Read Nguna Togoa Etafe North 2 SAMUEL 3 Bible Online

2 SAMUEL 3 - Nguna Togoa Etafe North bible

2 SAMUEL 3

¹Go navakalo parau sa e doko namawota ni nasum̃a ki Saul go ni nasum̃a ki David: go David e disu po kasua po moro kasua, ma nasum̃a ki Saul e manainai po moro manainai.

²Go natuna naanoai maga eu magi David pakilina Hebron: go tea takalapa aneana e pei Amnon, ki Ahinoam nagoroi ni Yesreel;

³Go kerua aneana Kileab, ki Abikail nagoroi ki Nabal, naatam̃oli ni Karmel; go ketolu Absalom, natu ni Maakah, natu nagoroi ki Talmai, nawota ni Ceshur;

⁴Go kevati, Adoniyah natu ni Hakkith; go kelima, Shefatiah natu ni Abital;

⁵Go kelatesa, Ithream ki Eklah, nagoroi ki David. Tea maga waia eu magi David pakilina Hebron.

⁶Go e pakilina, ragi waina navakalo e ko doko namawota ni nasum̃a ki Saul, go ni nasum̃a ki David, naga Abner e dum̃ana mari a e kasua m̃aleoputo ni nasum̃a ki Saul.

⁷Go Saul e peani narup̃a sikai, nagisana Rispah, natu ni Aiah: go Ish‐bosheth e noa ki Abner, e naga, Ekasana nigo ku sili punusi narup̃a ki tamagu?

⁸Go Abner e maeto p̃arua nalakena navasaana ki Ish‐bosheth, go e naga, Kinau a pei nap̃au ni koria sikai waina e pei agi Yudah, kite? Naaleatia waia a mari nadodomiana paki nasum̃a ki tamam̃a Saul, go paki taina maga, go paki tana ri maga, go a da pitua ki‐go paki nam̃elearu ni David mau, ma nigo ku do pasa dip̃a au naaleatia waia ki namarisakiana nalo ni nagoroi wanogoe.

⁹Sup̃e ega mari dapala nogoe paki Abner, go ega moro mari a, waina kinau, dapala waina Yehovah e pivisa paki David asa, a pe ta mari ega tapala nogoe paki nia;

¹⁰Po dape lua namarakiana m̃elu dua ki nasum̃a ki Saul, po lawo‐ki‐laketoko malo tasake ki David dap̃au Israel go dap̃au Yudah, pae Dan pa pa paki Beer‐sheba.

¹¹Go e marisa moro pasa paki Abner te navasaana nalakena e matau ki nia.

¹²Go Abner e maneana dip̃aki lua tea tautauana maga pa punusi David, po naga, Navanua e pei agi sei? Go e moro naga, P̃a mari navasasokiana anigo sikai paki nau, go p̃a leo, nam̃elearugu ega sikoti ko, naga ega roa Israel mamau paki‐go.

¹³Go e naga, E p̃ia; aga wo mari navasasokiana sikai paki‐go: ma naleo sikai aga tatagovi ko asa, e pei naga p̃a wo da punusi naraegu mau, waina ku pe ta pea piragi Mikal, Saul natuna nagoroi, umai ragi waina nigo p̃a wo umai naga p̃a vunusi naraegu.

¹⁴Go David e dip̃aki lua tea tautauana maga pa punusi Ish‐bosheth, Saul natuna naanoai, po naga, P̃a tua au nagoroi aginau Mikal, waina a dawiri a e pei aginau ki nawili vea p̃onotia sikai ni Filistine maga.

¹⁵Go Ish‐bosheth e dip̃aki lua, po pualua e m̃elu dua ki anawota, e pei Paltiel, natu ni Laish.

¹⁶Go anawota e sikoti a pano, po do dagi, go e dausi a paki Bahurim. Go Abner e noa ki nia, e naga, P̃a liliu pano: go e liliu pano.

¹⁷Go Abner e pasa paki tea matua maga ni Israel, e naga, Ragi maga waina eu pano sua, ku laaga naga David ega vei nawota dap̃au mu:

¹⁸Ita, kuga mari a: nalakena Yehovah e po pasa nalo ni David, e naga, Ki nam̃elearu ni tea suasua aginau David, aga wo mauti narei aginau Israel m̃elu dua ki nam̃elearu ni Filistine maga, go m̃elu dua ki nam̃elearu ni tea kokona ki da maga mamau puti.

¹⁹Go Abner e moro pasa nadaliga ni Benyamin: go Abner e pano naga ega moro pasa nadaliga ni David, Hebron, ki sara navatuna waina eu p̃ia narae ni Israel, go narae ni nasum̃a mamau ni Benyamin.

²⁰Go Abner e umai paki Hebron punusi David, nara ma naatam̃oli rualima dua eu mamau. Go David e magi Abner go naatam̃oli maga waina eu sikoti a, mari nakaniana sikai.

²¹Go Abner e noa ki David, e naga, Aga wo duleana po pano, po piragi saisai ki Israel mamau umai punusi nawota aginau nawota O, naga euga mari navasasokiana sikai paki‐go, go naga p̃a maramara dap̃au tea mamau puti waina nap̃op̃om̃a e masauna. Go David e dip̃aki lua Abner; go e pae natam̃ateana pano.

²²Go p̃a leo, tea suasua maga ki David go ki Yoab eu paraki navakalo pano po moro umai, go eu dape tea vuapavakotoana warua umai: ma Abner e da doko Hebron doko sikoti David mau; nalakena e dip̃aki lua e pano, go e pae natam̃ateana pano.

²³Ragi waina Yoab go taua mamau waina eu sikoti a eu mamau umai, eu noa ki Yoab, eu naga, Abner, natu ni Ner, e umai punusi nawota, go e dip̃aki lua e pano, go e pae natam̃ateana pano.

²⁴Ragi wanogoe Yoab e umai punusi nawota, po naga, Ku po mari nasava? P̃a leo, Abner e umai punusi ko; ekasana ku dip̃aki lua e pano, go e pano sua?

²⁵Nigo ku atae Abner, natu ni Ner, naga e umai naga ega surue ko, naga ega atae natave‐pano‐ana anigo go nasili‐umai‐ana anigo, go naga ega atae sara naleo waina ku mari a.

²⁶Go Yoab e m̃elu dua ki narae ni David, po dip̃aki lua tea tautauana maga pano paraki Abner, go eu piragi a liliu umai pae namata noai ni Sirah: ma David e da atae a mau.

²⁷Go Abner e moro liliu pano paki Hebron, go Yoab e pua da ki nia paki taleva ni namata‐pua naga ega vasa matemate paki nia, go tokora wanogoe e atu nap̃elena, go e mate, nalakena nada ni taina Asahel.

²⁸Go edaku ki nia, ragi waina David e dogo e, e naga, Kinau a dautau, go namarakiana aginau, narae ni Yehovah ki nada ni Abner, natu ni Ner:

²⁹Ega rowo paki nap̃au ni Yoab, go paki nasum̃a mamau ki tamana; go nasum̃a ni Yoab ega ta dika mau ki tea waina e peani namanuka sa, kite waina e pei lepero, kite waina e do ovi tiko, kite waina e dowo ki lova, kite waina e dika navinaga.

³⁰Go dapala nogoe Yoab go taina Abishai ero maripunue Abner, nalakena nae e maripunue taida Asahel navakalo doko Cibeon.

³¹Go David e noa ki Yoab, go ki naatam̃oli maga mamau puti waina eu sikoti a, e naga, Kuga tum̃amu puap̃orae sugoro animu maga, po dum̃amu dasoki mu ki nakulukulu ni sak, go kuga tagisi Abner. Go nawota David e dausi vala.

³²Go eu ova ki Abner Hebron: go nawota e sike nadaleona, po dagi matigo ni Abner; go narei eu mamau puti dagi.

³³Go nawota e dagisi Abner, po naga, Namateana ki Abner e dakiusi lala waina e mate kite?

³⁴Nam̃elearum̃a ero da pei tea solisokiana, Go nam̃elem̃a ero da doko tea moti nam̃ele mau: Dapala waina naata e dowo narae ni tea mari naleo tagele, Dapala nogoe nigo ku dowo. Go narei maga mamau puti eu moro dagisi a.

³⁵Go narei mamau puti eu rumai naga euga mari David ega kanikani, go e ko aleati doko; ma David e pivisa, po naga, Sup̃e ega mari a paki nau, go ega moro mari a, waina a pe katidogo bred, kite te navatuna p̃ota, pea ki elo musu.

³⁶Go narei mamau puti eu midoaki parati ki nia, go e p̃ia namatada: e dakiusi sara naleo waina nawota e mari a, e p̃ia namatada.

³⁷Go narei mamau puti go Israel mamau eu atae a naaleatia wanogoe naga e da pei namasauana ki nawota naga ega maripunue Abner, natu ni Ner.

³⁸Go nawota e noa ki tea suasua aneana maga, e naga, Ku da atae naga tea maraki sikai, naatam̃oli warua, e dowo Israel naaleatia waia kite?

³⁹Go naaleatia waia kinau a manainai, ma a pei tea vuvuraikiana a pei nawota; go naatam̃oli maga wanogoe, Seruiah natuna naanoai maga, eu kasua do liu au: Yehovah ega lagati dua tea sigisigileo pataka ni nasigisigileoana aneana.