Read Nguna Togoa Etafe North 2 SAMUEL 10 Bible Online

2 SAMUEL 10 - Nguna Togoa Etafe North bible

2 SAMUEL 10

¹Go e pakilina edaku ki tea wanogoe, naga nawota ki Ammon natuna maga e mate, go natuna Hanun e maramara du oli a.

²Go David e naga, Aga wo pisei ki Hanun, natu ni Nahash, nadodomiana dakiusi waina tamana e pisei ki nau nadodomiana. Go David e dip̃aki lua pae nam̃elearu ni tea suasua aneana maga naga ega vasapakavakale a nalakena tamana. Go tea suasua maga ki David eu rumai paki navanua ki Ammon natuna maga.

³Ma tea maraki maga ki Ammon natuna maga eu noa ki nawota adeada Hanun, eu naga, Ku midoa ki nia naga David e dodomadagani tamam̃a, naga e dip̃aki lua tea vasapakavakale maga umai punusi ko kite? David e da dip̃aki lua tea suasua aneana maga umai punusi ko naga euga leousiusi natokoana, po leo pavaraka asa, po dap̃olosiwo ki nia kite?

⁴Go Hanun e puati tea suasua maga ki David, po karo lua namagovai ni nalolu ni nasida, po daekotovi tea suniana adeada m̃aleoputo, pa pa paki nataporaeda, po dip̃aki lua ra pano.

⁵Ragi waina eu noakisai David asa, nae e dip̃aki lua naata seara naga euga vano po sua ra; nalakena naatam̃oli maga wanogoe eu maliere p̃arua. Go nawota e naga, Kuga toko Yeriko doko pa pa nalolu ni nasimu euga moro ulua, go ragi wanogoe kuga moro liliu umai.

⁶Go ragi waina Ammon natuna maga eu punusi naga eu po pei tea mamaragokiana paki David, Ammon natuna maga eu dip̃aki lua po pasadapui naatam̃oli maga ni Siria ni Beth‐rehob, go naatam̃oli maga ni Siria ni Sobah, eu pei naatam̃oli tivilia dua waina eu surata natuada, go nawota ni Maakah pilake naatam̃oli manu sikai, go naatam̃oli maga ni Tob tivilia sikai go manu takuna dua.

⁷Go ragi waina David e dogo e, e dip̃aki lua Yoab, go taua ni naatam̃oli navakalo mamau puti, tea kasua maga.

⁸Go Ammon natuna maga eu dave umai, po mari ovara maga ni navakalo tokora ni nasiliana namata‐pua: go naatam̃oli maga ni Siria ni Sobah, go ni Rehob, go naatam̃oli maga ni Tob go ni Maakah, eu pei nara mau doko nagurua.

⁹Go ragi waina Yoab e punusi naga navakalo e pei tea marim̃atakiana dip̃a e kivea go kiedaku, e matadoa naatam̃oli matadoaana mamau puti ni Israel, po mari ra eu pei ovara maga dip̃a naatam̃oli maga ni Siria:

¹⁰Go namagovai ni naatam̃oli maga waina eu ko doko, e doropusi ra eu doko nam̃elearu ni taina Abishai, go nae e mari ra eu pei ovara maga dip̃a Ammon natuna maga.

¹¹Go e naga, Waina naatam̃oli maga ni Siria eu pe kasua liu au, nigo p̃a silae au: ma waina Ammon natuna maga eu pe kasua liu ko, ragi wanogoe kinau aga valoti silae ko.

¹²Kuga viviari, go tuga magi narei anigida, go natokoana maga ki Sup̃e anigida, mari dagaragara: go Yehovah ega mari tea waina e p̃ia namatana.

¹³Go Yoab go naatam̃oli maga waina eu sikoti a eu disu paki m̃aladigi po mari navakalo dip̃a naatam̃oli maga ni Siria: go eu sava m̃elu dua ki naraena pano.

¹⁴Go ragi waina Ammon natuna maga eu punusi naga tea ni Siria eu sava pano, nara ma eu sava m̃elu dua ki narae ni Abishai pano, po sili paki natokoana. Go Yoab e m̃elu dua ki Ammon natuna maga po liliu umai paki Yerusalem.

¹⁵Go ragi waina tea ni Siria eu punusi naga Israel e marimatua ki da, eu dum̃ada piragi saisai ki da.

¹⁶Go Hadareser e dip̃aki lua, po piragi lua naatam̃oli maga ni Siria umai, waina eu doko taleva kerua ni Noaisara: go eu rumai paki Helam, go Shobak tea maraki taua naatam̃oli navakalo ki Hadareser e pei nap̃auda.

¹⁷Go eu noa ki David asa; go nae e piragi saisai ki Israel mamau puti, po duagoto Yordan, po umai paki Helam. Go naatam̃oli maga ni Siria eu dum̃ada mari ovara maga dip̃a David, po mari navakalo paki nia.

¹⁸Go naatam̃oli maga ni Siria eu sava m̃elu dua ki narae ni Israel pano; go David e atugi naatam̃oli maga ni Siria, tea ni kariot p̃onotia larua, go tea maga waina eu sakesaake horse tivilia pati, po atugi Shobak tea maraki taua adeada, go e mate tokora wanogoe.

¹⁹Go ragi waina nawota maga mamau puti, tea suasua maga ki Hadareser, eu punusi naga Israel e marimatua ki da, eu mari natam̃ateana paki Israel, po pei tea suasua adeada maga. Go naatam̃oli maga ni Siria eu mataku naga euga wo da moro silae Ammon natuna maga te ragi mau.