Read Nguna Togoa Etafe North 2 SAMUEL 15 Bible Online

2 SAMUEL 15 - Nguna Togoa Etafe North bible

2 SAMUEL 15

¹Go e pakilina edaku ki nia, naga Absalom e dum̃ana maneana mari m̃ata ki kariot sikai go horse maga, go naatam̃oli rualima lima waina euga sava pea ki nia.

²Go Absalom e duleana malip̃ogi loaloa, po lawodu nadigi ni napua ni namata‐pua: go e pakilina naga ragi waina naata sikai e peani navululuana naga nawota ega vasa p̃otae a, ragi wanogoe Absalom e soso e umai punusi a, po naga, Nigo ku pei tea ni seve natokoana? Go e naga, Tea suasua anigo e pei tea ni naworawora maga ni Israel sikai kakada.

³Go Absalom e noa ki nia, e naga, P̃a leo, naleo anigo maga eu p̃ia go eu leana; ma nawota e da matadoa naata sikai waina ega rogo ko mau.

⁴Go Absalom e moro naga, Ko, sei ega mari au aga vei tea vasap̃otae ni navanua, naga sara naata waina e peani navululuana kite te navatuna ega umai punusi au, go a mariatae maneana pasa p̃otae leana ki nia!

⁵Go e pakilina ragi waina te naata sikai e umai paki m̃aladigi po kolo suai natano paki nia, naga e sai ki naruna, po puasoki a, po dum̃ili a.

⁶Go Absalom e mari dapala nogoe paki tea mamau puti ni Israel waina eu rumai punusi nawota raki navasap̃otaeana: go dapala nogoe Absalom e panako nap̃op̃o ni naatam̃oli maga ni Israel.

⁷Go e pakilina edaku ki natau kevati e nopu, naga Absalom e pasa paki nawota, po naga, A pavara ni ko naga aga vano po lagati dua nasaiana aginau, waina a sai a paki Yehovah Hebron.

⁸Nalakena tea suasua anigo e sai nasaiana sikai ragi waina e ko doko Ceshur ni Siria doko, po naga, Waina Yehovah e pe moro piragi liliua ki nau umai paki Yerusalem, ragi wanogoe a pe wo magi Yehovah suasua.

⁹Go nawota e noa ki nia, e naga, P̃a vae natam̃ateana pano. Go e duleana, po paki Hebron pano.

¹⁰Ma Absalom e dip̃aki lua tea leo pavaraka maga usuraki naworawora maga mamau puti ni Israel, po naga, Ragi waina kuga wo dogo nadaleo ni paiga, ragi wanogoe kuga wo naga, Absalom e pei nawota doko Hebron.

¹¹Go naatam̃oli p̃onotia dua eu sikoti Absalom m̃elu dua ki Yerusalem pano, eu pei tea vitautauana, go eu pei sap̃o pano; go eu da atae te navatuna mau.

¹²Go Absalom e dip̃aki lua paraki Ahithofel, naatam̃oli ni Ciloh, tea midoaki p̃otae ki David, paki natokoana aneana Ciloh, ragi waina e do pitua ki naviriana maga. Go navasaana ni nasekeana e kasua; nalakena narei maga waina eu sikoti Absalom eu do disu po laapa.

¹³Go tea tautauana sikai e umai punusi David, po naga, Nap̃op̃o ni naatam̃oli maga ni Israel eu dausi Absalom.

¹⁴Go David e noa ki tea suasua aneana maga mamau puti waina eu sikoti a doko Yerusalem, e naga, Kuga tuleana, go tuga sava pano; tu pe marisa sava dua ki Absalom mau: tuga mari m̃araverave po pano, mase nae e pe mari m̃araverave po pa parati ki gida, po mari tea sa paki gida, po atugi natokoana ki nawoka ni lova.

¹⁵Go tea suasua maga ki nawota eu noa ki nawota, eu naga, P̃a leo, tea suasua anigo maga eu doko raki tea waina nawota aginau e masauna.

¹⁶Go nawota e dave pano, go tea ni nasum̃a aneana eu mamau puti dausi a. Go nawota e doropusi nagoroi rualima sikai, narup̃a maga, eu madoko naga euga leo parati ki nasum̃a.

¹⁷Go nawota e dave pano, go tea mamau puti eu dausi a; go eu doko Beth‐merhak doko.

¹⁸Go tea suasua aneana maga mamau puti eu surata do liu sa; go naka ni Kaftor, go naka ni Filistine maga, go naka ni Cath, naatam̃oli p̃onotia latesa waina eu dausi a pae Cath, eu mamau puti surata pano pea ki nawota.

¹⁹Go nawota e noa ki Ittai, tea ni Cath, e naga, Ekasana nigo ku sikoti gami pano? P̃a liliu, po doko sikoti nawota doko: nalakena nigo ku pei tea ni navanua p̃ota, go ku pei nam̃enaki‐atatoko sikai; p̃a liliu paki kiam̃a.

²⁰Ku po umai nanova, go masoso aga mari ko p̃a wo surata papiliu sikoti gami kite? Nalakena kinau a do paki tokora waina aga vaki asa. P̃a liliu, po piragi taim̃a maga liliu; nadodomiana go naveilomauana eroga sikoti ko.

²¹Go Ittai e pasadara nawota, po naga, Yehovah e mauri doko, go nawota, nawota aginau e mauri doko, go tokora waina nawota, nawota aginau ega wo doko asa, waina e pe vei namateana, kite e pe vei namauriana, tokora wanogoe tea suasua anigo nae ma ega wo doko asa.

²²Go David e noa ki Ittai, e naga, P̃a tuagoto pano. Go Ittai, tea ni Cath, e duagoto pano, nara ma naatam̃oli aneana maga mamau puti, go piakirikiri maga mamau puti waina eu sikoti a.

²³Go navanua mamau eu dagi ki nadaleo kasua, go narei mamau puti eu duagoto pano: go nawota nae ma e duagoto noaisara Kidron, go narei eu duagoto puti, napua waina e paki masop̃alo.

²⁴Go p̃a leo, Sadok nara ma tea ni naworawora ni Levi eu mamau, eu dape areka ni navasasokiana ki Sup̃e umai; go eu doropusi areka ki Sup̃e e doko, go Abiathar e sake umai, go narei mamau puti eu dave m̃elu dua ki natokoana pano.

²⁵Go nawota e noa ki Sadok, e naga, P̃a tape liliua ki areka ki Sup̃e paki natokoana pano: waina a pe wo pap̃ai nasaup̃iaana namata ni Yehovah, nae e pe wo moro piragi au liliu, po pisei ki nau asa go malotokoana aneana.

²⁶Ma waina ega noa dapala nea, A da laelaea ako mau; p̃a leo, kinau nea, nae ega mari paki nau tea waina e p̃ia namatana.

²⁷Go nawota e moro pasa paki Sadok tea viri, po naga, Nigo ku da pei tea kikita sikai kite? P̃a liliu paki natokoana natam̃ateana, go Ahimaas natum̃a, go Yonathan, natu ni Abiathar, eroga sikoti ko pano.

²⁸P̃a leo, aga wo doko tokora ni natuagotoana ni masop̃alo doko, pa pa navasaana ega wo pae ako umai naga aga atae a.

²⁹Nalakena tea wanogoe Sadok go Abiathar ero moro dape areka ki Sup̃e liliu paki Yerusalem: go ero doko tokora wanogoe doko.

³⁰Go David e sake paki tava ni Oliva pano, doko po do dagi; go e kulugoro nap̃auna, go e dika ki nam̃elevasiana: go naatam̃oli maga mamau puti waina eu sikoti a, eu kulugoro nap̃auda, go eu sake pano, doko po do dagi.

³¹Go naata sikai e noa ki David, e naga, Ahithofel e pei tea seke sikai sikoti Absalom. Go David e naga, Yehovah O, a pavara ni ko, p̃a mari namidoakip̃otaeana ki Ahithofel ega vei tea p̃alo.

³²Go e pakilina, ragi waina David e umai sua paki nam̃asua, tokora waina eu lotu ki Sup̃e asa, naga kuga leo, Hushai tea ni Arik e umai naga ega sua e, sugoro aneana e pei tea vuap̃oraeana, go natano e doko nap̃auna:

³³Go David e noa ki nia, e naga, Waina ku pe wo sikoti au pano, ku pe wo mari namadagaana paki nau:

³⁴Ma waina ku pe wo liliu paki natokoana, po noa ki Absalom naga, Kinau aga wo pei tea suasua anigo, nawota O; dapala waina kinau a pea pei tea suasua ki tamam̃a sala vea, dapala nogoe aga wo pei tea suasua anigo ragi waia: go dapala nogoe p̃a wo maginau mari piri namidoakip̃otaeana ki Ahithofel.

³⁵Go Sadok ma Abiathar, tea viri maga, ero da doko sikoti ko mau kite? Nalakena tea wanogoe, ega wo pakilina naga sara navasaana waina p̃a wo dogo e nasum̃a ki nawota, p̃a wo noasai a paki Sadok go Abiathar, tea viri maga.

³⁶P̃a leo, ero peani natuda dua, Ahimaas natu ni Sadok, go Yonathan natu ni Abiathar, ero sikoti ra doko; go p̃a wo dip̃aki lua ra eroga wo noa kinau sara navasaana waina p̃a wo dogo e.

³⁷Go Hushai, David tana ri sikai, e umai paki natokoana; go Absalom e umai paki Yerusalem.