Read Nguna Togoa Etafe North JENESIS 48 Bible Online

JENESIS 48 - Nguna Togoa Etafe North bible

JENESIS 48

¹Go e pakilina edaku ki naleo maga wanogoe, naga te naata e noa ki Yosef, e naga, P̃a leo, tamam̃a e sasana: go e piragi natuna naanoai dua, Manasseh go Efraim, ero sikoti a pano.

²Go te naata e noakisai Yakob, po naga, P̃a leo, natum̃a Yosef e umai punusi ko: go Israel e dum̃ana mari a e kasua, po doko leana nawewele.

³Go Yakob e noa ki Yosef, e naga, Sup̃e Kasua Mau e pakilina ki nau Lus navanua ni Kanaan,

⁴po pasa m̃ata ki nau, Po noa ki nau, e naga, P̃a leo, aga wo mari ko p̃a wo pavakawora, aga wo mari ko p̃a wo laapa, go aga wo mari ko p̃a wo pei taua sikai ni narei maga; go aga wo pitua ki navanua waia paki naworaworam̃a waina euga wo edaku ki‐go ega wo pei tea veaniana waina ega wo du du po du mau du.

⁵Go ragi waia natum̃a dua, waina ero manigo pakilina navanua ni Ityipt, e pea ki a umai punusi ko Ityipt, ero pei tea aginau; Efraim go Manasseh, eroga wo pei tea aginau, dakiusi Reuben go Simeon.

⁶Go natum̃a maga, waina ku edaku ki da pesi ra, euga wo pei tea anigo; go euga wo pei tea sosoana pae nagisa ni taida maga, tokora waina euga wo peani a.

⁷Go kinau, ragi waina a pae Paddan umai, Rahel e mate pisari au navanua ni Kanaan napua, ragi waina tu ko madu uvea kiki ki Efrath: go a ova ki nia tokora wanogoe napua ni Efrath (nae e pei Bethlehem).

⁸Go Israel e punusi Yosef natuna naanoai dua, po noa, Sei maga waia?

⁹Go Yosef e noa ki tamana, e naga, Ero pei natugu naanoai dua, waina Sup̃e e dua au ara tokora waia. Go e noa, P̃a viragi ra umai punusi au, a pavara ni ko asa, go aga wo pasa m̃ata ki da.

¹⁰Go namata ni Israel e p̃irogorogo nalakena namatuaana, e marisa punusi. Go e piragi ra umai paki m̃aladigi ki nia; go e dum̃ili ra, po doti ra.

¹¹Go Israel e noa ki Yosef, e naga, A da midoa ki nia naga aga vunusi naraem̃a mau: go p̃a leo, Sup̃e e po pisei ki nau naworaworam̃a ma.

¹²Go Yosef e piragi lua ra m̃elu dua ki namawota ni nap̃atuana; go e kolo suai natano.

¹³Go Yosef e puati sokata ki da, Efraim e doko nam̃elearuna ni matua po dokop̃ai nam̃elearu ni mawiri ni Israel, go Manasseh e doko nam̃elearuna ni mawiri po dokop̃ai nam̃elearu ni matua ni Israel, go e piragi ra umai paki m̃aladigi ki nia.

¹⁴Go Israel e sai ki nam̃elearuna ni matua, po doropusi a nap̃au ni Efraim, waina e pei tea takariki, go e doropusi nam̃elearuna ni mawiri nap̃au ni Manasseh, e atae naga ega sai ki nam̃elearuna dua dapala nogoe; nalakena Manasseh e pei tea takalapa.

¹⁵Go e pasa m̃ata ki Yosef, po noa, Sup̃e waina tamagu maga Abraham go Isaak ero surata naraena, Sup̃e waina e leo parati ki nau sara naaleatia ni namauriana aginau pa pa paki naaleatia waia,

¹⁶Agelo waina e daulua au ki sara nasaana, ega vasa m̃ata ki natureai dua waia; go nagisagu ega vei tea sosoana ara, go nagisa ni tamagu maga Abraham go Isaak; go eroga pavakawora po pei taua ni naatam̃oli maga m̃aleoputo ni maramana.

¹⁷Go Yosef e punusi naga tamana e doropusi nam̃elearuna ni matua nap̃au ni Efraim, go e sa namatana: go e puati nam̃elearu ni tamana, naga ega tape lua e ega m̃elu dua ki nap̃au ni Efraim po paki nap̃au ni Manasseh.

¹⁸Go Yosef e noa ki tamana, e naga, Ega ta dapalana, mama: nalakena tea waia e pei tea takalapa; p̃a toropusi nam̃elearum̃a ni matua nap̃auna.

¹⁹Go tamana e karai, po noa, A atae a, natugu, a atae a: nae ma ega wo pei narei sikai, go nae ma ega wo p̃arua: ma taina takariki ega wo p̃arua liu sa, go naworaworana euga wo pei taua sikai ni nalauna maga.

²⁰Go e pasa m̃ata ki da naaleatia wanogoe, po noa, Israel ega wo pasa m̃ata ki pae ako, po noa, Sup̃e ega mari ko p̃a takiusi Efraim go Manasseh: go e lawo ki Efraim e pea ki Manasseh.

²¹Go Israel e noa ki Yosef, e naga, P̃a leo, kinau aga mate: ma Sup̃e ega wo sikoti mu doko, po piragi mu liliu paki navanua ki tamamu maga.

²²Go kinau a dua ko tava sula sikai dap̃au taim̃a maga, waina a dape lua e m̃elu dua ki nam̃elearu ni naworawora ni Amor ki lova aginau go ki naasu aginau.