Read Nguna Togoa Etafe North JENESIS 46 Bible Online

JENESIS 46 - Nguna Togoa Etafe North bible

JENESIS 46

¹Go Israel e dakai po surata pano nara ma tea mamau puti waina e peani ra, po umai paki Beer‐sheba, po pitua ki naviriana maga paki Sup̃e ki tamana Isaak.

²Go Sup̃e e pasa ki Israel navunusiana maga ni p̃ogi, po noa, Yakob, Yakob.

³Go e noa, Kinau nea. Go e noa, Kinau a pei Sup̃e, Sup̃e ki tamam̃a: p̃a ta mataku siwo paki Ityipt pano mau; nalakena aga wo mari ko p̃a wo pei nalauna warua tokora wanogoe:

⁴Kinau aga wo siwo sikoti ko paki Ityipt pano; go kinau aga wo moro piragi ko sake umai lomau: go Yosef ega wo doropusi nam̃elearuna namatam̃a.

⁵Go Yakob e duleana m̃elu dua ki Beer‐sheba pano: go Israel natuna naanoai maga eu musagi tamada Yakob, go piakirikiri adeada maga, go nagoroi adeada maga, kart maga waina Faraoh e dip̃aki lua ra naga euga musagi a ara.

⁶Go eu piragi katel adeada maga, go naloriki adeada maga, waina eu dalua ra navanua ni Kanaan, po umai paki Ityipt, Yakob go naworaworana mamau puti eu mamau pano:

⁷Natuna naanoai maga, nara ma natuda naanoai maga eu mamau pano, natuna nagoroi maga, go natuna naanoai maga natuda nagoroi maga, go naworaworana mamau puti e piragi ra eu sikoti a umai paki Ityipt pano.

⁸Go tea maga waia eu pei nagisa maga ni Israel natuna maga, waina eu rumai paki Ityipt, Yakob go natuna naanoai maga: Reuben, Yakob natuna takalapa.

⁹Go Reuben natuna naanoai maga; Hanok, go Pallu, go Hesron, go Karmi.

¹⁰Go Simeon natuna naanoai maga; Yemuel, go Yamin, go Ohad, go Yakin, go Sohar, go Shaul natu ni nagoroi sikai ni naworawora ni Kanaan.

¹¹Go Levi natuna naanoai maga; Cershom, Kohath, go Merari.

¹²Go Yudah natuna naanoai maga; Er, go Onan, go Shelah, go Peres, go Serah: ma Er go Onan ero mate navanua ni Kanaan. Go Peres natuna naanoai maga ero pei Hesron go Hamul.

¹³Go Issakar natuna naanoai maga; Tola, go Puvah, go Iob, go Shimron.

¹⁴Go Sebulun natuna naanoai maga; Sered, go Elon, go Yahleel.

¹⁵Tea maga wanogoe eu pei Leah natuna naanoai maga, waina e magi Yakob dape ra Padan‐aram, nara ma natuna nagoroi Dinah: natuna naanoai maga go natuna nagoroi maga eu mamau puti pei naatam̃oli rualima dolu tamate dolu.

¹⁶Go Cad natuna naanoai maga; Sifion, go Hakki, Shuni, go Esbon, Eri, go Arodi, go Areli.

¹⁷Go Asher natuna naanoai maga; Imnah, go Ishvah, go Ishvi, go Beriah, go goreda Serah: go Beriah natuna naanoai maga; Heber, go Malkiel.

¹⁸Tea maga wanogoe eu pei Silpah natuna naanoai maga, waina Laban e dua natuna nagoroi Leah asa, go e magi Yakob dape tea maga wanogoe, naatam̃oli rualima sikai tamate latesa.

¹⁹Rahel natuna naanoai maga Yakob anagoroi; Yosef go Benyamin.

²⁰Go Manasseh go Efraim ero magi Yosef pakilina navanua ni Ityipt, waina Asenath natu ni Poti‐fera tea viri ni On e maneana dape ra.

²¹Go Benyamin natuna naanoai maga; Bela, go Beker, go Ashbel, Cera, go Naaman, Ehi, go Rosh, Muppim, go Huppim, go Ard.

²²Tea maga wanogoe eu pei Rahel natuna naanoai maga, waina eu magi Yakob pakilina: eu mamau puti pei naatam̃oli rualima sikai tamate pati.

²³Go Dan natuna naanoai maga; Hushim.

²⁴Go Naftali natuna naanoai maga; Yahseel, go Cuni, go Yeser, go Shillem.

²⁵Tea maga wanogoe eu pei Bilhah natuna naanoai maga, waina Laban e dua natuna nagoroi Rahel asa, go e magi Yakob dape tea maga wanogoe: eu mamau puti pei naatam̃oli larua.

²⁶Naatam̃oli mamau puti waina eu sikoti Yakob umai paki Ityipt, waina eu dave m̃elu dua ki nawarena, eu mamau puti pei naatam̃oli rualima latesa tamate latesa, go Yakob natuna naanoai maga adagoroi maga eu sokari ra;

²⁷Go Yosef natuna naanoai maga, waina ero maneana pakilina Ityipt, ero pei naatam̃oli dua: naatam̃oli mamau puti ni nasum̃a ki Yakob, waina eu rumai paki Ityipt, eu rualima larua.

²⁸Go e dip̃aki lua Yudah e pea ki nia pa punusi Yosef, naga ega rigi pisei ki pea ki nia paki Coshen; go eu rumai paki navanua ni Coshen.

²⁹Go Yosef e mari m̃ata ki kariot aneana, po sake paki Coshen pano, naga ega sua tamana Israel; go e pakilina ki nia, po dowo nanoana, po dagi parau nanoana.

³⁰Go Israel e noa ki Yosef, e naga, Aga mate sala waia, edaku ki a po punusi naraem̃a, naga ku ko mauri doko.

³¹Go Yosef e noa ki taina maga, go ki nasum̃a ki tamana, e naga, Aga wo sake pano, po noakisai Faraoh, go aga wo noa ki nia naga, Taigu maga, go nasum̃a ki mama, waina eu doko navanua ni Kanaan, eu po umai punusi au;

³²Go naatam̃oli maga wanogoe eu pei tea leo parati ki shiip, nalakena eu pei naatam̃oli ni katel; go navata ni shiip go ni naninani adeada maga, go navata ni kau adeada maga, go tea mamau puti waina eu peani ra, eu po piragi ra umai.

³³Go ragi waina Faraoh ega wo soso mu, po noa, Nawosiana animu e pei nasava?

³⁴Kuga noa, Tea suasua anigo maga au pei naatam̃oli ni katel pae ragi waina au pei natureai pa pa paki ragi waia, kinami go tamagami maga: naga kuga toko navanua ni Coshen; nalakena naka ni Ityipt eu mamarago ki tea mamau puti waina eu pei tea leo parati ki shiip.