Read Nguna Togoa Etafe North 2 SAMUEL 23 Bible Online

2 SAMUEL 23 - Nguna Togoa Etafe North bible

2 SAMUEL 23

¹Go tea maga waia eu pei navasaana malaapa ki David. David, natu ni Yesse, e naga, go naatam̃oli waina e pei tea sikeana pakilagi, e naga, Tea vuvuraikiana ki Sup̃e ki Yakob, go aurea wia liu ni Israel:

²Naata ni Yehovah e pasa pae au, go navasaana aneana e doko namenagu.

³Sup̃e ni Israel e naga, Vatu Laketoko ni Israel e pasa paki nau: Tea maraki naatam̃oli, tea leana, Tea maramara matau ki Sup̃e,

⁴Ega tapala namarama ni malip̃ogi, ragi waina elo e do sake, malip̃ogi waina napopouru e dika; Ragi waina nam̃enau manainai e do p̃otu sake m̃elu natano, E do mamalakesa p̃ia edaku ki usa e sina.

⁵Go nasum̃a aginau e da dapala nogoe paki Sup̃e kite? Nalakena e mari paki nau navasasokiana sikai waina ega tu du po du mau du. Waina e pei tea lawo‐kilaketokoana nalo ni sara naleo, go tea toko p̃ia doko: Go namautipauri‐au‐ana mamau, go namasauana mamau aginau, Nae ega wo da mari a ega risu p̃ia kite?

⁶Ma tea sigisigileo euga wo mamau puti dakiusi tea makalikali maga, euga wo pei tea nadikiana pano, Nalakena eu marisa pei tea tapeana ki nam̃elearu mau:

⁷Ma naata waina ega wo kisidogo ra, ega wo pua nalikau maga ni airon go natura ni naio; Go euga wo pei tea tap̃arakiana ki nakapu.

⁸Tea maga waia eu pei nagisa ni m̃aau maga ki David: Yoshebbashebeth tea ni Takemon, nap̃au ni tasiga maga; nae waina e atugi naatam̃oli p̃onotia latolu ragi sikai maau.

⁹Go kerua kakana e pei Eleasar, natu ni Dodai, natu ni naatam̃oli sikai ni Ahoah, sikai kaka ni m̃aau dolu waina eu sikoti David, ragi waina eu pasa p̃alo ki Filistine maga waina eu saisai raki navakalo, go naatam̃oli maga ni Israel eu sake pano:

¹⁰E duleana, po atugi Filistine maga pa pa nam̃elearuna e manainai, go nam̃elearuna e puluti lova: Go Yehovah e mari namautipauriana warua naaleatia wanogoe; go narei eu dausi a liliu raki natapepavakotoana.

¹¹Go ketolu kakana e pei Shammah, natu ni Aki ni Harar. Go Filistine maga eu saisai Lehi, tokora wanogoe e pei matele ni natano sikai waina e pura ki lentil maga; go naatam̃oli maga eu sava pa dua ki narae ni Filistine maga.

¹²Ma e lawodu m̃aleoputo ni matele natano wanogoe, po lawo dugoro e, po atugi Filistine maga: go Yehovah e mari namautipauriana warua sikai.

¹³Go tea tolu ni naatam̃oli vakilagi ni rualima dolu eu siwo pano ragi ni natagaukotoviana po umai punusi David doko valea Adullam; go taua ni Filistine maga eu m̃enaki doko nap̃aloa ni Refaim.

¹⁴Go ragi wanogoe David e doko tokora kasua ni nasiliana doko, go naatam̃oli maga ni navakalo ni tea ni Filistine maga wanogoe eu doko Bethlehem doko.

¹⁵Go David e masau p̃arua, po naga, Awi, te naata e pe tua au noai pae m̃oru noai ni Bethlehem, waina e doko m̃aladigi ki namata‐pua, naga aga munu!

¹⁶Go m̃aau dolu wanogoe eu dua p̃alausi taua ni Filistine maga, po pautui noai m̃elu m̃oru noai ni Bethlehem, waina e doko m̃aladigi ki namata‐pua, po dape a umai dua David asa: ma e da masau munugi a mau, ma e daki nia paki Yehovah.

¹⁷Go e naga, Ega tu uvea ki nau, Yehovah O, naga aga mari tea waia: aga wo munu nada ni naatam̃oli maga waina eu pitua ki namauriana adeada kite? Nalakena tea wanogoe e da suasua munugi a. Naleo maga waia, m̃aau dolu wanogoe eu mari ra.

¹⁸Go Abishai, tai ni Yoab, natu ni Seruiah, nae e pei nap̃au ni tea rualima dolu. Go e sike naio aneana dip̃a p̃onotia dolu po atugi ra, go e peani nagisa sikai sikoti tea tolu.

¹⁹Nae e pei tea dodomadaganiana warua liu ni tea rualima dolu wanogoe, po pei nap̃auda: ma eu da pataka sikai ma tea tolu mau.

²⁰Go Benaiah, natu ni Yehoiada, natu ni m̃aau sikai ni Kabseel, waina e mari nawosiana rogoana maga, nae e atugi naatam̃oli naanoai dua ni Ariel ni Moab: go e moro siwo pano ragi ni sno, po atugi laion sikai doko m̃oru sikai:

²¹Go e atugi tea ni Ityipt sikai, naatam̃oli raewia: go naatam̃oli ni Ityipt wanogoe e puati naio doko nam̃elearuna; ma e siwo pano punusi a pilake tiko, po puati lua naio ki nam̃elearu ni naatam̃oli ni Ityipt, po atugi a ki aneana naio.

²²Benaiah, natu ni Yehoiada, e mari naleo maga wanogoe, go e peani nagisa sikai sikoti m̃aau dolu wanogoe.

²³E pei tea dodomadaganiana warua liu ni naatam̃oli rualima dolu wanogoe, ma eu da pataka sikai ma tea tolu wanogoe mau. Go David e lawo ki nia e pei nap̃au ni tea leogoro aneana maga.

²⁴Asahel, tai ni Yoab, e pei naatam̃oli rualima dolu sikai kakada; Elhanan, natu ni Dodo ni Bethlehem; Shammah,

²⁵tea ni Harod, Elika, tea ni Harod;

²⁶Heles, tea ni Palti, Ira, natu ni Ikkesh, tea ni Tekoa;

²⁷Abieser, tea ni Anathoth, Mebunnai, tea ni Hushah;

²⁸Salmon, tea ni Ahoah, Maharai, tea ni Netofah;

²⁹Heleb, natu ni Baanah, tea ni Netofah, Ittai, natu ni Ribai ni Cibeah ni Benyamin natuna maga;

³⁰Benaiah, tea ni Pirathon, Hiddai, tea ni tokora ni nap̃ap̃a maga ni Caash;

³¹Abi‐albon, tea ni Arbath, Asmaveth, tea ni Bahurim;

³²Eliahba, tea ni Shaalbon, Yashen natuna maga, Yonathan;

³³Shammah, tea ni Harar, Ahiam, natu ni Sharar, tea ni Arar;

³⁴Elifelet, natu ni Ahasbai, natu ni tea ni Maakah, Eliam, natu ni Ahithofel tea ni Ciloh;

³⁵Hesro, tea ni Karmel, Paarai, tea ni Arbi;

³⁶Ikal, natu ni Nathan, tea ni Sobah, Bani, tea ni Cad;

³⁷Selek, tea ni Ammon, Naharai, tea ni Beeroth, tea to dape nalikau maga ki Yoab, natu ni Seruiah;

³⁸Ira, tea ni Ithri, Careb, tea ni Ithri;

³⁹Uriah, tea ni Heth: tea mamau puti eu pei naatam̃oli rualima dolu tamate larua.