Read Nguna Togoa Etafe North 2 SAMUEL 14 Bible Online

2 SAMUEL 14 - Nguna Togoa Etafe North bible

2 SAMUEL 14

¹Go Yoab, natu ni Seruiah, e atae naga nap̃op̃o ni nawota e midoaki Absalom.

²Go Yoab e dip̃aki lua paki Tekoa po paraki nagoroi manumatua sikai umai, po noa ki nia, e naga, P̃a mari dakiusi tea tagi, po suni sugoro ni namalepuana, a pavara, ni ko asa, go p̃a ta dum̃am̃a puvurai ki‐go ki naroro mau, ma p̃a mari dakiusi nagoroi sikai waina e do dagisi tea mate naaleatia laapa:

³Go p̃a vano punusi nawota, po pasa paki nia dapala nea. Go Yoab e doropusi navasaana maga nawokana.

⁴Go ragi waina nagoroi ni Tekoa wanogoe e pasa paki nawota, e dowo dap̃olosiwo po kolo suai natano, po naga, P̃a silae au, nawota O.

⁵Go nawota e noa ki nia, e naga, Nasava e mari ko? Go e pasadara e, po naga, Kinau a pei nagoroi malepu sikai, go aguwota e mate.

⁶Go tea suasua nagoroi anigo e peani natuna naanoai dua, go ero dum̃ada mari ra vanua, go tea vua p̃otae ra e dika, go sikai e atugi kerua po mari punue a.

⁷Go p̃a leo, namatarau mamau eu duleana dip̃a tea suasua nagoroi anigo, go eu naga, P̃a vitua ki tea waina e atugi taina, naga auga mari punue a dip̃a namauriana ki taina waina e atugi a, go dapala nogoe auga mari puoli ki tea veanipioli ki p̃aumaso ni tamana: dapala nogoe euga wo mari punue nam̃elevara aginau waina e ko doko, go aguwota ega wo da peani nagisa sikai kite namagovai mauri ni tea mate maga maramana.

⁸Go nawota e noa ki nagoroi wanogoe, e naga, P̃a vaki nasum̃a anigo pano, go aga wo pitua ki natip̃akiana nalo kakam̃a.

⁹Go nagoroi ni Tekoa wanogoe e noa ki nawota, e naga, Nawota aginau, nawota O, namarinaleotageleana wanogoe ega toko au, go doko nasum̃a ki tamagu: go nawota go malo tasake aneana ega tika asa.

¹⁰Go nawota e naga, Waina te naata e pe vasa paki‐go, p̃a viragi a umai punusi au, go ega wo da moro mari te navatuna paki‐go mau.

¹¹Go nagoroi wanogoe e naga, A pavara ni ko, nawota ega midoaki parati ki Yehovah Sup̃e anigo, naga tea siko nada ega ta moro mari punue mau, mase eu pe mari punue natugu. Go nae e naga, Yehovah e mauri doko, go napati ni nalolu ni natum̃a sikai kakada ega wo da dowo paki natano mau.

¹²Go nagoroi wanogoe e naga, A pavara ni ko, tea suasua nagoroi anigo ega vasa paki nawota, nawota aginau ki navasaana sikai.

¹³Go e naga, P̃a vasa. Go nagoroi wanogoe e naga, Go ekasana nigo ku midoaki p̃ai tea tapala nogoe dip̃a narei ki Sup̃e? Nalakena pae navasaana waina ku noa e, nawota e dapala tea mari naleo sa lomau, nalakena nawota e da moro piragi liliua ki tea aneana waina e kopasi lua e pano.

¹⁴Nalakena tu mate, go tu dakiusi noai waina eu daki nia natano, waina eu marisa moro pila daua ki nia mau; go Sup̃e e da do dape lua namauriana mau, ma e do midoaki namidoakiana naga tea waina e pei tea kopasiluaana pano, ega ta doko uvea ki nia mau.

¹⁵Go tea wanogoe a po umai naga aga noa ki nawota, nawota aginau navasaana waia, nalakena narei maga eu mari au a mataku: go tea suasua nagoroi anigo e naga, Ragi waia aga wo pasa paki nawota: alagoro nawota ega wo mari tea waina tea suasua aneana e datagovi a asa.

¹⁶Nalakena nawota ega wo daki dorogo, po pualua tea suasua aneana m̃elu dua ki nam̃elearu ni naatam̃oli waina e masau mari puoli sokota ki nau ma natugu m̃elu dua ki naveanipiolikiana ki Sup̃e.

¹⁷Go tea suasua nagoroi anigo e naga, A pavara ni ko naga navasaana ki nawota, nawota aginau ega vei namaromaroana aginau: nalakena nawota, nawota aginau e dakiusi agelo ki Sup̃e, e mariatae midoaki p̃otae tea wia go tea sa: go Yehovah Sup̃e anigo ega sikoti ko.

¹⁸Go nawota e pasadara po noa ki nagoroi wanogoe, e naga, A pavara ni ko naga p̃a wo da dasuru ki te navatuna mau nalo ni tea waina aga wo pusuusu paki‐go asa. Go nagoroi wanogoe e naga, Nawota, nawota aginau ega vasa.

¹⁹Go nawota e naga, Nam̃elearu ni Yoab e sikoti ko ki tea mamau puti wanogoe kite? Go nagoroi wanogoe e pasadara, po naga, Naatam̃a e mauri, nawota, nawota aginau, go naata sikai e marisa dalele paki taleva ni matua kite paki taleva ni mawiri ki tea waina nawota, nawota aginau e pasa asa: nalakena tea suasua anigo Yoab, nae e dip̃aki nau, go e doropusi navasaana maga mamau puti wanogoe nawoka ni tea suasua nagoroi anigo:

²⁰Tea suasua anigo Yoab e mari tea wanogoe naga ega roa naleo wanogoe: go nawota aginau e peani namanumatuaana dapala namanumatuaana ki agelo ki Sup̃e, po do atae naleo maga mamau puti waina eu doko maramana.

²¹Go nawota e noa ki Yoab, e naga, P̃a leo, a po mari sua naleo wanogoe: nalakena tea wanogoe p̃a vano po piragi natureai Absalom liliu umai.

²²Go Yoab e dowo dap̃olosiwo, po kolo suai natano, po pasa dodo m̃ata ki nawota: go Yoab e naga, Masoso tea suasua anigo e atae naga a po pap̃ai nasaup̃iaana namatam̃a, nawota aginau, nawota O, waina nawota e pakavuro navavaraniana ki tea suasua aneana.

²³Go Yoab e duleana po paki Ceshur pano, po piragi Absalom umai paki Yerusalem.

²⁴Go nawota e naga, Ega maradoa po paki nasum̃a aneana pano, ma ega ta punusi naraegu mau. Go dapala nogoe Absalom e dum̃ana doa e po paki nasum̃a aneana pano, go e da punusi narae ni nawota mau.

²⁵Go usuraki Israel mamau te naata sikai e da doko waina e pei tea leom̃atakiana dakiusi Absalom nalakena e pei raewia liu: pae nam̃ele natuana pa pa paki nam̃asuaana e mamaau p̃ia.

²⁶Go ragi waina e alati nap̃auna e m̃alu, (go e pei namatap̃ago ni sara natau naga e alati naloluna: nalakena e madaga asa, nalakena tea wanogoe e alati a:) e dowogi nalolu ni nap̃auna e pei shekel p̃onotia dua, shekel ki nawota.

²⁷Go natuna naanoai dolu eu magi Absalom pakilina, go natuna nagoroi sikai maau, nagisana Tamar: go nae e pei nagoroi raewia sikai.

²⁸Go Absalom e doko Yerusalem doko natau mamau dua; go e da punusi narae ni nawota mau.

²⁹Go Absalom e dip̃aki lua paraki Yoab, naga ega tip̃aki nia pa punusi nawota; ma e da suasua umai punusi a: go e dip̃aki lua sala kerua, ma e karai umai.

³⁰Nalakena tea wanogoe e noa ki tea suasua aneana maga, e naga, Kuga leo, vanua ki Yoab e doko m̃aladigi ki tea aginau, go e peani barle e doko asa; kuga vano, po dokoni a. Go tea suasua maga ki Absalom eu dokoni vanua wanogoe.

³¹Go Yoab e duleana, po umai punusi Absalom nasum̃a aneana po noa ki nia, e naga, Ekasana tea suasua anigo maga eu dokoni vanua aginau?

³²Go Absalom e pasadara Yoab, po naga, P̃a leo, a dip̃aki lua paki‐go po naga, P̃a umai naga aga tip̃aki lua ko pa punusi nawota, naga p̃a wo noa, Nasava e pei nalakena a po pae Ceshur umai? E p̃ia ki nau naga a pe ko doko tokora wanogoe doko: go tea wanogoe aga vunusi narae ni nawota; go waina namarinaleotageleana e pe toko au, ega mari punue au.

³³Go Yoab e umai punusi nawota, po noa ki nia asa: go e pitip̃aki paraki Absalom go e umai punusi nawota, go e kolo suai natano narae ni nawota: go nawota e dum̃ili Absalom.