Read Nguna Togoa Etafe North 2 SAMUEL 5 Bible Online

2 SAMUEL 5 - Nguna Togoa Etafe North bible

2 SAMUEL 5

¹Go nalauna maga ni Israel eu mamau puti umai paki Hebron punusi David, go eu pasa po naga, P̃a leo, kinami au pei navatum̃a go nap̃okasim̃a.

²Ragi maga waina eu pano sua, ragi waina Saul e pei nawota dap̃au gida, nigo ku maraki Israel eu do dave pano, po do moro umai: go Yehovah e noa ki‐go, e naga, P̃a wo pagani narei aginau Israel, go p̃a wo pei tea maraki dap̃au Israel.

³Go tea matua maga mamau puti ni Israel eu rumai paki Hebron punusi nawota; go nawota David e mari navasasokiana sikai paki da doko Hebron, narae ni Yehovah: go eu puvurai ki David e pei nawota dap̃au Israel.

⁴David e peani natau rualima dolu ragi waina e atulake maramara, go e maramara natau rualima pati.

⁵Doko Hebron e maramara dap̃au Yudah natau larua go atelagi latesa: go doko Yerusalem e maramara dap̃au Israel mamau ma Yudah natau rualima dolu tamate dolu.

⁶Go nawota ma naatam̃oli aneana maga eu paki Yerusalem pano po mari dip̃a tea ni Yebus, naatatoko maga ni navanua wanogoe: go nara eu noa ki David, eu naga, P̃a wo da umai paki tokora waia mau, tea kesa go tea vei pito maga euga wo dugoro ko: eu midoa ki nia naga David e da mariatae sili umai paki tokora wanogoe mau.

⁷Ma David e puati tokora kasua ni Sion; tea wanogoe e pei natokoana ki David.

⁸Go naaleatia wanogoe David e naga, Naata waina ega atugi naatam̃oli ni Yebus, ega sake paki nap̃ap̃a, po atugi tea vei pito, go tea kesa, waina naata ni David e karaikita ra. Nalakena tea wanogoe eu naga, Tea kesa maga, go tea vei pito eu doko; e marisa sili paki nasum̃a mau.

⁹Go David e doko tokora kasua wanogoe doko, po soso e ki natokoana ki David. Go David e davagi nasum̃a maga daliviri, pae Millo paki m̃aleoputo.

¹⁰Go David e disu po p̃arua po moro p̃arua pa; nalakena Yehovah, Sup̃e ki taua maga, e sikoti a doko.

¹¹Go Hairam, nawota ni Tair, e dip̃aki lua tea tautauana maga pa punusi David, go nakau sidar, go mataisau ni nakau, go mataisau ni vatu: go eu magi David davagi nasum̃a sikai.

¹²Go David e atae naga Yehovah e lawosoki a e pei nawota dap̃au Israel, go naga e sike namarakiana aneana pakilagi nalakena narei aneana Israel.

¹³Go David e dum̃ana maneana moro piragi lua narup̃a maga go nagoroi maga m̃elu dua ki Yerusalem, edaku ki waina e pae Hebron umai: go natuna naanoai maga go natuna nagoroi maga eu moro magi David pakilina.

¹⁴Go tea maga waia eu pei nagisa ni tea maga waina eu maneana pakilina Yerusalem; Shammua, go Shobab, go Nathan, go Solomon,

¹⁵Go Ibhar, go Elishua; go Nefek, go Yafia;

¹⁶Go Elishama, go Eliada, go Elifelet.

¹⁷Go ragi waina Filistine maga eu dogo naga eu puvurai ki David e pei nawota dap̃au Israel, Filistine maga eu mamau puti sake pano naga euga laaga David; go David e dogo e, po siwo paki tokora kasua pano.

¹⁸Go Filistine maga eu rumai po dum̃ada daperavera ki da nap̃aloa ni Refaim.

¹⁹Go David e pusuusu paki Yehovah, po naga, Aga wo sake pano dip̃a Filistine maga kite? P̃a wo pitua ki da paki nam̃elearugu kite? Go Yehovah e noa ki David, e naga, P̃a sake pano: nalakena lomau aga wo pitua ki Filistine maga paki nam̃elearum̃a.

²⁰Go David e paki Baal‐perasim, go David e atugi ra tokora wanogoe; go e naga, Yehovah e po saraaki tea kokona ki nau maga naraegu, dakiusi nasaraakiluaana ni noai maga. Nalakena tea wanogoe e soso nagisa ni tokora wanogoe ki Baal‐perasim.

²¹Go eu doropusi nasup̃e adeada maga eu doko tokora wanogoe, go David ma naatam̃oli aneana maga eu piragi lua ra pano.

²²Go Filistine maga eu moro sake umai sala kerua, po dum̃ada daperavera ki da nap̃aloa ni Refaim.

²³Go ragi waina David e pusuusu paki Yehovah, go e naga, P̃a wo da sake pano mau: p̃a taliviri po pae natakuda, po pa parati ki da kivea ni nakau mulberri.

²⁴Go ega wo doko, ragi waina p̃a rogo nasaruruana ni nasurataana nam̃asua ni nakau mulberri maga, ragi wanogoe p̃a m̃araverave marimari: nalakena Yehovah e pea ki‐go naga ega atu taua ni Filistine maga.

²⁵Go David e mari dapala nogoe, dapala waina Yehovah e dip̃aki nia asa; go e atugi Filistine maga pae Ceba pa pa ku paki Ceser.