Read Nguna Togoa Etafe North 2 SAMUEL 19 Bible Online

2 SAMUEL 19 - Nguna Togoa Etafe North bible

2 SAMUEL 19

¹Go e pei tea noaana paki Yoab, eu naga, P̃a leo, nawota e do dagi po do susue nalo ni Absalom.

²Go namarimatuaana naaleatia wanogoe e pei tea roaana po pei nasusueana paki narei mamau puti: nalakena naaleatia wanogoe narei eu dogo naga nawota e susue nalo ni natuna.

³Go narei eu sili panako paki natokoana naaleatia wanogoe, dakiusi narei waina eu maliere eu do sava panako pano ragi waina eu sava dua ki navakalo.

⁴Go nawota e kulugoro naraena, go nawota e pioso ki nadaleo kasua, po naga, Natugu Absalom O, Absalom O, natugu, natugu!

⁵Go Yoab e umai paki nasum̃a punusi nawota, po naga, Naaleatia waia ku mari namaliereana paki narae ni tea suasua anigo maga mamau puti waina eu mauti namauriana anigo naaleatia waia, go namauriana ki natum̃a naanoai maga go ki natum̃a nagoroi maga, go namauriana ki nagoroi anigo maga, go namauriana ki narup̃a anigo maga;

⁶Nalakena ku dodomi tea maga waina eu pilosi ko, go ku pilosi tea maga waina eu dodomi ko. Nalakena naaleatia waia ku po pisei ki naga tea maraki maga go tea suasua maga eu pei tea m̃oli naraem̃a: nalakena naaleatia waia a leo atae naga waina Absalom e pe mauri doko, go kinami au pe mate puti naaleatia waia, tea wanogoe e pe wia namatam̃a.

⁷Nalakena tea wanogoe p̃a tuleana, p̃a tave pano, po pasa matemate paki tea suasua anigo maga: nalakena a pivisa pae nagisa ni Yehovah, naga waina ku pe ta dave pano mau, go te naata sikai maau ega wo da sikoti ko doko p̃ogi waia mau: go tea wanogoe ega wo sa ki‐go liu tea sa mamau puti waina eu pea pakilina ki‐go pae ragi ni naveinatureai‐ana anigo pa pa paki ragi waia.

⁸Go nawota e duleana, po dasake doko namata‐pua. Go eu noa ki narei mamau puti, eu naga, Kuga leo, nawota e dasake doko namata‐pua: go narei mamau puti eu rumai pakilina narae ni nawota. Go Israel eu sava sara naata sikasikai paki tap̃aup̃au adeada pano.

⁹Go narei mamau puti eu pile usuraki naworawora mamau puti ni Israel, eu naga, Nawota e pualua gida m̃elu dua ki nam̃elearu ni tea kokona ki gida maga, go e mauti gida m̃elu dua ki nam̃elearu ni Filistine maga; go ragi waia e po sava m̃elu dua ki navanua, nalakena Absalom.

¹⁰Go Absalom, waina tu puvurai ki nia dap̃au gida, e mate navakalo. Go tea wanogoe ekasana ku da noa te navasaana sikai nalo ni naviragililiua‐kiana ni nawota?

¹¹Go nawota David e dip̃aki lua navasaana paki Sadok go paki Abiathar, tea viri maga, e naga, Koroga noa ki tea matua maga ni Yudah, po naga, Ekasana nimu ku pei tea edaku mau maga naga kuga viragi nawota liliu paki nasum̃a aneana? Nalakena navasaana ki Israel mamau e umai paki nawota naga euga viragi a liliu paki nasum̃a aneana.

¹²Nimu ku pei taigu maga, nimu ku pei navatugu go nap̃okasigu: go ekasana nimu ku pei tea edaku mau maga naga kuga viragi nawota liliu?

¹³Go koroga noa ki Amasa, Nigo ku da pei navatugu go nap̃okasigu, kite? Sup̃e ega mari dapala nogoe paki nau, po moro sokari a, waina ku pe ta pei tea maraki taua naraegu pitip̃atip̃a du oli Yoab.

¹⁴Go e mari nap̃op̃o ni naatam̃oli mamau puti ni Yudah eu sukasuuka, dapala e pe vei nap̃op̃o ni naatam̃oli sikai maau; go dapala nogoe eu dip̃aki lua navasaana paki nawota, eu naga, P̃a liliu umai, nimu ma tea suasua anigo maga mamau puti.

¹⁵Go nawota e liliu, po umai paki Yordan. Go Yudah e umai paki Cilcal, naga ega vano po sua nawota, naga ega viragi nawota duagoto Yordan.

¹⁶Go Shimei, natu ni Cera, tea ni Benyamin sikai, waina e pae Bahurim, e mari m̃araverave po siwo sikoti naatam̃oli maga ni Yudah, naga ega sua nawota David.

¹⁷Go naatam̃oli ni Benyamin manu sikai eu sikoti a, go Siba, tea suasua sikai ni nasum̃a ki Saul, nara ma natuna naanoai rualima sikai tamate lima, go tea suasua aneana rualima dua eu mamau; go eu duagoto Yordan pano narae ni nawota.

¹⁸Go rarua musamusa sikai e duagoto pano naga ega musagi tea ni nasum̃a ki nawota, go naga euga mari tea waina ega midoaki m̃ata ki nia. Go Shimei, natu ni Cera, e kolo suai natano narae ni nawota, ragi waina e duagoto Yordan.

¹⁹Go e noa ki nawota, e naga, Nawota aginau ega ta midoaki dip̃a au te namarinaleotageleana mau, go p̃a ta midoaki parati ki tea waina tea suasua anigo e mari dagele asa naaleatia waina nawota, nawota aginau, e m̃elu dua ki Yerusalem asa, naga nawota ega ta dape soki a doko nap̃op̃ona.

²⁰Nalakena kinau tea suasua anigo, a atae naga a po mari naleo sa: nalakena tea wanogoe p̃a leo, a po umai naaleatia waia, a pei tea vea mau ni nasum̃a ki Yosef, naga a siwo umai po sua nawota, nawota aginau.

²¹Ma Abishai, natu ni Seruiah, e pasadara, po naga, Shimei ega ta pei tea toropusiana paki namateana dip̃a tea waia, nalakena e pasasa ki tea vuvuraikiana ki Yehovah, kite?

²²Go David e naga, Kinau aga kasa ki mu, nimu Seruiah natuna naanoai maga, naga nimu kuga vei tea tiegoro au maga naaleatia waia? Naata sikai ega wo pei tea maripunueana Israel naaleatia waia kite? Nalakena kinau a da atae a mau naga a pei nawota dap̃au Israel naaleatia waia kite?

²³Go nawota e noa ki Shimei, e naga, Nigo p̃a wo da mate mau. Go nawota e pivisa paki nia.

²⁴Go Mefibosheth, natu ni Saul, e siwo umai naga ega sua nawota; go e da mari usi nam̃elena maga mau, go e da masi nalolu ni nasina mau, go e da sarue sugoro aneana maga mau, pae naaleatia waina nawota e m̃elu pano, pa pa paki naaleatia waina e liliu umai natam̃ateana.

²⁵Go e pakilina, ragi waina e umai paki Yerusalem naga ega sua nawota, go nawota e noa ki nia, e naga, Ekasana ku da sikoti au pano mau, Mefibosheth?

²⁶Go e pasadara, po naga, Nawota aginau, nawota O, tea suasua aginau e piragi sasap̃o ki nau: nalakena tea suasua anigo e naga, Aga wo sawa ki tea sawagoro nam̃adu ni ass sikai, naga aga sakesaake asa, po sikoti nawota pano; nalakena tea suasua anigo e pei pito.

²⁷Go e po pasa pinoa ki tea suasua anigo paki nawota, nawota aginau; ma nawota, nawota aginau e dakiusi agelo sikai ki Sup̃e: nalakena tea wanogoe p̃a mari tea waina e p̃ia namatam̃a.

²⁸Nalakena tea mamau puti ni nasum̃a ki tamagu eu dakiusi naatam̃oli mate sua maga narae ni nawota, nawota aginau: ma ku lawo ki tea suasua anigo e doko m̃aleoputo ni tea maga waina eu ganikani wede ni nakaniana anigo. Go tea wanogoe ekasana aga moro pioso paki nawota?

²⁹Go nawota e noa ki nia, e naga, Ekasana nigo ku ko do pasa nalo ni naleo anigo maga? Kinau a naga, Nigo ma Siba koroga tap̃otae natano.

³⁰Go Mefibosheth e noa ki nawota, e naga, Io, nae ega tape tea mamau puti, nalakena nawota, nawota aginau e po umai natam̃ateana paki nasum̃a aneana.

³¹Go Barsillai, tea ni Cilead, e pae Rokelim siwo umai; go e sikoti nawota duagoto Yordan, e pitana ki nia duagoto Yordan.

³²Go Barsillai e pei mariki matua liu sikai, e peani natau rualima latolu: go e pakale nawota, po dua e navinaga, ragi waina e doko Mahanaim; nalakena nae e pei naatam̃oli vakilagi liu sikai.

³³Go nawota e noa ki Barsillai, e naga, P̃a tuagoto sikoti au, go aga wo mari m̃ata raki‐go sikoti au doko Yerusalem.

³⁴Go Barsillai e noa ki nawota, e naga, Naaleatia maga ni natau maga ni namauriana aginau eu pisa, naga aga sake sikoti nawota pano paki Yerusalem?

³⁵Naaleatia waia kinau a pei tea ni natau rualima latolu: a mariatae atae p̃otae tea wia go tea sa kite? Kinau tea suasua anigo, a mariatae dogo p̃otae tea waina a gani a, go tea waina a munugi a kite? A mariatae moro dogo nadaleo ni naanoai lega maga go nagoroi lega maga kite? Go tea wanogoe ekasana tea suasua anigo ega moro mari namadagaana sikai paki nawota, nawota aginau?

³⁶Tea suasua anigo ega sikoti nawota duagoto Yordan ega sikina: go ekasana nawota ega mori dua au namoriana dapala nogoe?

³⁷P̃a suasua ki tea suasua anigo, a pavara ni ko asa, naga ega moro liliu, naga aga mate natokoana aginau, po pei tea ovakiana nap̃irikia ni matigo ni tamagu go ni p̃ilagu. Ma p̃a leo, tea suasua anigo Kimham; ega tuagoto sikoti nawota, nawota aginau; go p̃a mari paki nia tea waina ega wo p̃ia namatam̃a.

³⁸Go nawota e pasadara, po naga, Kimham ega wo duagoto sikoti au, go aga wo mari paki nia tea waina ega wo p̃ia namatam̃a: go tea waina p̃a wo datagovi au asa, tea wanogoe aga wo manigo mari a.

³⁹Go narei mamau puti eu duagoto Yordan pano, go nawota e duagoto pano: go nawota e dum̃ili Barsillai, po pasa p̃ia ki nia; go e liliu paki tokora aneana pano.

⁴⁰Go nawota e duagoto pano paki Cilcal, go Kimham e duagoto sikoti a: go narei mamau puti ni Yudah nara ma namagovai ni narei ni Israel, eu morimori nawota pano.

⁴¹Go kuga leo, naatam̃oli mamau puti ni Israel eu rumai punusi nawota, po noa ki nawota, eu naga, Ekasana taigami maga, narei ni Yudah, eu puati panako ko pano, po piragi nawota go tea ni nasum̃a aneana duagoto Yordan umai, go naatam̃oli maga mamau puti ki David eu sikoti a?

⁴²Go naatam̃oli maga mamau puti ni Yudah eu pasadara naatam̃oli maga ni Israel, eu naga, Nalakena nawota e pei tea ni namatarau aginami: go ekasana ku maeto nalo kakana? Au po gani tea ni naulu mamau puti ki nawota kite? Kite nae e po dua gami te navituaana kite?

⁴³Go naatam̃oli maga ni Israel eu pasadara naatam̃oli maga ni Yudah, po naga, Kinami au peani matele rualima sikai doko nawota, go au moro peani tea warua do liu mu nalo ni David: go ekasana nimu ku midoaki p̃alo ki gami, go kinami au da pei tea vea mau waina au pasa nalo ni naliliuana ki nawota aginami kite? Go navasaana maga ki naatam̃oli maga ni Yudah eu kasua liu navasaana maga ki naatam̃oli maga ni Israel.