Read Nguna Togoa Etafe North JENESIS 6 Bible Online

JENESIS 6 - Nguna Togoa Etafe North bible

JENESIS 6

¹Go e pakilina, ragi waina naatam̃oli eu atulake nalaapaana narae ni natano, go natuda nagoroi maga eu madeada pakilina,

²Naga Sup̃e natuna naanoai maga eu punusi naatam̃oli natuda nagoroi maga naga eu pei raewia; go eu piragi nagoroi maga kaka ni tea mamau puti waina eu matadoa ra.

³Go Yehovah e noa, Naatagu ega wo da pululu ki naatam̃oli pa pa ega tu du po du mau du mau, nalakena nae ma e pei nap̃okasi: ma naaleatia aneana maga euga wo pei natau p̃onotia sikai rualima takuna dua.

⁴Go pule maga eu doko maramana naaleatia maga wanogoe, go ragi edaku, ragi waina Sup̃e natuna naanoai maga eu rumai punusi naatam̃oli natuda nagoroi maga, go eu madeada dape natuda maga: nara eu pei tea marimatua maga waina eu doko tuai, naatam̃oli maga ni narogoana.

⁵Go Yehovah e punusi naga nasigisigileoana ki naatam̃oli e p̃arua maramana, go naga sara naleo ni namidodoaana ni nap̃op̃oda eu sa mau sa sara naaleatia.

⁶Go Yehovah e midoakipiri naga e mari naatam̃oli doko maramana, go nap̃op̃ona e dogokitesa asa.

⁷Go Yehovah e noa, Aga wo kasi lua naatam̃oli maga waina a dawona ki da, m̃elu dua ki narae ni natano; naatam̃oli maga, go nalo tuavati maga, go tea kakaravi maga, go manu maga ni namalopa; nalakena a midoakipiri naga a mari ra.

⁸Ma Noah e pap̃ai nasaup̃iaana namata maga ni Yehovah.

⁹Tea maga waia eu pei navakilinaana maga ni Noah. Noah e pei naatam̃oli leana, tea wia lua tagona aneana maga: Noah e surata sikoti Sup̃e.

¹⁰Go Noah e pesi natuna naanoai dolu, Shem, Ham, go Yafeth.

¹¹Go maramana e p̃oa narae ni Sup̃e, go maramana e pura ki namaripavakotoana.

¹²Go Sup̃e e punusi maramana, go p̃a leo, e p̃oa; nalakena sara nap̃okasi eu mari sa ki napua adeada maramana.

¹³Go Sup̃e e noa ki Noah, e naga, Nanopuana ni sara nap̃okasi e po umai paki naraegu; nalakena maramana e pura ki namaripavakotoana nalakena nara; go p̃a leo, aga wo mari sa ki da, nara ma maramana.

¹⁴P̃a manigo mari areka sikai ni nakau kofer; p̃a mari em̃ago maga areka, go p̃a vuluti a ekopu go katama ki napulu.

¹⁵Go p̃a mari a ega tapala waia: navarauana ni areka kubit p̃onotia dolu, naweleweleana kakana kubit rualima lima, go navakilagiana kakana kubit rualima dolu.

¹⁶P̃a mari namata leoduru sikai areka, go p̃a mari nasu ega vakilagi kubit sikai; go namata ni areka p̃a lawo ki nia taleva kakana; p̃a mari a ega vei tagona ni etano, go kerua, go ketolu.

¹⁷Go kinau, p̃a leo, kinau aga viragi natave ni noai maga umai paki maramana, naga ega maripunuvunue sara nap̃okasi, waina namero ni namauriana e doko ara, m̃elu dua ki etano ni nakoroatelagi; sara naleo waina eu doko navanua euga wo mate.

¹⁸Ma aga wo mari navasasokiana aginau ega toko ako; go p̃a wo umai paki ekopu ni areka, nimu ma natum̃a naanoai maga, go am̃agoroi, go sulim̃a maga, kuga mamau puti.

¹⁹Go sara nalo mauri ni sara nap̃okasi, p̃a viragi tea ruarua kakada paki ekopu ni areka, naga p̃a mauti ra euga mauri sikoti ko; euga vei tea anoai go tea goroi.

²⁰Manu visarasara, go nalo tuavati visarasara, sara nalo kakaravi visarasara ni natano, tea ruarua kakada euga umai punusi ko, naga p̃a mauti ra euga mauri.

²¹Go p̃a tape sara navinaga seara waina e pei tea kaniana, go p̃a saisai ki nia paki ekopu; go ega wo pei navinaga anigo, go adeada.

²²Noah e mari dapala nogoe; e mari pataka ni tea mamau puti waina Sup̃e e dip̃aki nia asa.