Read Nguna Togoa Etafe North 2 SAMUEL 24 Bible Online

2 SAMUEL 24 - Nguna Togoa Etafe North bible

2 SAMUEL 24

¹Go namaetoana ki Yehovah e moro pavaga dip̃a Israel, go e pasadie p̃arua ki David dip̃a ra, po naga, P̃a vano, po peve parati ki Israel go Yudah.

²Go nawota e noa ki Yoab, tea maraki taua ni naatam̃oli navakalo maga, waina e sikoti a, e naga, P̃a vano, po surata duaduru usuraki naworawora maga mamau puti ni Israel, pae Dan pano pa pa paki Beer‐sheba, go p̃a veve parati ki narei, naga aga atae parati ki naveveana ni narei.

³Go Yoab e noa ki nawota, e naga, Yehovah Sup̃e anigo ega rogovi nalaapaana ni narei dapala vatuna, e pe vaka p̃onotia, go namata ni nawota, nawota aginau, ega vunusi a: ma ekasana nawota, nawota aginau, e masau naleo waia?

⁴Ma navasaana ki nawota e marimatua ki Yoab, go ki tea maraki maga ni taua ni naatam̃oli navakalo. Go Yoab ma tea maraki maga ni taua ni naatam̃oli navakalo eu dave pano m̃elu dua ki narae ni nawota, naga euga veve parati ki narei ni Israel.

⁵Go eu duagoto Yordan pano, po sike tap̃aup̃au adeada maga Aroer, taleva ni matua ni natokoana waina e doko m̃aleoputo ni nap̃aloa ni Cad, go paki Yaser:

⁶Go eu paki Cilead, go paki navanua ni Tahtim‐hodshi; go eu paki Dan‐yaan, po daliviri paki Sidon,

⁷Po umai paki natokoana ni p̃aaka ni Tair, go paki natokoana maga mamau puti ni naworawora maga ni Hivah, go ni naworawora maga ni Kanaan: go eu pano paki taleva ni sauth ni Yudah, pa pa paki Beer‐sheba.

⁸Go ragi waina eu surata sua duaduru usuraki navanua mamau, eu rumai paki Yerusalem edaku ki atelagi keloveti go naaleatia kerualima dua eu nopu.

⁹Go Yoab e pitua ki naveve‐parati‐kiana ni naatam̃oli paki nawota: go doko Israel, m̃aau maga waina eu puati lova eu pei naatam̃oli manu p̃onotia latolu; go naatam̃oli maga ni Yudah eu pei manu p̃onotia lima.

¹⁰Go nap̃op̃o ni David e atugi a, edaku ki waina e peve parati ki sua narei maga. Go David e noa ki Yehovah, e naga, A po mari naleo sa warua ki tea waina a po mari a: ma ragi waia Yehovah O, a pavara ni ko, p̃a tape lua namarinaleotageleana ki tea suasua anigo; nalakena a po mari manumatavusa.

¹¹Go ragi waina David e duleana malip̃ogi, navasaana ki Yehovah e umai paki profeta Cad, tea kikita ki David,

¹²e naga, P̃a vano, po noa ki David naga Yehovah e noa dapala nea, A dua ko naleo dolu; p̃a matadoa sikai kakada naga a mariatae manigo mari a.

¹³Go Cad e umai punusi David, po noasai paki nia, e noa ki nia, e naga, Ku masau natau dolu ni navitoloana ega wo umai pakilina ki‐go navanua anigo? Kite ku masau naga p̃a wo sava narae ni tea kokona ki‐go maga atelagi dolu, ragi waina nara euga wo kopasi ko? Kite ku masau naga nasasanaana ni namateana ega wo doko navanua anigo naaleatia dolu? P̃a midoakiusiusi, po midoaki p̃otae seve navasadaraana aga wo dape a liliu paki tea waina e dip̃aki lua au umai.

¹⁴Go David e noa ki Cad, e naga, Kinau a pei tea riesokip̃arua‐kiana: tuga rowo paki nam̃elearu ni Yehovah: nalakena nadodomiana aneana maga eu p̃arua: go aga ta dowo paki nam̃elearu ni naatam̃oli mau.

¹⁵Go Yehovah e dip̃aki lua nasasanaana ni namateana sikai paki Israel pae malip̃ogi pa pa paki ragi tatutakiana: go narei waina eu mate asa pae Dan pa pa paki Beer‐sheba eu pei naatam̃oli tivilia larua.

¹⁶Go ragi waina agelo e sai ki nam̃elearuna paki Yerusalem naga ega mari sa sa ki nia, Yehovah e midoaki piri nasaana wanogoe, go e noa ki agelo waina e mari sa sa ki narei, e naga, E pataka; p̃a tugoro nam̃elearum̃a. Go agelo ki Yehovah e doko pisari malo wokalesue ki Araunah, tea ni Yebus.

¹⁷Go David e pasa paki Yehovah, ragi waina e punusi agelo waina e do atugi narei, po noa ki nia, e naga, P̃a leo, a po mari naleo sa, go a po mari dagele: ma shiip maga waia, nara eu mari tea sa nasava? A pavara ni‐ko naga nam̃elearum̃a ega to dip̃a au, go ega tip̃a tea ni nasum̃a ki tamagu.

¹⁸Go Cad e umai punusi David naaleatia wanogoe, po noa ki nia, e naga, P̃a sake pano, p̃a magi Yehovah davagi wede ni naviriana sikai malo wokalesue ki Araunah, tea ni Yebus.

¹⁹Go David e sake pano pataka ni navasaana ki Cad, dapala waina Yehovah e dip̃aki nia asa.

²⁰Go Araunah e leo, po punusi nawota go tea suasua aneana maga eu do surata datarae: go Araunah e dave pano, po kolo suai natano narae ni nawota.

²¹Go Araunah e naga, Ekasana nawota, nawota aginau, e umai punusi tea suasua aneana? Go David e naga, Aga vakotovi malo wokalesue kiam̃a, naga aga magi Yehovah davagi wede ni naviriana sikai; naga nasasanaana ni namateana ega maro m̃elu dua ki narei.

²²Go Araunah e noa ki David, e naga, Nawota, nawota aginau ega tape po pitua ki tea waina e punusi naga e p̃ia namatana: p̃a leo, oks maga nea raki navituaana tap̃arakiana, go tea worosi maga go nakau ni nanoa ni oks maga nea raki nakapu:

²³Sara naleo mamau puti waia, nawota O, Araunah e do dua nawota asa. Go Araunah e noa ki nawota, e naga, Yehovah Sup̃e anigo ega saup̃ia ki‐go.

²⁴Go nawota e noa ki Araunah, e naga, Ee; ma aga wo pakotovi a kiam̃a ki namoriana sikai: aga wo da pitua ki naviriana tap̃arakiana paki Yehovah Sup̃e aginau mau ki tea waina a dape m̃oli ki nia. Go David e pakotovi malo wokalesue wanogoe go oks maga ki shekel ni silver rualima lima.

²⁵Go David e magi Yehovah davagi wede ni naviriana sikai tokora wanogoe, po pitua ki naviriana tap̃arakiana maga, go naviriana maga ni natam̃ateana. Go Yehovah e dogo navavaraniana nalo ni navanua, go nasasanaana ni namateana e makoto pa dua ki Israel.