Read Nguna Togoa Etafe North 2 SAMUEL 20 Bible Online

2 SAMUEL 20 - Nguna Togoa Etafe North bible

2 SAMUEL 20

¹Go naatam̃oli p̃alo sikai e doko tokora wanogoe, nagisana Sheba, natu ni Bikri, naworawora ni Benyamin sikai: go e sui paiga, po naga, Tu da peani te matele mau doko David, go tu da peani naveanipiolikiana doko natu ni Yesse; sara naata ega sikasikai paki tap̃aup̃au adeada maga, Israel O.

²Go naatam̃oli maga mamau puti ni Israel eu sake pano m̃elu dua ki David po dausi Sheba, natu ni Bikri: ma naatam̃oli maga ni Yudah eu dausi puluvuluti nawota adeada, pae Yordan pa pa paki Yerusalem.

³Go David e umai paki nasum̃a aneana Yerusalem; go nawota e puati nagoroi rualima sikai, waina eu pei narup̃a aneana maga, waina e doropusi ra naga euga vavaigoro nasum̃a, go e pitua ki da paki navavaigoroana, po pakale ra, ma e da pa punusi ra mau. Go eu pei tea kokoroana pa pa paki naaleatia ni namateana adeada, dapala eu pei malepu maga.

⁴Go nawota e noa ki Amasa, e naga, P̃a maginau soso saisai ki naatam̃oli maga ni Yudah m̃ogi dolu, go nigo ma p̃a toko nea.

⁵Go Amasa e pano naga ega soso saisai ki naatam̃oli maga ni Yudah: ma e daliali liu natuta waina e datuta paki nia asa.

⁶Go David e noa ki Abishai, e naga, Ragi waia Sheba, natu ni Bikri, ega wo mari sa ki gida do liu Absalom: p̃a viragi tea suasua maga ki nawota anigo, po sava dausi a, mase e pe tum̃ana maneana puati natokoana ni p̃aaka maga, po mari duletulea ki gida.

⁷Go naatam̃oli maga ki Yoab eu edakugoro e pano, nara ma tea ni Kaftor go Filistine maga, go m̃aau maga mamau puti: go eu m̃elu pae Yerusalem pano, naga euga sava dausi Sheba, natu ni Bikri.

⁸Ragi waina eu doko tokora ni vatu warua waina e doko Cibeon, Amasa e umai sua ra. Go Yoab e do suni tea suniana ni navakalo, go tasoki sikai waina e pilake lova sikai doko nala kakana, e pei tea tasokiana namalona; go ragi waina e do surata pano, e m̃elu po dowo.

⁹Go Yoab e noa ki Amasa, e naga, Nigo ku p̃ia doko taigu kite? Go Yoab e puati nalolu ni nasi ni Amasa nam̃elearuna ni matua naga ega dum̃ili a.

¹⁰Go Amasa e dodo p̃arop̃aaro ki lova waina e doko nam̃elearu ni Yoab: go e atu p̃orae nap̃elena, po daki namaritana paki natano, go e da moro atugi a sala kerua mau; go e mate. Go Yoab ma taina Abishai ero kopa usi Sheba, natu ni Bikri.

¹¹Go naatam̃oli ni navakalo sikai ki Yoab e lawodu goro e, po naga, Tea waina e midoaki m̃ata ki Yoab, go tea waina e pei agi David, ega rausi Yoab.

¹²Go Amasa e one nadana one doko m̃aleoputo ni napua lapa; go ragi waina naatam̃oli wanogoe e punusi naga narei mamau puti eu du dorogo, e dape lua Amasa pa dua ki napua lapa paki namalasi, po kulugoro e ki sugoro sikai, ragi waina e punusi naga tea mamau puti waina eu pakilina ki nia, eu du dorogo.

¹³Ragi waina e pei tea tapeluaana pa dua ki napua lapa, narei mamau puti eu dausi Yoab pano, naga euga kopa usi Sheba, natu ni Bikri.

¹⁴Go e pano duaduru naworawora maga mamau puti ni Israel pa pa paki Abel, ni Beth‐maakah: go Berim mamau eu pei tea saisaikiana po moro dausi a pano.

¹⁵Go eu rumai po kelugoro e doko Abel ni Beth‐maakah, go eu nadi ki taua sikai ni natano dip̃a natokoana, go e lawodu dip̃a p̃aaka: go narei mamau puti waina eu sikoti Yoab eu duki p̃aaka naga euga nadi ki nia pakitano.

¹⁶Ragi wanogoe nagoroi manumatua sikai e pioso pae natokoana, po naga, Kuga rogo, kuga rogo; kuga noa ki Yoab, a pavara ni mu asa, kuga naga, P̃a umai paki m̃aladigi, naga aga vasa ki‐go.

¹⁷Go e umai paki m̃aladigi ki nia; go nagoroi wanogoe e naga, Nigo ku pei Yoab kite? Go e pasadara, e naga, Kinau a pei nae. Go e noa ki nia, e naga, P̃a takidorogo paki navasaana maga ki tea suasua nagoroi anigo. Go e pasadara, po naga, A do dakidorogo.

¹⁸Go e pasa, po naga, Eu noa ragi ni tuai, eu naga, Euga wo paki Abel po datago namidoakip̃otaeana: go dapala nogoe naleo wanogoe e nopu.

¹⁹Kinau a pei sikai ni tea maga waina eu matemate go eu saralomau doko Israel: ku laaga naga p̃a wo mari puoli ki natokoana sikai waina e pei p̃ila ni natokoana doko Israel: ekasana p̃a wo dinomi naveanipiolikiana ki Yehovah?

²⁰Go Yoab e pasadara, po naga, Ega tu uvea, ega tu uvea ki nau, naga aga dinomi kite mari puoli ki.

²¹Tea wanogoe e da pei lomau mau: ma naatam̃oli sikai ni malo ni tava ni Efraim, nagisana Sheba, natu ni Bikri, e sike nam̃elearuna dip̃a nawota, dip̃a David: p̃a vitua ki nia ega sikina, go aga wo m̃elu dua ki natokoana pano. Go nagoroi wanogoe e noa ki Yoab, e naga, P̃a leo, nap̃auna ega wo pei tea nadikiana kalau p̃aaka paki‐go.

²²Go nagoroi wanogoe e pa punusi narei mamau puti pae namanumatuaana aneana. Go eu daekotovi nap̃au ni Sheba, natu ni Bikri, po nadi ki nia paki etaku paki Yoab. Go e sui paiga, go eu daperavera m̃elu dua ki natokoana, sara naata eu sikasikai paki tap̃aup̃au adeada pano. Go Yoab e liliu paki Yerusalem pa punusi nawota.

²³Go Yoab e pei nap̃au ni taua ni naatam̃oli navakalo mamau ni Israel: go Benaiah, natu ni Yehoiada e pei nap̃au ni tea ni Kaftor go Filistine maga:

²⁴Go Adoram e pei tea leo parati ki nasautoga: go Yehoshafat, natu ni Ahilud, e pei tea terausi:

²⁵Go Sheva e pei tea midiri: go Sadok ma Abiathar ero pei tea viri maga:

²⁶Go Ira, tea ni Yair, nae ma e pei tea viri sikai ki David.