Read Nguna Togoa Etafe North 2 SAMUEL 7 Bible Online

2 SAMUEL 7 - Nguna Togoa Etafe North bible

2 SAMUEL 7

¹Go e pakilina, ragi waina nawota e doko nasum̃a aneana doko, go Yehovah e dua e namaromaroana pa dua ki tea kokona ki nia maga mamau puti daliviri,

²Naga nawota e noa ki profeta Nathan, e naga, P̃a vunusi, kinau a doko nasum̃a sikai ni sidar, ma areka ki Sup̃e e doko tap̃aup̃au‐tokoana ni nakulukulu.

³Go Nathan e noa ki nawota, e naga, P̃a vano, p̃a mari tea mamau puti waina e doko nap̃op̃om̃a; nalakena Yehovah e sikoti ko doko.

⁴Go e pakilina p̃ogi sikai maau wanogoe, naga navasaana ki Yehovah e pakilina ki Nathan,

⁵po naga, P̃a vano po noakisai tea suasua aginau David, p̃a naga, Yehovah e pasa dapala nea, e naga, Nigo p̃a wo maginau davagi nasum̃a sikai naga aga toko asa doko, kite?

⁶Nalakena a da doko nasum̃a sikai doko mau, pae naaleatia waina a piragi Israel natuna maga sake m̃elu dua ki Ityipt umai, pa pa p̃aki naaleatia waia, ma a surata tap̃aup̃au go nasum̃atokoana.

⁷Go tokora maga mamau puti waina a surata ara sikoti Israel natuna maga mamau puti, kinau a pasa ki navasaana sikai paki naworawora maga ni Israel sikai kakada, waina a dip̃aki da euga vagani narei aginau Israel, po naga, Ekasana ku da maginau davagi nasum̃a sikai ni sidar?

⁸Go nalakena tea wanogoe p̃a noa dapala nea paki tea suasua aginau David, p̃a naga, Yehovah ki taua maga e pasa dapala nea, e naga, A piragi lua ko m̃elu dua ki napega, m̃elu dua ki naleoparati‐kiana ni shiip, naga p̃a vei tea maraki dap̃au narei aginau, dap̃au Israel:

⁹Go a sikoti ko sara tokora waina ku paki asa, go a mari puoli ki tea kokona ki‐go maga mamau puti pa dua ki naraem̃a; go aga wo mari nagisam̃a ega warua, dakiusi nagisa ni tea warua maga waina eu doko maramana.

¹⁰Go aga wo dawona ki tokora sikai raki narei aginau Israel, po lawo ki da naga euga toko tokora adeada doko, po da moro pei tea risuakiluaana mau; go natu ni nasigisigileoana euga ta moro mari ra euga rogokitesa mau dakiusi sala vea,

¹¹Go dakiusi pae naaleatia waina a dip̃aki tea vasap̃otae maga euga tap̃au narei aginau Israel; go aga wo mari ko p̃a maromaro pa dua ki tea kokona ki‐go maga mamau puti. Go Yehovah e moro noa ki‐go asa naga Yehovah ega wo manigo dawona ki nasum̃a sikai.

¹²Ragi waina naaleatia anigo maga euga nopu, go p̃a wo maturu one sikoti tamam̃a maga, aga wo lawo ki naworaworam̃a edaku ki‐go, waina ega wo m̃elu namaritam̃a, go aga wo lawo‐ki‐laketoko namarakiana aneana.

¹³Nae ega wo davagi nasum̃a raki nagisagu, go kinau aga wo lawo‐ki‐laketoko malo tasake ni namarakiana aneana ega tu du po du mau du.

¹⁴Kinau aga wo pei tamana, go nae ega wo pei natugu: waina e pe mari namarinaleotageleana, a pe wo parati a ki nakau varati ni naatam̃oli, go ki navaratiana ni naatam̃oli natuna maga;

¹⁵Ma nadodomiana aginau ega wo da m̃elu dua ki nia mau, dapala waina a dape lua e m̃elu dua ki Saul, waina a pualua e m̃elu dua ki naraem̃a.

¹⁶Go nasum̃a anigo go namarakiana anigo eroga wo doko mau doko naraem̃a: malo tasake anigo ega wo pei tea lawo‐ki‐laketokoana pa pa po du mau du.

¹⁷Dapala navasaana maga mamau puti wanogoe, go dapala navunusiana mamau wanogoe, dapala nogoe Nathan e pasa paki David.

¹⁸Go nawota David e pano, po doko narae ni Yehovah; go e naga, Kinau a pei sei, Yehovah Sup̃e O, go nasum̃a aginau e pei nasava, naga ku mari au a pakilagi?

¹⁹Ma tea wanogoe e kiki namatam̃a, Yehovah Sup̃e O; ma ku moro pasa nalo ni nasum̃a ni tea suasua anigo nalo ni tagona laapa waina euga wo edaku; go tea wanogoe, Yehovah Sup̃e O, e pei nawotaeana raki naatam̃oli kite?

²⁰Go David ega moro noa nasava paki‐go? Nalakena nigo ku atae tea suasua anigo, Yehovah Sup̃e O.

²¹Nalakena navasaana anigo, go pae nap̃op̃om̃a, ku po mari nawaruaana mamau wanogoe, naga tea suasua anigo ega atae a.

²²Go nigo ku p̃arua, Yehovah Sup̃e O: nalakena tea takiusi ko e da doko mau, go te Sup̃e p̃ota e da doko mau ma nigo sikim̃a, e dakiusi tea mamau puti waina au dogo e ki nadaligagami.

²³Go seve nalauna ni maramana e dakiusi narei anigo, dakiusi Israel, waina Sup̃e e pano naga ega taulua e ega vei narei aneana, go naga ega maneana mari nagisa sikai, po manigo mari naleo warua maga, go magi navanua anigo mari naleo mataukiana maga, po kopasi lua nalauna maga go sup̃e adeada maga pa dua ki narae ni narei anigo, waina ku daulua e m̃elu dua ki Ityipt naga ega vei anigo?

²⁴Go ku dum̃am̃a manigo lawo‐kilaketoko narei anigo Israel naga euga vei narei anigo pa pa ega tu mau du; go nigo, Yehovah, ku po pei Sup̃e adeada.

²⁵Go ragi waia, Yehovah Sup̃e O, navasaana waina ku pasa asa nalo ni tea suasua anigo, go nalo ni nasum̃a aneana, p̃a lawosoki a ega tu mau du, go p̃a mari dapala waina ku noa e.

²⁶Go nagisam̃a ega vei tea warua pa pa po du mau du, doko do naga, Yehovah ki taua maga e pei Sup̃e dap̃au Israel: go nasum̃a ki tea suasua anigo David ega wo pei tea lawo‐ki‐laketokoana naraem̃a.

²⁷Nalakena nigo, Yehovah ki taua maga, Sup̃e ki Israel, ku noa pakasa ki paki tea suasua anigo, po naga, Aga wo manigo davagi nasum̃a sikai: nalakena tea wanogoe tea suasua anigo e pap̃ai naviviariana nap̃op̃ona naga ega tapasavasa ki natapasavasaana waia paki‐go.

²⁸Go Yehovah Sup̃e O, nigo ku pei Sup̃e, go navasaana anigo maga eu pei nalomauana, go ku sai naleo wia wanogoe paki tea suasua anigo:

²⁹Nalakena tea wanogoe p̃a suasua naga p̃a vasa m̃ata ki nasum̃a ki tea suasua anigo, naga ega toko mau doko naraem̃a: nalakena nigo, Yehovah Sup̃e O, ku po noa e: go nasum̃a ki tea suasua anigo ega vei tea vasam̃atakiana ki navasam̃atakiana anigo, pa pa po du mau du.