃elearu ni nagoroi wanogoe: ma e da pap̃ai a mau.

²¹Go e pusuusu paki naatam̃oli maga ni tokora aneana, e naga, Nagoroi masausara wai waina e doko Enaim doko pisari napua? Go eu noa, Te nagoroi masausara e da doko nea mau.

²²Go e liliu umai punusi Yudah, po noa, A da pap̃ai a mau; go naatam̃oli maga ni tokora waina eu noa, Te nagoroi masausara e da doko nea mau.

²³Go Yudah e noa, Ega mauti a, naga tuga ta pei tea dododaoana mau: p̃a leo, a dip̃aki lua naninani natuna waia pano, go ku da pap̃ai a mau.

²⁴Go e pakilina ragi waina atelagi dolu e nopu, naga e pei tea noasaiana paki Yudah, eu naga, Sulim̃a Tamar e po maripele; go p̃a leo, e diena pae namaripeleana. Go Yudah e noa, Kuga viragi a dave, go ega vei tea tap̃arakiana.

²⁵Ragi waina e pei tea viragiana dave, e dip̃aki lua pa punusi atiana, po noa, Kinau a magi naata waina e peani tea maga waia diena: go e noa, P̃a leo atae tea maga waia, a pavara ni ko asa, tea vulusoki, go natali maga, go tiko, eu pei tea ki sei?

²⁶Go Yudah e leo atae ra, po noakisai ra, e naga, E leana liu au; nalakena waia a da pitua ki nia paki natugu Shelah mau. Go e da moro atae a mau te naaleatia.

²⁷Go e pakilina ragi ni navisolaana aneana, naga p̃a leo, nedue ero doko nap̃elena.

²⁸Go e pakilina, ragi waina e pisola, naga sikai e sai ki nam̃elearuna: go nagoroi waina e maneana pisola, e dape nalolu miala sikai po likoti a nam̃elearuna, po noa, Tea waia e pea pakilina.

²⁹Go e pakilina, ragi waina e dosalua nam̃elearuna, naga p̃a leo, taina e pakilina: go e noa, Ekasana ku po dum̃am̃a manigo mari sai? Nalakena tea wanogoe nagisana e pei tea sosoana ki Peres.

³⁰Go taina e edaku pakilina, waina nalolu miala e doko nam̃elearuna: go nagisana e pei tea sosoana ki Serah.