Read Nguna Togoa Etafe North JENESIS 45 Bible Online

JENESIS 45 - Nguna Togoa Etafe North bible

JENESIS 45

¹Go Yosef e marisa dum̃ana soki a narae ni tea mamau puti waina eu lawodu pisari a; go e pioso, e naga, Kuga mari sara naatam̃oli euga tave m̃elu dua ki nau pano. Go te naatam̃oli sikai e da lawodu sikoti a mau, ragi waina e dum̃ana mari a e pei tea ataeana ki taina maga.

²Go e dagi kasua: go naka ni Ityipt eu dogo e, go nasum̃a ki Faraoh eu dogo e.

³Go Yosef e noa ki taina maga, e naga, Kinau a pei Yosef; mama e ko mauri doko kite? Go taina maga eu marisa pasadara e; nalakena eu m̃anaunau naraena.

⁴Go Yosef e noa ki taina maga, e naga, Kuga umai paki m̃aladigi ki nau, a pavara ni mu asa. Go eu rumai paki m̃aladigi. Go e noa, Kinau a pei taimu Yosef, waina ku sori a paki Ityipt.

⁵Go ragi waia kuga ta dogokitesa mau, go kuga ta dum̃amu maeto ki mu mau, nalakena ku sori au paki tokora waia: nalakena Sup̃e e dip̃aki lua au a pea ki mu raki namauti‐namauriana‐ana.

⁶Nalakena navitoloana e po doko navanua natau dua waia: go natau lima eu ko puoli, waina nasisi‐natano‐ana go natagaukotoviana eroga wo da doko ara mau.

⁷Go Sup̃e e dip̃aki lua au a pea ki mu naga ega mari mu kuga vei namagovai mauri ni tea mate maga maramana, go naga ega mauti mu kuga mauri doko ki navualuaana warua sikai.

⁸Go tea wanogoe e da pei nimu mau waina ku dip̃aki lua au umai, ma e pei Sup̃e: go e po mari au a magi Faraoh pei tamana sikai, go nawota ni nasum̃a mamau aneana, go tea maramara dap̃au navanua mamau ni Ityipt.

⁹Kuga mari m̃araverave, po sake pano punusi mama, po noa ki nia naga, Natum̃a Yosef e noa dapala waia, e naga, Sup̃e e po mari au a pei nawota ni Ityipt mamau: p̃a siwo umai punusi au, p̃a ta mari daliali mau:

¹⁰Go p̃a wo doko navanua ni Coshen, go p̃a wo pei m̃aladigi ki nau, nigo go natum̃a maga, go natum̃a maga natuda maga, go navata ni shiip go ni naninani anigo maga, go navata ni kau anigo maga, go tea mamau puti waina ku peani ra:

¹¹Go aga wo pakale ko tokora wanogoe; nalakena natau lima ni navitoloana eu ko puoli; naga p̃a ta dika sara naleo mau, nigo go tea ni nasum̃a anigo, go tea mamau puti waina ku peani ra.

¹²Go kuga leo, namatamu eu punusi, go namata ni taigu Benyamin, naga e pei nawokagu waina e pasa ki mu.

¹³Go kuga noakisai mama nasamasamaana aginau mamau puti Ityipt, go tea mamau puti waina ku po punusi a; go kuga mari m̃araverave po piragi mama ega siwo umai paki nea.

¹⁴Go e dowo nanoa ni taina Benyamin, po dagi: go Benyamin e dagi nanoana.

¹⁵Go e dum̃ili taina maga mamau puti, po dagi ara: go edaku ki tea wanogoe taina maga eu pasa ki nia.

¹⁶Go narogorogoana kakana e pei tea rogoana nasum̃a ki Faraoh, eu noa, Yosef taina maga eu po umai: go e pei tea wia namata ni Faraoh, go namata ni tea suasua aneana maga.

¹⁷Go Faraoh e noa ki Yosef, e naga, P̃a noa ki taim̃a maga, p̃a naga, Kuga mari tea waia; kuga tuatua nalo tuavati animu maga, po pano, kuga vaki navanua ni Kanaan pano;

¹⁸Go kuga viragi tamamu go tea ni nasum̃a animu maga, go kuga umai punusi au: go aga wo dua mu nawiaana ni navanua ni Ityipt, go kuga wo gani nam̃aladua ni navanua.

¹⁹Go nigo ku pei tea tip̃akiana, kuga mari tea waia; kuga tape kart maga pae navanua ni Ityipt agi piakirikiri animu maga, go agi nagoroi animu maga, go kuga viragi tamamu, go kuga umai.

²⁰Go namatamu euga ta susue naleo veaniana animu maga mau; nalakena nawiaana ni navanua mamau ni Ityipt e pei tea animu.

²¹Go Israel natuna maga eu mari dapala nogoe: go Yosef e dua ra kart maga, dakiusi waina Faraoh e noa e, go e dua ra navinaga ni napua.

²²E dua puti ra sugoro ni na‐suni‐oli‐ana maga sarasara ra; ma e dua Benyamin silver p̃onotia dolu, go sugoro ni na‐suni‐oli‐ana elima.

²³Go e magi tamana dip̃aki lua tea tapala waia; ass rualima sikai waina eu ovaova naloriki wia maga ni Ityipt, go ass goroi rualima sikai waina eu ovaova korn go nakoau go navinaga agi tamana raki napua.

²⁴Go e dip̃aki lua taina maga, go eu pano: go e noa ki da, e naga, Kuga ta pile napua mau.

²⁵Go eu sake m̃elu dua ki Ityipt pano, po umai paki navanua ni Kanaan punusi tamada Yakob.

²⁶Go eu noakisai a, eu naga, Yosef e ko mauri doko, go e pei tea maramara dap̃au navanua mamau ni Ityipt. Ma nap̃op̃ona e maladi, nalakena e da saralomau navasaana adeada mau.

²⁷Go eu noa ki nia navasaana mamau puti ki Yosef, waina e noa ki da asa: go ragi waina e punusi kart maga waina Yosef e dip̃aki lua ra naga euga musagi a ara, naata ni tamada Yakob e mauri:

²⁸Go Israel e noa, Te lapa; natugu Yosef e ko mauri doko: aga wo pano punusi a ega vea ki aga wo mate.