Read Nguna Togoa Etafe North JENESIS 43 Bible Online

JENESIS 43 - Nguna Togoa Etafe North bible

JENESIS 43

¹Go navitoloana e p̃arua navanua.

²Go ragi waina eu gani puti sua korn waina eu dape a pae Ityipt umai, tamada e noa ki da, e naga, Kuga moro pano, po manigida pakotovi navinaga kiki seara.

³Go Yudah e pasa ki nia, po naga, Naatam̃oli waina e noasokisoki paki gami, po naga, Taimu e pe ta sikoti mu doko mau, ku pe ta punusi naraegu mau.

⁴Ku pe tip̃aki lua taigami e pe sikoti gami pano, au pe wo siwo pano po manigo pakotovi navinaga:

⁵Ma ku pe ta dip̃aki lua e mau, au pe ta siwo pano mau: nalakena naatam̃oli waina e noa ki gami, e naga, Taimu e pe ta sikoti mu doko mau, ku pe wo da punusi naraegu mau.

⁶Go Israel e noa, Ekasana ku mari sa ki nau dapala ku noakisai naatam̃oli waina naga ku peani taimu sikai e ko doko?

⁷Go eu noa, Naatam̃oli waina e pusuusu ki parati ki gami, go ki namatarau aginami, po noa, Tamamu e ko mauri doko kite? Ku peani taimu sikai kite? Go au noakisai a dapala navasaana maga wanogoe: au pe mariatae atae dapale sava naga e pe wo noa, Kuga viragi taimu ega siwo umai?

⁸Go Yudah e noa ki tamana Israel, e naga, P̃a tip̃aki lua natureai ega sikoti au pano, go auga wo duleana po pano, naga tuga mauri, po da mate mau, kinami go nigo go piakirikiri aginami maga.

⁹Kinau aga wo maneana pei tea tapegoro; p̃a wo datago asa paki nam̃elearugu: a pe ta piragi a umai punusi ko mau, po da lawo ki nia naraem̃a mau, a pe vei tea marinaleosa paki‐go asa naaleatia mamau puti:

¹⁰Nalakena au pe ta mari daliali mau, au pe liliu sua umai sala kerua ragi waia lomau.

¹¹Go tamada Israel e noa ki da, e naga, E pe tapala nogoe lomau, kuga mari tea waia; kuga tape tea samasamaniana seara ni navanua ega toko lasa animu maga, go kuga magi naatam̃oli waina dape nadodomiana sikai siwo pano, naroro lolo kiki, go honi kiki, tea ni nap̃o wia go napulu lolo, nagae, go amond:

¹²Go kuga tape m̃ane ega ruarua ega toko nam̃elearumu pano; go m̃ane waina e pei tea vituakiana liliu nawoka ni sak animu maga, kuga moro dape a liliu ega toko nam̃elearumu pano; mase e pei namarisap̃oana:

¹³Kuga viragi taimu ma, go kuga tuleana, po moro pano punusi naatam̃oli waina:

¹⁴Go Sup̃e Kasua Mau ega tua mu nadodomiana narae ni naatam̃oli waina naga ega manimu dip̃aki lua taimu p̃ota go Benyamin. Go kinau natugu maga eu pe vuoli ki nau ki namateana, eu pe vuoli.

¹⁵Go naatam̃oli maga wanogoe eu dape nadodomiana wanogoe, go eu dape m̃ane duarua e doko nam̃elearuda, go Benyamin; po duleana, po siwo paki Ityipt pano, po lawodu narae ni Yosef.

¹⁶Go ragi waina Yosef e punusi Benyamin e sikoti ra doko, e noa ki naatam̃oli waina e dap̃au nasum̃a aneana, e naga, P̃a viragi naatam̃oli maga waia paki ekopu ni nasum̃a, go p̃a mari punue, po mariusi daoni; nalakena naatam̃oli maga waia euga wo ganikani sikoti au aleati matua.

¹⁷Go naatam̃oli wanogoe e mari dapala waina Yosef e noa e; go naatam̃oli wanogoe e piragi naatam̃oli maga wanogoe paki ekopu ni nasum̃a ki Yosef.

¹⁸Go naatam̃oli maga wanogoe eu mataku, nalakena eu pei tea viragiana paki ekopu ni nasum̃a ki Yosef, go eu noa, Tu pei tea viragiana paki ekopu nalakena m̃ane waina e pei tea vituakiana liliu nawoka ni sak anigida maga sala vea; naga ega tum̃ana malulua ki nia paki gida, po dowo gida, po puasoki gida naga tuga vei naviti aneana maga, go ass anigida maga.

¹⁹Go eu rumai paki m̃aladigi ki naatam̃oli waina e dap̃au nasum̃a ki Yosef, go eu pasa ki nia namata ni nasum̃a,

²⁰Po noa, Au pavara, nawota O, au siwo umai lomau sala vea naga auga vakotovi navinaga:

²¹Go e pakilina, ragi waina au rumai paki tokora ni nam̃enakiana, naga au peresi sak aginami maga, go p̃a leo, m̃ane ki sara naatam̃oli e doko nawoka ni sak adeada sarasara ra, m̃ane mamau aginami:

²²Go au po dape m̃ane p̃ota sikai e doko nam̃elearugami siwo umai naga auga vakotovi navinaga: au da atae sei e doropusi m̃ane aginami sak aginami maga mau.

²³Go e noa, Kuga veani natam̃ateana, kuga ta mataku mau: Sup̃e animu, go Sup̃e ki tamamu, e dua mu naleo tauakiana e doko sak animu maga: m̃ane animu e umai paki nau. Go e piragi Simeon dave umai punusi ra.

²⁴Go naatam̃oli wanogoe e piragi naatam̃oli maga wanogoe paki ekopu ni nasum̃a ki Yosef, po dua ra noai, go eu sarue natuada; go e dua ass adeada maga nakaniana.

²⁵Go eu mari m̃ata ki nadodomiana wanogoe e doko raki naumaiana ki Yosef aleati matua: nalakena eu dogo naga euga wo gani navinaga tokora wanogoe.

²⁶Go ragi waina Yosef e umai paki nasum̃a, eu maneana dape nadodomiana waina e doko nam̃elearuda umai paki ekopu ni nasum̃a, po kolo suai natano paki nia.

²⁷Go e pusuusu paki da ki natam̃ateana adeada, po noa, Tamamu e peani natam̃ateana, tea matua waina ku noa ki nau asa kite? E ko mauri doko kite?

²⁸Go eu noa, Tea suasua anigo tamagami e peani natam̃ateana, e ko mauri doko. Go eu kolo suai natano.

²⁹Go e sike namatana, po punusi taina Benyamin p̃ilana natuna, po noa, Tea waia e pei taimu takariki, waina ku noa ki nau asa kite? Go e noa, Sup̃e ega saup̃ia ki‐go koto.

³⁰Go Yosef e mari m̃araverave; nalakena namaritana e m̃aem̃ae paki taina: go e laaga tokora waina ega tagi asa; go e sili em̃ago aneana, po dagi asa.

³¹Go e sarue namatana, po dave umai; go e dum̃ana soki a, po noa, Kuga toropusi navinaga.

³²Go eu maneana doropusi a doko mamau, po madeada doropusi eu doko mamau, po magi naka ni Ityipt, waina eu mamau ganikani, doropusi eu doko mamau: nalakena naka ni Ityipt eu pe ta gani navinaga sikoti naworawora ni Heberu mau; nalakena tea wanogoe e pei tea mamaragokiana ki naka ni Ityipt.

³³Go eu dasake naraena, tea takalapa e doko dakiusi navei‐takalapa‐ana aneana, go tea takariki e doko dakiusi navei‐takariki‐ana aneana: go naatam̃oli maga wanogoe eu maga dum̃ada paki da.

³⁴Go e dape po madeada dip̃aki lua nawata maga pae naraena: ma nawata ki Benyamin e p̃arua liu tea adeada maga paka lima. Go eu munu, po laelaea sikoti a.