Read Nguna Togoa Etafe North 2 SAMUEL 9 Bible Online

2 SAMUEL 9 - Nguna Togoa Etafe North bible

2 SAMUEL 9

¹Go David e naga, Te naata sikai ni tea ni nasum̃a ki Saul e ko doko, naga aga visei ki nia nadodomiana nalakena Yonathan, kite?

²Go tea suasua sikai ki tea ni nasum̃a ki Saul e doko, nagisana Siba, go eu soso e umai punusi David; go nawota e noa ki nia, e naga, Nigo ku pei Siba, kite? Go e naga, Nae e pei tea suasua anigo.

³Go nawota e naga, Tea sikai ki tea ni nasum̃a ki Saul e ko da doko mau, naga aga visei ki nia nadodomiana ki Sup̃e, kite? Go Siba e noa ki nawota, e naga, Yonathan natuna naanoai sikai e ko doko waina e pei pito.

⁴Go nawota e noa ki nia, e naga, Nae wai? Go Siba e noa ki nawota, e naga, P̃a leo, e doko nasum̃a ki Makir, natu ni Ammiel, doko Lo‐debar.

⁵Go nawota David e dip̃aki lua, po paraki nia umai m̃elu dua ki nasum̃a ki Makir, natu ni Ammiel, m̃elu dua ki Lo‐debar.

⁶Go Mefibosheth, natu ni Yonathan, natu ni Saul, e umai punusi David, po dowo dap̃olosiwo naraena, po kolo suai natano. Go David e naga, Mefibosheth. Go e naga, P̃a leo, tea suasua anigo!

⁷Go David e noa ki nia, e naga, P̃a ta mataku mau: nalakena lomau aga wo pisei ki‐go nadodomiana nalakena tamam̃a Yonathan, go aga wo moro pitua ki liliu paki‐go natano mamau ki tamam̃a Saul; go p̃a wo ganikani wede ni nakaniana aginau pitip̃atip̃a.

⁸Go e kolo suai natano, po naga, Tea suasua anigo e pei nasava, naga p̃a leo punusi au waina a dakiusi koria mate sikai?

⁹Go nawota e soso Siba, tea suasua ki Saul, umai punusi a, po noa ki nia, e naga, Sara navatuna waina e pei agi Saul go agi tea mamau puti ni nasum̃a aneana, a po dua natu ni nawota anigo asa.

¹⁰Go p̃a maneana p̃osiwosi natano aneana, nimu ma natum̃a naanoai maga, go tea suasua anigo maga; go p̃a vai nawana maga umai, naga natu ni nawota anigo ega veani navinaga kaniana: ma Mefibosheth, natu ni nawota anigo, ega wo ganikani wede ni nakaniana aginau pitip̃atip̃a. Go Siba e peani natuna naanoai rualima sikai tamate lima, go tea suasua rualima dua.

¹¹Go Siba e noa ki nawota, e naga, Dapala tea mamau puti waina nawota, nawota aginau, e dip̃aki tea suasua aneana asa, dapala nogoe tea suasua anigo ega wo mari a. Go Mefibosheth, nawota e noa, nae ega wo ganikani wede ni nakaniana aginau, dapala e pe vei nawota natuna naanoai sikai.

¹²Go Mefibosheth e peani natuna naanoai vusavusa sikai, nagisana Maika. Go tea suasua maga mamau puti waina eu doko nasum̃a ki Siba doko, eu pei tea suasua maga ki Mefibosheth.

¹³Go Mefibosheth e doko Yerusalem doko: nalakena e ganikani wede ni nakaniana ki nawota pitip̃atip̃a; go natuana dua ero sa.