Read Nguna Togoa Etafe North 2 SAMUEL 13 Bible Online

2 SAMUEL 13 - Nguna Togoa Etafe North bible

2 SAMUEL 13

¹Go e pakilina edaku ki tea wanogoe naga Absalom, natu ni David, e peani gorena leom̃atakiana sikai, nagisana Tamar; go Amnon, natu ni David, e masauna.

²Go Amnon e dogokitesa p̃arua po sasana nalakena gorena Tamar; nalakena nae e pei mutawono; go e kasua namata ni Amnon naga ega mari te navatuna paki nia.

³Ma Amnon e peani tana ri sikai, nagisana Yonadab, natu ni Shimeah, David taina: go Yonadab e pei naatam̃oli manumatua liu sikai.

⁴Go nae e noa ki nia, e naga, Natu ni nawota O, ekasana ku dogokitesa sara naaleatia? P̃a wo da noakisai au asa kite? Go Amnon e noa ki nia, e naga, A masau Tamar, taigu Absalom gorena.

⁵Go Yonadab e noa ki nia, e naga, P̃a maturu one nawewele anigo, po mari dakiusi waina ku masake: go ragi waina tamam̃a ega wo umai punusi ko, p̃a noa ki nia, p̃a naga, P̃a suasua naga goregu Tamar ega umai punusi au, a pavara ni ko asa, po dua au bred naga aga kani a, go ega mari m̃ata ki navinaga naraegu, naga aga vunusi a, po gani a nam̃elearuna.

⁶Go Amnon e maturu one, po mari dakiusi waina e masake: go ragi waina nawota e umai punusi a, Amnon e noa ki nawota, e naga, P̃a suasua naga goregu Tamar ega umai punusi au, a pavara ni ko asa, po maginau mari keke ega rua naraegu naga aga kanikani nam̃elearuna.

⁷Go David e dip̃aki lua navasaana paki esum̃a, paki Tamar, po naga, P̃a vaki nasum̃a ki gorem̃a Amnon pano po maneana mari m̃ata ki navinaga.

⁸Go dapala nogoe Tamar e paki nasum̃a ki gorena Amnon pano; go nae e maturu one. Go e dape flaur, po m̃oli a, po mari keke maga naraena, go e peni keke maga wanogoe.

⁹Go e dape pan, po daki nia naraena; ma e karai ganikani. Go Amnon e naga, Kuga mari sara naatam̃oli euga tave m̃elu dua ki nau pano. Go eu mamau puti dave pano.

¹⁰Go Amnon e noa ki Tamar, e naga, P̃a tape navinaga umai paki em̃ago naga aga kanikani nam̃elearum̃a. Go Tamar e dape keke maga waina e mari ra, po dape ra umai paki em̃ago punusi gorena Amnon.

¹¹Go ragi waina e dape ra umai paki m̃aladigi ki nia naga ega kanikani, e puati a po noa ki nia, e naga, P̃a umai, goregu, po one sikoti au.

¹²Go e pasadara e, po naga, Ee, goregu, p̃a ta mari sa ki nau mau; nalakena namariana dapala nea ega ta pei tea mariana Israel mau: p̃a ta mari navei‐lala‐ana waia mau.

¹³Go kinau, aga vilake namaliereana aginau paki esava? Go nigo, p̃a wo pei lala sikai ni Israel. Go nalakena tea wanogoe, a pavara ni ko, p̃a vasa paki nawota; nalakena nae ega wo da mauti au kiam̃a.

¹⁴Ma e da masauna mau naga ega rogo parati ki nadaleona: go nalakena nae e kasua liu sa, e mari matua ki nia, po one sikoti a.

¹⁵Go edaku ki nia Amnon e pilosi a ki navilosiana warua; go navilosiana aneana wanogoe e p̃arua liu nadodomiana aneana waina e pea dodomi a asa. Go Amnon e noa ki nia, e naga, P̃a tuleana, p̃a vano.

¹⁶Go nae e noa ki nia, e naga, Ee, ega ta dapala nogoe mau, nalakena tea sa warua waia waina ku do mari a, po do dip̃aki nau pano, e sa do liu tea vea waina ku mari a paki nau. Ma e da masau daki dorogo paki nia mau.

¹⁷Go e soso tea waina e maneana suasua, po naga, P̃a tip̃aki lua nagoroi waia ega m̃elu dua ki nau pano, go p̃a marisoki namata ega kasua edaku ki nia.

¹⁸Go e suni sugoro oraorana sikai: nalakena nawota natuna nagoroi maga waina eu pei mutawono maga eu suni sugoro maga waina e dapala nogoe. Go tea suasua aneana e piragi lua e pano, po marisoki kasua ki namata edaku ki nia.

¹⁹Go Tamar e doropusi natanoapu e doko nap̃auna, po pua p̃orae sugoro oraorana aneana waina e suni a; go e doropusi nam̃elearuna nap̃auna, po pae napua aneana pano, po do dagi.

²⁰Go gorena Absalom e noa ki nia, e naga, Gorem̃a Amnon e po sikoti ko kite? Ma p̃a vunuta, goregu: nae e pei gorem̃a; p̃a ta midoaki sa ki nia nap̃op̃om̃a mau. Go Tamar e doko nasum̃a ki gorena Absalom doko, e dogokitesa p̃arua.

²¹Ma ragi waina nawota David e dogo nalo ni tea maga wanogoe, e maeto p̃arua.

²²Go Absalom e da pasa paki Amnon mau tea wia kite tea sa; nalakena Absalom e pilosi Amnon, nalakena e mari tea sa paki gorena Tamar.

²³Go e pakilina edaku ki natau dua ero nopu, naga Absalom e peani tea alati maga ni nam̃au ni shiip eu doko Baal‐hasor, waina e doko m̃aladigi ki Efraim: go Absalom e pitautau nawota natuna naanoai maga mamau puti.

²⁴Go Absalom e umai punusi nawota, po naga, P̃a leo, tea suasua anigo e peani tea alati maga ni nam̃au ni shiip; a pavara ni ko naga nawota go tea suasua aneana maga euga wo umai sikoti tea suasua anigo.

²⁵Go nawota e noa ki Absalom, e naga, Ee natugu, auga ta mamau pano, mase au pe madaga paki‐go. Go e pasadie a asa: ma e da masau pano mau, go e pasa p̃ia ki nia.

²⁶Go Absalom e naga, Waina ku pe ta suasua, go a pavara ni ko naga taigu Amnon ega sikoti gami. Go nawota e noa ki nia, e naga, Ekasana ega sikoti ko pano?

²⁷Ma Absalom e pasadie a asa, go e suasua naga Amnon go nawota natuna naanoai maga mamau puti euga sikoti a pano.

²⁸Go Absalom e dip̃aki tea suasua aneana maga, po naga, Kuga leosoki Amnon ragi waina nap̃op̃ona e do laelaea nalo ni waine; go ragi waina aga wo noa ki mu, Kuga atugi Amnon, ragi wanogoe kuga atugi a, kuga ta mataku mau: kinau a da dip̃aki mu asa kite?

²⁹Kuga viviari, go kuga vei m̃aau maga. Go tea suasua maga ki Absalom eu mari paki Amnon dapala waina Absalom e dip̃aki da asa. Go nawota natuna naanoai maga eu mamau puti duleana, go eu sikasikai pagi mule adeada, po sava pano.

³⁰Go e pakilina ragi waina eu ko doko napua, naga narogorogoana e umai paki David, eu naga, Absalom e po atugi puti nawota natuna naanoai maga, go sikai kakada e da doko mau.

³¹Go nawota e duleana, po pua p̃orae sugoro aneana, po one natano; go tea suasua aneana maga mamau puti waina eu doko m̃aladigi ki nia, eu pua p̃orae sugoro adeada maga.

³²Go Yonadab, natu ni Shimeah, David taina, e pasadara, po naga, Nawota aginau ega ta midoaki naga eu atugi puti natureai maga, nawota natuna naanoai maga mau; nalakena Amnon e sikina mate: nalakena Absalom e midoaki dawona ki tea wanogoe doko naaleatia waina e mari tea sa paki gorena Tamar.

³³Go tea wanogoe nawota aginau ega ta midoaki nia nap̃op̃ona naga nawota natuna naanoai maga eu mate puti: nalakena Amnon e sikina mate.

³⁴Ma Absalom e sava pano. Go natureai waina e pei tea vavaigoro, e leo sake, po punusi, go p̃a leo, naatam̃oli laapa eu do siwo natakuna pae napua ni tava umai.

³⁵Go Yonadab e noa ki nawota, e naga, P̃a leo, nawota natuna naanoai maga eu po do umai: dapala waina tea suasua anigo e noa e, e dapala nogoe.

³⁶Go e pakilina, ragi waina navasaana aneana e nopu, naga p̃a leo, nawota natuna naanoai maga eu rumai, go eu sike nadaleoda, po dagi: go nawota nara ma tea suasua aneana maga eu mamau puti dagi ki natagiana warua.

³⁷Go Absalom e sava, po pa punusi Talmai, natu ni Ammihur, nawota ni Ceshur. Go David e dagisi natuna sara naaleatia.

³⁸Go Absalom e sava, po paki Ceshur pano, po doko asa doko natau dolu.

³⁹Go nap̃op̃o ni nawota David e m̃aem̃ae midoaki Absalom: nalakena e pei tea vasapakavakaleana nalo ni Amnon, waina e mate sua.