Read Nguna Togoa Etafe North JENESIS 50 Bible Online

JENESIS 50 - Nguna Togoa Etafe North bible

JENESIS 50

¹Go Yosef e dowo paki narae ni tamana, po dagi asa, po dum̃ili a.

²Go Yosef e dip̃aki tea suasua aneana maga, tea maripauri maga, naga euga mari tamana ega vei kola: go tea maripauri maga eu mari Israel e pei kola.

³Go naaleatia rualima pati eu maneana pei tea vakavuroana; nalakena naaleatia maga ni namari‐naveikolaana eu pei tea vakavuroana dapala nogoe; go naka ni Ityipt eu dagisi a naaleatia rualima larua.

⁴Go ragi waina naaleatia maga ni natagisi‐a‐ana eu nopu, Yosef e pasa ki tea ni nasum̃a ki Faraoh, po noa, A pe wo pap̃ai nasaup̃iaana namatamu, kuga vasa nadaliga ni Faraoh, a pavara ni mu asa,

⁵po noa, Tamagu e mari au a pivisa, e noa, P̃a leo, kinau aga mate; matigo aginau waina a maginau kili a navanua ni Kanaan, tokora wanogoe p̃a ova ki nau asa. Go tea wanogoe p̃a suasua, a pavara ni ko asa, naga aga sake pano po ova ki tamagu, go aga wo liliu umai.

⁶Go Faraoh e noa, P̃a sake pano, po ova ki tamam̃a, ega tapala waina e mari ko ku pivisa asa.

⁷Go Yosef e sake pano naga ega ova ki tamana: go tea suasua mamau puti ki Faraoh eu sake sikoti a pano, tea matua maga ni nasum̃a aneana, nara ma tea matua mamau puti ni navanua ni Ityipt,

⁸Go tea mamau puti ni nasum̃a ki Yosef, go taina maga, go tea maga ni nasum̃a ki tamana eu mamau pano: ma piakirikiri adeada, go navata ni shiip go ni naninani adeada maga, go navata ni kau adeada maga, eu doropusi ra eu sikida doko navanua ni Coshen.

⁹Go kariot maga go naatam̃oli ni horse maga eu sake sikoti a pano: go eu pei taua warua sa.

¹⁰Go eu rumai paki malo wokalesue ni Atad, waina e doko taleva kerua ni Yordan, go tokora wanogoe eu lalagaarova asa ki nalalagaarovaana warua liu go e madaga liu: go e magi tamana mari nasusueana sikai naaleatia larua.

¹¹Go ragi waina naatatoko maga ni navanua, naworawora ni Kanaan, eu punusi nasusueana malo wokalesue ni Atad, eu noa, Tea waia e pei nasusueana madaga sikai ki naka ni Ityipt: nalakena tea wanogoe nagisana e pei tea sosoana ki Abel misraim, waina e doko taleva kerua ni Yordan.

¹²Go natuna maga eu maneana mari dakiusi waina e dip̃aki da asa:

¹³Go natuna maga eu dapetape a paki navanua ni Kanaan, po ova ki nia valea ni vanua ni Makpelah, waina Abraham e pakotovi a e pilake vanua wanogoe, naga ega vei naveaniana ni taikesa sikai, paki Efron nawora ni Heth, narae ni Mamre.

¹⁴Go Yosef e liliu paki Ityipt pano, nara ma taina maga, go tea mamau puti waina eu sake sikoti a pano naga euga ova ki tamana, e edaku ki e ova ki sua tamana.

¹⁵Go ragi waina Yosef taina maga eu punusi naga tamada e mate, eu noa, Yosef e pe wo pilosi gida, po mari nasaana mamau puti waina tu mari a asa e pe wo liliu paki gida.

¹⁶Go eu dip̃aki lua pa punusi Yosef, po noa, Tamam̃a e pitip̃aki, e pea ki e mate, po noa,

¹⁷Kuga noa ki Yosef ega tapala waia, P̃a midoakikorokoro, a pavara ni ko asa, natapiriana ki taim̃a maga, go namarinaleosaana adeada, nalakena eu mari sa ki‐go: go ragi waia, au pavara ni ko asa, p̃a midoakikorokoro natapiriana ki tea suasua maga ki Sup̃e ki tamam̃a. Go Yosef e kai ragi waina eu pasa ki nia.

¹⁸Go taina maga eu pano po dowo dap̃olosiwo naraena: go eu noa, P̃a leo, au pei tea suasua anigo maga.

¹⁹Go Yosef e noa ki da, e naga, Kuga ta mataku mau: nalakena kinau a doko oli Sup̃e kite?

²⁰Go nimu, ku midoaki tea sa paki nau; ma Sup̃e e midoa ki nia naga ega vei tea wia, naga ega mari a ega takiusi waina e doko naaleatia waia, naga ega mauti naatam̃oli laapa euga mauri doko.

²¹Go tea wanogoe kuga ta mataku mau: kinau aga wo pakale mu, go piakirikiri animu maga. Go e pasakorokoro ra, po pasa dodomi ra.

²²Go Yosef e doko Ityipt doko, nara ma tea ni nasum̃a ki tamana eu mamau: go Yosef e mauri doko natau p̃onotia sikai rualima takuna sikai.

²³Go Yosef e punusi Efraim natuna maga ni tagona ketolu: go Makir natuna maga Manasseh natuna eu pakilina nap̃atua ni Yosef.

²⁴Go Yosef e noa ki taina maga, e naga, Kinau aga mate: ma Sup̃e ega wo umai punusi mu lomau, po piragi lua mu m̃elu dua ki navanua waia sake pano paki navanua waina e pivisa paki Abraham, paki Isaak, go paki Yakob asa.

²⁵Go Yosef e dape navivisaana sikai ki Israel natuna maga, po noa, Sup̃e ega wo umai punusi mu lomau, go kuga wo dape navatugu maga pae tokora waia sake pano.

²⁶Go Yosef e mate, e pei tea ni natau p̃onotia sikai rualima takuna sikai: go eu mari a e pei kola, go e pei tea toropusiana koffin sikai Ityipt.