Read Nguna Togoa Etafe North JENESIS 4 Bible Online

JENESIS 4 - Nguna Togoa Etafe North bible

JENESIS 4

¹Go naatam̃oli e atae anagoroi Havah; go e diena, po dape Kain, po noa, A po dalua naatam̃oli naanoai sikai, Yehovah e silae au asa.

²Go e moro dape taina Hebel. Go Hebel e pei tea leoparati ki shiip maga, ma Kain e pei tea kili natano.

³Go ragi waina naaleatia maga eu nopu, Kain e dape nawa ni natano seara umai e pei navituaana paki Yehovah.

⁴Go Hebel, nae ma e dape tea takalapa seara ni navata aneana, go tea m̃anopunopu kakada. Go Yehovah e leo punusi Hebel go navituaana aneana:

⁵Ma e da leo punusi Kain go navituaana aneana mau. Go Kain e maeto p̃arua, go naraena e datanako.

⁶Go Yehovah e noa ki Kain, e naga, Ekasana ku maeto? Go ekasana naraem̃a e datanako?

⁷Ku pe mari p̃ia, p̃a wo da pei tea viragiana kite? Go ku pe ta mari p̃ia mau, namarinaleosaana e pe one pisari namata: go namasauana aneana ega wo paki‐go, go p̃a wo maramara dap̃au asa.

⁸Go Kain e noa ki taina Hebel asa. Go ragi waina ero doko namalasi, Kain e duleana dip̃a taina Hebel, po maripunue a.

⁹Go Yehovah e noa ki Kain, e naga, Taim̃a Hebel wai? Go e naga, A da atae a mau: kinau a pei tea leoparati ki taigu kite?

¹⁰Go e naga, Ku po mari nasava? Nadaleo ni nada ni taim̃a e do kuapioso pae natano paki nau.

¹¹Go ragi waia nigo ku pei tea vasasakiana pae natano, waina e po p̃olagati nawokana naga ega tape nada ni taim̃a pae nam̃elearum̃a.

¹²Ragi waina p̃a wo kili natano, ega wo da moro pitua ki nakasuaana aneana paki‐go mau; p̃a wo pei tea sava pano go tea vanovano maramana.

¹³Go Kain e noa ki Yehovah, e naga, Navaratiau‐ana e p̃arua liu tea waina a mariatae dapetape a.

¹⁴P̃a leo, ku po kopasi au masoso m̃elu dua ki narae ni natano; go aga wo pei tea tokoloku m̃elu dua ki naraem̃a; go aga wo pei tea sava pano go tea vanovano maramana; go ega wo pakilina, naga tea maga waina euga wo pap̃ai au euga wo maripunue au.

¹⁵Go Yehovah e noa ki nia, e naga, Nalakena tea wanogoe, tea maga waina eu pe wo maripunue Kain, eu pe wo pei tea sikoana paka larua. Go Yehovah e magi Kain mari navaivaiana sikai, naga te naata e pe vap̃ai a, e pe ta atugi a mau.

¹⁶Go Kain e m̃elu dua ki narae ni Yehovah pano, po doko navanua ni Nod, taleva ni elo sake ni Eden.

¹⁷Go Kain e atae anagoroi; go e diena, po dape Hanok: go e davagi natokoana sikai, po soso nagisa ni natokoana wanogoe pae nagisa ni natuna, Enok.

¹⁸Go Irad e magi Enok pakilina: go Irad e pesi Mehuyael: go Mehuyael e pesi Methushael: go Methushael e pesi Lamek.

¹⁹Go Lamek e piragi nagoroi dua: nagisa ni tea sikai Adah, go nagisa ni kerua Sillah.

²⁰Go Adah e dape Yabal: nae e pei tama ni tea maga waina eu doko tap̃aup̃au maga po peani katel maga.

²¹Go nagisa ni taina e pei Yubal: nae e pei tama ni tea maga waina eu puati harp go lokore.

²²Go Sillah nae ma e dape Tubal‐kain, tea mari sara naleo totova ni brass go ni airon: go gore ni Tubal‐kain e pei Naamah.

²³Go Lamek e noa ki anagoroi maga, e naga: Adah go Sillah koroga rogo nadaleogu; Nagoroi maga ki Lamek, koroga taki dorogo nanoaana aginau: Nalakena a po maripunue naatam̃oli sikai nalakena e mari au a pei wotu, Go natureai sikai nalakena e mari au a maratirati:

²⁴E pe magi Kain pei tea sikoana paka larua, E pe magi Lamek paka rualima larua tamate larua.

²⁵Go Adam e moro atae anagoroi, go e dape natuna naanoai sikai, po soso nagisana ki Seth; Nalakena, e noa, Sup̃e e po maginau mari natugu naanoai p̃ota sikai e du oli Hebel: waina Kain e maripunue a.

²⁶Go magi Seth, natuna naanoai sikai e maneana ma pakilina; go e soso nagisana ki Enosh: ragi wanogoe naatam̃oli maga eu atulake soso nagisa ni Yehovah.