Read Nguna Togoa Etafe North JENESIS 9 Bible Online

JENESIS 9 - Nguna Togoa Etafe North bible

JENESIS 9

¹Go Sup̃e e pasa m̃ata ki Noah go natuna naanoai maga, po noa ki da, e naga, Kuga vavakawora, po laapa, po moro pakavuro navanua.

²Go namatau‐ki‐mu‐ana go namatakilakila‐ki‐mu‐ana ega wo doko sara nalo tuavati ni navanua, go sara manu ni namalopa; go tea mamau puti waina eu kakaravi natano, go naika mamau puti ni natasi, eu pei tea vituakiana paki nam̃elearumu.

³Sara nalo varivari waina eu mauri euga wo pei navinaga animu; dakiusi nataputea malakesa a po pitua ki puti ra paki mu.

⁴Ma nap̃okasi waina e pilake namauriana kakana, nadana, kuga ta gani a mau.

⁵Go lomau nadamu, nada ni namauriana animu, aga wo datago asa; aga wo datago asa paki nam̃elearu ni sara nalo mauri: go aga wo datago namauriana ki naatam̃oli paki nam̃elearu ni naatam̃oli, paki nam̃elearu ni tai ni sara naam̃eleatam̃oli.

⁶Naata waina e mari nada ni naatam̃oli e doroa, naatam̃oli euga mari nada ni naata wanogoe ega moro doroa: nalakena e mari naatam̃oli e pei, nunu ni Sup̃e.

⁷Go nimu, kuga vavakawora, po laapa; kuga visola p̃arua navanua, po laapa asa.

⁸Go Sup̃e e pasa ki Noah, go natuna naanoai maga waina eu sikoti a doko,

⁹e naga, Go kinau, p̃a leo, kinau a lawosoki navasasokiana aginau paki mu, go paki naworaworamu waina euga wo edaku ki mu;

¹⁰Go paki sara nalo mauri waina eu sikoti mu doko, manu maga, katel maga, go sara nalo mila ni navanua waina eu sikoti mu doko; pae tea mamau puti waina eu dave m̃elu dua ki areka, pa pa paki sara nalo mila ni navanua.

¹¹Go aga wo lawosoki navasasokiana aginau paki mu; go sara nap̃okasi euga wo da moro pei tea taeluaana ki noai maga ni natave mau; go natave ega wo da moro pakilina naga ega mari sa ki navanua mau.

¹²Go Sup̃e e noa, Tea waia e pei navaivaiana ni navasasokiana waina a mari a namawota kakagu go nimu go ni sara nalo mauri waina eu sikoti mu doko, sara tagona go sara tagona:

¹³A po lawo ki asoara aginau napopouru, go ega wo pei navaivaiana ni navasasokiana namawota kakagu go ni navanua.

¹⁴Go ega wo pakilina, ragi waina aga wo piragi napopouru sikai umai elagi ni navanua, naga asoara ega wo pei tea vunusiana napopouru,

¹⁵Go aga wo midoa ki navasasokiana aginau, waina e doko namawota kakagu go nimu go ni sara nalo mauri ni sara nap̃okasi; go noai maga euga wo da moro pei natave naga ega mari sa ki sara nap̃okasi mau.

¹⁶Go asoara ega wo doko napopouru; go aga wo leo punusi a, naga aga midoa ki navasasokiana waina e du du po du mau du namawota kaka ni Sup̃e go ni sara nalo mauri ni sara nap̃okasi waina eu doko navanua.

¹⁷Go Sup̃e e noa ki Noah, e naga, Tea waia e pei navaivaiana ni navasasokiana waina a po lawosoki a namawota kakagu go ni sara nap̃okasi waina eu doko navanua.

¹⁸Go Noah natuna naanoai maga, waina eu dave m̃elu dua ki areka, eu pei Shem, go Ham, go Yafeth: go Ham e pei tama ni Kanaan.

¹⁹Nara dolu eu pei Noah natuna naanoai maga: go nara naworaworada eu sokapule maramana mamau.

²⁰Go Noah e atulake pei naatam̃oli kili natano, po lawo roara ni vaine sikai:

²¹Go e munu waine seara, po matamaloku; go e m̃alam̃ala ekopu ni tap̃aup̃au aneana.

²²Go Ham, tama ni Kanaan, e punusi nam̃alam̃alaana ni tamana, po noa ki taina dua asa katama.

²³Go Shem go Yafeth ero dape sugoro sikai, po doropusi a napauda, po sukasuka pano, po kulugoro nam̃alam̃alaana ni tamada; go namatada ero leo kitaku, go ero da punusi nam̃alam̃alaana ni tamada mau.

²⁴Go Noah e darapa marua ki waine aneana, po atae tea waina natuna takariki e mari a paki nia.

²⁵Go e naga, Kanaan ega vei tea vasasakiana; Ega wo magi taina maga pei tea suasua ki tea suasua maga.

²⁶Go e naga, Yehovah, Sup̃e ki Shem, ega vei tea vasam̃atakiana; Go Kanaan ega vei tea suasua aneana.

²⁷Sup̃e ega mari Yafeth ega vei tea welewelea, Go ega toko tap̃aup̃au maga ki Shem; Go Kanaan ega vei tea suasua aneana.

²⁸Go Noah e mauri edaku ki natave natau p̃onotia dolu rualima takuna lima.

²⁹Go naaleatia mamau puti ki Noah eu pei natau p̃onotia loveti rualima takuna lima: go e mate.