Read Nguna Togoa Etafe North JENESIS 8 Bible Online

JENESIS 8 - Nguna Togoa Etafe North bible

JENESIS 8

¹Go Sup̃e e midoa ki Noah, go sara nalo mila, go katel mamau puti waina eu sikoti a doko ekopu ni areka; go Sup̃e e mari nalagi e sau pae maramana, go noai maga eu dosa;

²Go namata noai maga ni epua go namata leo maga ni nakoroatelagi eu p̃ono, go usa waina e pae nakoroatelagi umai e sina;

³Go noai maga eu do liliu m̃elu dua ki navanua pano: go ragi waina naaleatia p̃onotia sikai rualima takuna lima eu nopu, noai maga eu po kiki.

⁴Go atelagi kelarua, naaleatia kerualima tamate kelarua ni atelagi, areka e gona tava maga ni Ararat.

⁵Go noai maga eu do pano po kiki pa pa atelagi kerualima: atelagi kerualima, naaleatia vea ni atelagi, nap̃au ni tava maga eu pakilina.

⁶Go ragi waina naaleatia rualima pati eu nopu, Noah e p̃olagati namata leo ni areka waina e mari a:

⁷Go e dip̃aki lua reven sikai paki katama, go e dave pano po do liliu doa, pa pa noai maga eu dap̃a m̃elu dua ki navanua.

⁸Go e dip̃aki lua tokopea sikai paki katama m̃elu dua ki nia pano, naga ega vunusi noai maga eu po masalesale m̃elu dua ki narae ni natano kite?

⁹Ma tokopea e da pap̃ai te tokora waina nam̃elena ega lawo asa mau, go e liliu umai punusi a paki ekopu ni areka, nalakena noai maga eu doko narae ni navanua mamau: go e sai ki nam̃elearuna paki katama, po puati a, po piragi a umai punusi a paki ekopu ni areka.

¹⁰Go e ko doko naaleatia larua p̃ota sikai; go e moro dip̃aki lua tokopea paki katama m̃elu dua ki areka pano;

¹¹Go tokopea e umai paki ekopu punusi a ragi melu; go p̃a leo, naulu ni oliva sikai waina e dae lua e, e doko nagolena: go Noah e atae naga noai maga eu po masalesale m̃elu dua ki navanua.

¹²Go e ko moro doko naaleatia larua p̃ota sikai; po dip̃aki lua tokopea paki katama; go e da moro liliu umai punusi a mau.

¹³Go e pakilina natau p̃onotia kelatesa tamate sikai, atelagi vea, naaleatia vea ni atelagi, noai maga eu dap̃a m̃elu dua ki navanua: go Noah e dape lua wogoro ni areka, po leo punusi, go p̃a leo, narae ni natano e garagara.

¹⁴Go atelagi kerua, naaleatia rualima kerua tamate kelarua ni atelagi, navanua e lologara.

¹⁵Go Sup̃e e pasa ki Noah, e naga,

¹⁶P̃a tave m̃elu dua ki areka, nimu ma am̃agoroi, go natum̃a naanoai maga, go sulim̃a maga, kuga mamau puti.

¹⁷P̃a viragi paki katama sara nalo mauri ni sara nap̃okasi, waina eu sikoti ko doko, manu maga, go katel maga, go sara nalo kakaravi waina eu kakaravi navanua; naga euga visola p̃arua navanua; naga euga vavakawora po laapa navanua.

¹⁸Go Noah e paki katama, nara ma natuna naanoai maga, go anagoroi, go sulina maga, eu mamau:

¹⁹Sara nalo tuavati, sara nalo kakaravi, go sara manu, tea mamau puti waina eu parivari navanua, pae naworada maga, eu dave m̃elu dua ki areka.

²⁰Go Noah e magi Yehovah davagi wede ni naviriana sikai; po dape seara ni sara nalo tuavati tautau, go seara ni sara manu tautau, po pitua ki naviriana tap̃arakiana maga wede ni naviriana.

²¹Go Yehovah e sidogo nap̃ona wia; go Yehovah e noa nap̃op̃ona, e naga, Aga wo da moro pasasa ki natano nalakena naatam̃oli mau, nalakena namidodoaana ni nap̃op̃o ni naatam̃oli e pei tea sa pae ragi waina e pei piakiki pa pa pa; go aga wo da moro atugi sara nalo mauri mau, dakiusi waina a po mari a.

²²Ragi waina navanua ega wo doko, ragi ni nalalawoana go ragi ni nalolovaeana, go namaladiana go navivitinuana, go naaleatia go nap̃ogiana euga wo da makoto mau.