Read Nguna Togoa Etafe North 2 SAMUEL 21 Bible Online

2 SAMUEL 21 - Nguna Togoa Etafe North bible

2 SAMUEL 21

¹Go navitoloana sikai e pakilina naaleatia maga ki David natau eu dolu, natau rausi natau; go David e laaga narae ni Yehovah. Go Yehovah e naga, Nalakena e doko Saul, nada ni namaripunueana e doko asa go nasum̃a aneana, nalakena e doropusi tea ni Cibeon maga paki namateana.

²Go nawota e soso tea ni Cibeon maga umai, po pasa paki da; (tea ni Cibeon maga eu da pei tea ki Israel natuna maga mau, ma eu pei tea ki namagovai ni naka ni Amor; go Israel natuna maga eu pivisa paki da: go Saul e laaga naga ega mari punue ra nalakena namasauana aneana nalo ni Israel natuna maga go ni Yudah natuna maga:)

³Go David e noa ki tea ni Cibeon, e naga, Aga wo manimu mari nasava? Go aga wo mari natap̃augoroana ki nasava, naga kuga vasa p̃ia ki naveanipiolikiana ki Yehovah?

⁴Go tea ni Cibeon eu noa ki nia, eu naga, E da pei naleo sikai ni silver kite kold doko namawota kakagami ma Saul, kite nasum̃a aneana; go e da pei tea aginami naga auga mari punue te naatam̃oli doko Israel mau. Go e naga, Tea waina kuga wo noa e, tea wanogoe aga wo manimu mari a.

⁵Go eu noa ki nawota, eu naga, Naata waina e mari puoli ki gami, go waina e seke dip̃a gami naga auga vei tea maripuolikiana m̃elu dua ki kokoi maga ni Israel,

⁶Naata wanogoe ega tua gami natuna naanoai larua, go auga wo likoti ra dau narae ni Yehovah doko Cibeah ki Saul, tea matadoaana ki Yehovah. Go nawota e naga, Aga wo pitua ki da.

⁷Ma nawota e mauti Mefibosheth, natu ni Yonathan, natu ni Saul, nalakena navivisaana ki Yehovah waina e doko namawota kakada, namawota ni David go ni Yonathan, natu ni Saul.

⁸Go nawota e puati natu naanoai dua ki Rispah, Aiah natuna nagoroi, waina e magi Saul dape ra, Armoni go Mefibosheth; go natu naanoai lima ki Merab, Saul natuna nagoroi, waina e magi Adriel, natu ni Barsillai ni Meholath dape ra:

⁹Go e pitua ki da paki nam̃elearu ni tea ni Cibeon maga, go eu sara ki da dau tava warua narae ni Yehovah, go tea larua eu mamau puti dowo ragi sikai maau: go eu pei tea maripunueana ragi ni natagaukotoviana, ragi ni naaleatia vea maga, doko naatulakeana ni natagaukotoviana ni barle.

¹⁰Go Rispah, Aiah natuna nagoroi, e dape nakulukulu ni sak, po dum̃ana maneana p̃elesa ki nia doko elagi ni vatu, pae ragi ni naatulakeana ni natagaukotoviana pa pa noai ni nakoroatelagi e pei tea takiana ara; go e da suasua mau naga manu maga ni namalopa euga lawo ara aleati, kite nalo tuavati maga ni namalasi p̃ogi.

¹¹Go eu noa ki David tea waina Rispah, Aiah natuna nagoroi, narup̃a ki Saul, e mari a.

¹²Go David e pano, po dape lua navatu maga ni Saul go navatu maga ni natuna Yonathan m̃elu dua ki naatam̃oli maga ni Yabesh‐kilead, waina eu panako ra pae napua lapa ni Bethshan, tokora waina Filistine maga eu sara ki da dau asa, naaleatia waina Filistine maga eu mari punue Saul Cilboa:

¹³Go e dape lua navatu maga ni Saul go navatu maga ni natuna Yonathan sake m̃elu dua ki tokora wanogoe; go eu pila saisai ki navatu maga ni tea maga waina eu pei tea sarakiana.

¹⁴Go eu ova ki navatu maga ni Saul go ni natuna Yonathan navanua ni Benyamin doko Sela, matigo ni tamana Kish: go eu mari tea maga mamau puti waina nawota e dip̃aki da asa. Go edaku ki tea wanogoe eu magi navanua pavara ni Sup̃e.

¹⁵Go Filistine maga eu moro mari navakalo paki Israel; go David e siwo pano, go tea suasua aneana maga eu sikoti a pano, po mari navakalo dip̃a Filistine maga: go David e po manainai.

¹⁶Go Ishbibenob, waina e pei naworawora ni pule maga sikai kakada, waina namadagaana ni naio aneana e pei shekel ni brass p̃onotia dolu, waina e pilake lova vau, nae e midoaki nia naga ega mari punue David.

¹⁷Ma Abishai, natu ni Seruiah, e silae a, po atugi Filistine wanogoe, po mari punue a. Go naatam̃oli maga ki David eu pivisa paki nia, po naga, P̃a wo da moro dave sikoti gami pano paki navakalo mau, mase ku pe mari punue nasulu ni Israel.

¹⁸Go e pakilina edaku ki tea wanogoe, naga eu moro peani navakalo dip̃a Filistine maga doko Cob: ragi wanogoe Sibbekai, tea ni Hushah, e atugi Saf, waina e pei naworawora ni pule maga sikai kakada.

¹⁹Go eu moro peani navakalo dip̃a Filistine maga doko Cob; go Elhanan, natu ni Yaare‐orekim, ni Bethlehem, e atugi Coliath ni Cath, waina natura ni naio aneana e dakiusi nakau waina eu do pausi nakulukulu asa.

²⁰Go eu moro peani navakalo doko Cath, tokora waina naatam̃oli p̃atoko varau sikai e doko asa, waina nam̃elearuna maga eu sikasikai peani nakini latelatesa, go nam̃ele natuana maga eu sikasikai peani nakini latelatesa, naveveana kakada rualima dua tamate pati; go nae ma e pei naworawora ni pule maga sikai kakada.

²¹Go ragi waina e pasa p̃alo ki Israel, Yonathan, natu ni Shimei, David taina, e atugi a.

²²Naatam̃oli pati wanogoe eu pei naworawora ni pule maga ni Cath; go eu dowo pae nam̃elearu ni David, go pae nam̃elearu ni tea suasua aneana maga.