Read Nguna Togoa Etafe North 1 NAWOTA MAGA 1 Bible Online

1 NAWOTA MAGA 1 - Nguna Togoa Etafe North bible

1 NAWOTA MAGA 1

¹Go nawota David e pei tea matua, tea ni natau laapa; go eu kulutigoro e ki nakulukulu maga, ma e da peani navivitinuana mau.

²Nalakena tea wanogoe tea suasua aneana maga eu noa ki nia, eu naga, Euga magi nawota aginau nawota laaga nagoroi atara sikai: go ega lawodu narae ni nawota, go ega vakale a; go ega one narum̃am̃a, naga nawota aginau ega vivitinu.

³Go eu laaga nagoroi atara leom̃atakiana sikai usuraki sara tokora ni Israel mamau, go eu pap̃ai Abishak nagoroi sikai ni Shunem, po piragi a umai punusi nawota.

⁴Go nagoroi atara wanogoe e pei rae wia liu; go e pakale nawota, po maneana suasua; ma nawota e da atae a mau.

⁵Go Adoniyah natu ni Hakkith e dum̃ana dape a pakilagi, e naga, Kinau aga wo pei nawota: go e dum̃ana maneana marisokisoki kariot maga go naatam̃oli maga ni horse, go naatam̃oli rualima lima waina euga sava kivea ki nia.

⁶Go tamana e da mari a e dogokitesa te ragi mau, e da noa, Ekasana ku mari dapalana? Go e pei naatam̃oli leom̃atakiana sikai; go p̃ilana e dape a edaku ki Absalom.

⁷Go e pusum̃aki paki Yoab natu ni Seruiah, go paki Abiathar tea viri: go ero dausi Adoniyah po silae a.

⁸Ma Sadok tea viri, go Benaiah natu ni Yehoiada, go profeta Nathan, go Shimei, go Rei, go naatam̃oli marimatua maga ki David, nara eu da puluti Adoniyah mau.

⁹Go Adoniyah e mari punue shiip maga go oks maga, go tea vaganiana m̃anopunopu maga vatu ni Soheleth, waina e doko m̃aladigi ki En‐rokel; go e pitautau taina maga mamau puti nawota natuna maga, go naatam̃oli laapa ni Yudah tea suasua maga ki nawota:

¹⁰Ma profeta Nathan, go Benaiah, go naatam̃oli marimatua maga, go taina Solomon, e da pitautau ara mau.

¹¹Go Nathan e pasa paki Bath‐sheba, Solomon p̃ilana, po naga, Nigo ku ko da dogo naga Adoniyah natu ni Hakkith e po do maramara, go nawota anigida David e da atae a mau, kite?

¹²Nalakena tea wanogoe p̃a suasua, a pavara ni ko asa, naga aga vusum̃aki paki‐go, naga p̃a mauti namauriana anigo, go namauriana ki natum̃a Solomon.

¹³P̃a vano po punusi nawota David, po noa ki nia naga, Nawota aginau, nawota O, nigo ku da pivisa paki tea suasua nagoroi anigo, doko do naga, Lomau natum̃a Solomon ega wo maramara edakugoro au, go nae ega wo dasake malo tasake aginau, kite? Go ekasana Adoniyah e po do maramara?

¹⁴Go p̃a leo, ragi waina p̃a wo do pasa paki nawota, kinau aga wo dausi ko paki ekopu po noasokisoki navasaana anigo maga.

¹⁵Go Bath‐sheba e paki ekopu ni em̃ago pa punusi nawota: go nawota e matua p̃arua; go Abishak nagoroi ni Shunem e magi nawota suasua.

¹⁶Go Bath‐sheba e kolo suai natano paki nawota. Go nawota e naga, Ku masau nasava?

¹⁷Go e noa ki nia, e naga, Nawota aginau, ku pivisa paki tea suasua nagoroi anigo pae nagisa ni Yehovah Sup̃e anigo, ku naga, Lomau natum̃a Solomon ega wo maramara edakugoro au, go nae ega wo dasake malo tasake aginau.

¹⁸Go ragi waia, p̃a leo, Adoniyah e po do maramara; go nigo, nawota aginau, nawota O, ku da atae a mau:

¹⁹Go e po mari punue oks maga go tea m̃anopunopu maga, go shiip maga laapa, go e po pitautau nawota natuna maga mamau puti, go Abiathar tea viri, go Yoab tea maraki taua ni navakalo: ma Solomon tea suasua anigo, nae e da pei tea vitautauana mau.

²⁰Go nawota aginau, nawota O, namata maga ni Israel mamau puti eu do leo paki‐go, naga p̃a noakisai ra sei waina ega wo dasake malo tasake ki nawota edaku ki nawota aginau.

²¹Ku pe ta noakisai ra asa mau, e pe wo pakilina ragi waina nawota aginau, nawota, ega wo maturu sikoti tamana maga, naga kinami ma natugu Solomon aro pe wo pei tea midoakiana naga aro pe vei tea mari dagele maga.

²²Go p̃a leo, ragi waina e ko do pasa paki nawota, profeta Nathan e umai paki ekopu.

²³Go eu noa ki nawota, eu naga, P̃a leo, profeta Nathan nea. Go ragi waina e umai paki m̃aladigi po lawodu narae ni nawota, e kolo suai natano paki nawota.

²⁴Go Nathan e naga, Nawota aginau, nawota O, e pei lomau kite, nigo ku naga, Adoniyah ega wo maramara edakugoro au, go nae ega wo dasake malo tasake aginau?

²⁵Nalakena e siwo pano naaleatia waia, po mari punue oks maga, go tea vaganiana m̃anopunopu maga, go shiip maga laapa, go e pitautau nawota natuna maga mamau puti, go tea maraki maga ni taua navakalo, go Abiathar tea viri; go p̃a leo, eu do ganikani po do munu naraena, po do naga, Sup̃e ega mauti nawota Adoniyah.

²⁶Ma kinau, kinau tea suasua anigo, go Sadok tea viri, go Benaiah natu ni Yehoiada, go tea suasua anigo Solomon, e da pitautau gami mau.

²⁷Naleo waia e pei tea mariana pae nawota aginau, nawota O, go ku da noakisai tea suasua anigo maga sei waina ega wo dasake malo tasake ki nawota aginau edakugoro e, kite?

²⁸Go nawota David e pasadara, po naga, Kuga maginau soso Bath‐sheba umai. Go e umai punusi nawota, po lawodu naraena.

²⁹Go nawota e pivisa, po naga, Yehovah e mauri waina e daulua naatagu m̃elu dua ki narogokitesaana laapa,

³⁰Dapala waina a pivisa paki‐go pae nagisa ni Yehovah, Sup̃e ki Israel, doko do naga, Natum̃a Solomon ega wo maramara edakugoro au, go nae ega wo dasake du oli au malo tasake aginau; dapala nogoe aga wo mari a naaleatia waia.

³¹Go Bath‐sheba e kolo suai natano paki nawota, po naga, Nawota aginau, nawota David, ega mauri pa pa ega tu du po du mau du.

³²Go nawota David e naga, P̃a maginau soso Sadok tea viri umai, go profeta Nathan, go Benaiah natu ni Yehoiada. Go eu rumai po lawodu narae ni nawota.

³³Go nawota e noa ki da, e naga, Kuga viragi tea suasua maga ki nawota animu kuga mamau pano, go kuga mari natugu Solomon ega sakesaake mule aginau, po piragi a paki Cihon pano:

³⁴Go tokora wanogoe Sadok tea viri go profeta Nathan eroga vuvurai ki nia ega vei nawota dap̃au Israel: go kuga sui paiga, po noa, Sup̃e ega mauti nawota Solomon.

³⁵Go kuga edakugoro e sake umai, go ega wo umai po dasake malo tasake aginau; nalakena nae ega wo pei nawota du oli au: go a lawo ki nia ega vei tea maraki dap̃au Israel go dap̃au Yudah.

³⁶Go Benaiah natu ni Yehoiada e pasadara nawota, po naga, Amen: Yehovah, Sup̃e ki nawota aginau, ega lawosoki navasaana ki nawota.

³⁷Dapala waina Yehovah e pea sikoti nawota aginau nawota, dapala nogoe ega moro sikoti Solomon, po mari malo tasake aneana ega warua liu malo tasake ki nawota aginau, nawota David.

³⁸Go Sadok tea viri, go profeta Nathan, go Benaiah natu ni Yehoiada, go tea ni Kaftor go Filistine maga eu siwo pano po mari Solomon e sakesaake mule ki nawota David, po piragi a paki Cihon pano.

³⁹Go Sadok tea viri e dape napati sikai ni naroro waina e doko Tap̃aup̃au, po puvurai ki Solomon asa. Go eu sui paiga; go narei mamau eu naga, Sup̃e ega mauti nawota Solomon.

⁴⁰Go narei mamau eu edakugoro e sake umai, po sui lokore maga, po laelaea ki nalaelaeaana warua, dapala waina natano ega mawora nalakena nasaruruana waina eu mari a.

⁴¹Go Adoniyah nara ma tea vitautauana maga waina eu do mamau ganikani, eu dogo e ragi waina nakaniana e nopu. Go ragi waina Yoab e dogo nadaleo ni paiga, e naga, Namarip̃araiana waia waina e doko natokoana e pei nasava?

⁴²Ragi waina e ko do pasa, p̃a leo, Yonathan natu ni Abiathar tea viri, e umai: go Adoniyah e noa ki nia, e naga, P̃a umai paki m̃aladigi; nalakena ku pei naatam̃oli leana sikai go ku dape narogorogoana wia umai.

⁴³Go Yonathan e pasadara po noa ki Adoniyah, e naga, Ee, ma nawota anigida nawota David e po mari Solomon e pei nawota:

⁴⁴Go nawota e dip̃aki lua Sadok tea viri, go profeta Nathan, go Benaiah natu ni Yehoiada, go tea ni Kaftor go Filistine maga eu mamau pano, go eu mari a e sakesaake mule ki nawota:

⁴⁵Go Sadok tea viri go profeta Nathan ero puvurai ki nia e pei nawota Cihon: go eu pae tokora wanogoe sake umai pilake nalaelaeaana, dapala waina natokoana e pari asa. Tea wanogoe e pei namarip̃araiana waina ku dogo e.

⁴⁶Go Solomon e po dasake malo tasake ni namarakiana.

⁴⁷Go tea suasua maga ki nawota eu rumai naga euga vasa dodo m̃ata ki nawota anigida nawota David, eu naga, Sup̃e anigo ega mari nagisa ni Solomon ega wia liu nagisam̃a, po mari malo tasake aneana ega warua liu malo tasake anigo. Go nawota e kolo paki nawewele.

⁴⁸Go nawota e pasa dapala nea, e naga, Yehovah, Sup̃e ki Israel, ega vei tea vasap̃iakiana, waina e dua gida naatam̃oli sikai waina ega tasake malo tasake aginau naaleatia waia, go namatagu ero punusi a.

⁴⁹Go tea vitautauana maga ki Adoniyah eu mataku, go eu duleana sara naatam̃oli sikasikai po pae napua adeada pano.

⁵⁰Go Adoniyah e mataku nalakena Solomon; go e duleana, po pano po puasoki napati maga ni wede ni naviriana.

⁵¹Go eu noa ki Solomon asa, eu naga, P̃a leo, Adoniyah e matau ki nawota Solomon: nalakena p̃a leo, e puasoki napati maga ni wede ni naviriana, doko do naga, Nawota Solomon ega vivisa paki nau naaleatia waia naga ega wo da atugi tea suasua aneana ki lova mau.

⁵²Go Solomon e naga, E pe tum̃ana pisei ki nia naga e pe vei naatam̃oli leana sikai, napati ni naloluna sikai e pe wo da dowo paki natano mau: ma te namariana sa e pe vei tea vap̃aiana asa, e pe wo mate.

⁵³Go nawota Solomon e pitip̃aki, go eu piragi lua e m̃elu dua ki wede ni naviriana siwo umai. Go e umai po kolo suai natano paki Solomon: go Solomon e noa ki nia, e naga, P̃a vaki nasum̃a anigo pano.