Read Nguna Togoa Etafe North 2 SAMUEL 22 Bible Online

2 SAMUEL 22 - Nguna Togoa Etafe North bible

2 SAMUEL 22

¹Go David e pasa paki Yehovah ki navasaana maga ni nalegaana waia, naaleatia waina Yehovah e pualua e m̃elu dua ki nam̃elearu ni tea kokona ki nia maga mamau puti, go m̃elu dua ki nam̃elearu ni Saul:

²Go e naga, Yehovah e pei vatu laketoko aginau, go nasum̃a ni p̃aaka aginau, go tea vualua au;

³Sup̃e aginau, vatu laketoko aginau, aga wo pavatu asa; Nakokoro aginau, go napati ni nap̃au ni namauti‐pauri‐au‐ana, Tokora vakilagi aginau, go tokora ni nasava‐sili‐ana aginau; Tea mauti pauri aginau, ku mauti au ki namarisakiana.

⁴Aga wo pioso paki Yehovah, waina e pei tea waina ega vei tea samasamaniana: Go aga wo pei tea mautipauriana m̃elu dua ki tea kokona ki nau maga.

⁵Nalakena napeao maga ni namateana eu dalivirigoro au, Noaisara maga ni nasigisigileoana eu mari au a mataku.

⁶Natali maga ni Sheol eu dalivirigoro au: Vaivai maga ni namateana eu sua au.

⁷Aga wo pioso paki Yehovah nariesoki‐au‐ana, Go aga wo kuapioso paki Sup̃e aginau. Go ega wo dogo nadaleogu pae nasum̃a tapu aneana, Go nakuapiosoana aginau ega wo sili nadaligana maga.

⁸Go maramana e nuanua po duruuru, Go laketano maga ni nakoroatelagi eu parivari, Po pei tea nuanuakiana, nalakena e maeto.

⁹Naasua e sake namaetoana aneana, Go nakapu waina e m̃elu nawokana e do ganikani: Nam̃elevara vavaga maga eu pei tea tokoniana asa.

¹⁰Go e kolo ki nakoroatelagi maga po siwo umai; Go namaligo ni napopouru e doko etano ki nam̃elena maga.

¹¹Go e sakesaake kerub sikai, po diri: Go e pei tea vunusiana e doko nalivaru maga ni nalagi.

¹²E mari namaligo e pei tap̃aup̃au aneana maga dalivirigoro e, Naviragi‐saisai‐kiana ki noai maga, napopouru maligo maga ni nakoroatelagi.

¹³Nalakena namarama ni kivea ki nia, nam̃elevara vavaga maga ni nakapu, eu pei tea tokoniana.

¹⁴Yehovah e mari tovae e kati nakoroatelagi, Go Tea Vakilagi mau, e pitua ki nadaleona.

¹⁵Go e dipe ki nalua maga, po daperavera ki da; Go ki navila, po marimatua ki da.

¹⁶Go nam̃orua maga ni natasi eu pei tea vunusiana, Laketano maga ni maramana eu dokolina, Nalakena navasa‐kasua‐ana ki Yehovah, Nalakena sui dakani namero ni namaetoana aneana.

¹⁷Ega wo dip̃aki lua pae elagi umai, ega wo puati au; Ega wo dosagi au m̃elu dua ki noai laapa;

¹⁸Ega wo pualua au m̃elu dua ki tea kokona ki nau waina e kasua, Go ki tea maga waina eu pilosi au; nalakena eu kasua liu au.

¹⁹Euga wo sua au naaleatia ni nariesoki‐au‐ana: Ma Yehovah e pei tea silae au.

²⁰Go e piragi lua au paki tokora welewelea sikai: Ega wo pualua au, nalakena e maro au.

²¹Yehovah ega wo lagati dua au ega vae namarinaleoleanaana aginau: Ega wo dua au liliu ega vae natautauana ni nam̃elearugu maga.

²²Nalakena a pavaigoro napua ki Yehovah, Go a da sigisigileo m̃elu dua ki Sup̃e aginau mau.

²³Nalakena navasap̃otaeana aneana maga mamau puti eu doko naraegu: Go natawonakiana aneana maga, a da dawasi m̃elu dua ki da mau.

²⁴Go a p̃ialua sikoti a, Go a dum̃agu pavaigoro au m̃elu dua ki namarinaleotageleana aginau.

²⁵Go Yehovah e dua au liliu pae namarinaleoleanaana aginau; Pae natautauana aginau kivea ki namatana maga.

²⁶Paki tea dodomi‐dodomiana p̃a wo mari dodomi, Paki naatam̃oli wialua p̃a wo mari p̃ialua;

²⁷Paki tea tautau p̃a wo mari dautau; Go paki tea tagele p̃a wo mari dagele.

²⁸Go p̃a wo mautipauri narei rogokitesa: Ma namatamu maga ero doko tea vakilagi maga, naga p̃a wo mari ra euga vakitano.

²⁹Nalakena nigo ku pei nasulu aginau, Yehovah O: Go Yehovah ega wo maramalagati namaligo aginau.

³⁰Nalakena pae ako aga wo sava sua taua sikai: Pae Sup̃e aginau aga wo diri kalau nakoro ni vatu sikai.

³¹Go Sup̃e, napua aneana e p̃ialua: Nanoaana ki Yehovah e pei tea maridogoana; Nae e magi tea maga mamau puti waina eu pavatu asa pei nakokoro sikai.

³²Nalakena sei e pei Sup̃e masale ki Yehovah? Go sei e pei vatu laketoko masale ki Sup̃e aginami?

³³Sup̃e e pei p̃aaka kasua aginau: go e digi pisei ki tea wialua napua aneana.

³⁴E do mari nam̃elegu maga ero dakiusi nam̃ele ni diir goroi maga: Go e do mari au a lawodu tokora vakilagi aginau maga.

³⁵E do pisei ki nam̃elearugu maga naga eroga mari navakalo; Go narugu ero pua p̃elua ki naasu ni brass sikai.

³⁶Go ku dua au nakokoro ni namautipauriana anigo: Go navakaleana anigo ega wo mari au aga warua.

³⁷P̃a wo mari p̃elewelea ki navasiana aginau maga etano ki nau, Go nam̃elegu maga eroga wo da pa parasai mau.

³⁸Aga wo sava dausi tea kokona ki nau maga, po mari puoli ki da: Go aga wo da liliu mau pa pa aga wo mari ra euga nopu.

³⁹Aga wo mari ra euga sirinopu, po atugi ra, naga euga wo da mariatae duleana mau: Euga wo dowo etano ki nam̃elegu maga.

⁴⁰Go ku dasoki au ki nakasuaana paki navakalo: P̃a wo mari tea maga waina eu duleana dip̃a au, Euga titip̃atua pakitano ki nau.

⁴¹Go ku mari tea kokona ki nau maga eu atutaku ki nau, Go tea vilosi au maga, aga wo mari ra euga vunuta.

⁴²Euga wo laaga, ma tea vualua e dika; Paki Yehovah, ma e da pasadara ra mau.

⁴³Go aga wo p̃oka p̃oraworae ra euga tapala nam̃otam̃ota ni natano, Aga wo pasi puludoa ra euga tapala nalepa ni napua maga ni natokoana, po daperavera ki da pano.

⁴⁴P̃a wo pualua au m̃elu dua ki navululuana ki narei aginau; P̃a wo mauti au aga vei nap̃au ni nalauna maga: Narei waina a da atae ra mau euga wo maginau suasua.

⁴⁵Tea ni navanua p̃ota maga euga wo doko etano sorosoro paki nau: Ragi waina euga wo dogo au euga wo dogo parati ki nau.

⁴⁶Tea ni navanua p̃ota maga euga wo manainai, Go euga wo duruuru umai m̃elu dua ki tokora kokoroana adeada maga.

⁴⁷Yehovah e mauri; go vatu laketoko aginau ega vei tea vasap̃iakiana; Go Sup̃e ni vatu laketoko ni namautipauri‐au‐ana, ega wo pei tea vakilagi:

⁴⁸Sup̃e waina e do maginau mari nasikosikoana maga, Go e mari narei maga eu doko etano paki nau.

⁴⁹E do pualua au m̃elu dua ki tea kokona ki nau maga: Go p̃a wo sike au pakilagi m̃elu dua ki tea maga waina eu duleana dip̃a au: P̃a wo pualua au m̃elu dua ki naatam̃oli ni namaripavakotoana.

⁵⁰Nalakena tea wanogoe aga wo pasa dodo m̃ata ki‐go, Yehovah O, m̃aleoputo ni nalauna maga, Go aga wo lega samasama ni nagisam̃a.

⁵¹E do magi nawota aneana mari namautipauriana warua maga: Go e do magi tea vuvuraikiana aneana mari nadodomiana. E do magi David go naworaworana mari a, pa pa e du mau du.