Read Nguna Togoa Etafe North 1 NAWOTA MAGA 10 Bible Online

1 NAWOTA MAGA 10 - Nguna Togoa Etafe North bible

1 NAWOTA MAGA 10

¹Go ragi waina nawota nagoroi ni Sheba e dogo narogorogoana nalo ni Solomon nalo ni nagisa ni Yehovah, e umai naga ega maridogo e ki navusuusuana kasua maga.

²Go e umai paki Yerusalem pilake natapetapeana warua, pilake kamel maga waina eu ova tea ni nap̃o wia, go kold e p̃arua liu, go vatu wia maga ni naulu laapa: go ragi waina e umai punusi Solomon, e noa ki nia tea mamau puti waina e doko nap̃op̃ona.

³Go Solomon e pasadara sara navusuusuana aneana maga mamau puti: te navatuna e da pei tea tasurukiana paki nawota waina e da noa ki nia asa mau.

⁴Go ragi waina nawota nagoroi ni Sheba e punusi namanumatuaana mamau puti ki Solomon, go nasum̃a waina e davagi a,

⁵Go navinaga ni wede ni nakaniana aneana, go natasakeana ki tasiga aneana maga, go naleoparati‐kiana ki tea suasua aneana maga, go tea suniana adeada maga, go tea tape lasa munu aneana maga, go navituaana tap̃arakiana waina e pitua ki nia nasum̃a ki Yehovah; naatana e da moro doko asa mau.

⁶Go e noa ki nawota, e naga, Narogorogoana waina a dogo e navanua aginau, nalo ni nawosiana anigo maga, go nalo ni namanumatuaana anigo, e pei narogorogoana lomau sikai.

⁷Ma a da saralomau navasaana maga wanogoe mau, pa pa a umai, go namatagu ero punusi a: go p̃a leo, e pei namagovai m̃oli waina e pei tea noaana paki nau: namanumatuaana go natoko‐dam̃ateana anigo ero p̃arua liu narogorogoana waina a dogo e.

⁸Naatam̃oli anigo maga eu maropa, tea suasua anigo maga waia waina eu lawodu naraem̃a pitip̃atip̃a, go waina eu dogo navasaana ni namanumatuaana anigo, eu maropa.

⁹Yehovah Sup̃e anigo waina e maro ako po lawo ki‐go malo tasake ni navei‐nawota‐ana ni Israel, ega vei tea vasap̃iakiana: nalakena Yehovah e dodomi Israel pa pa po du mau du, nalakena tea wanogoe e mari ko ku pei nawota, naga p̃a mari navasap̃otaeana go nalaeanaana.

¹⁰Go e dua nawota talenta ni kold p̃onotia sikai rualima takuna dua, go tea ni nap̃o wia e p̃arua liu, go vatu wia maga ni naulu laapa: tea ni nap̃o wia waina e p̃arua liu dakiusi tea waina nawota nagoroi ni Sheba e dua nawota Solomon asa, e da moro umai te ragi mau.

¹¹Go rarua maga ki Hairam, waina eu musagi kold pae Ofir umai, eu moro musagi nakau namakosi e p̃arua liu pae Ofir umai, go vatu wia maga ni naulu laapa.

¹²Go nawota e mari nakau namakosi maga eu pei tip̃a maga raki nasum̃a ki Yehovah, go raki nasum̃a ki nawota, go harp maga go salteri maga agi tea lega maga: nakau namakosi maga waina eu dakiusi ra, eu da moro doko, kite pei tea vunusiana mau pa pa paki naaleatia waia.

¹³Go nawota Solomon e dua nawota nagoroi ni Sheba sara namasauana aneana, sara navatuna waina e datago asa, pilake tea waina Solomon e dua e asa m̃elu navei‐nawota‐ana aneana. Go e liliu, po paki navanua aneana pano, nara ma tea suasua aneana maga eu mamau.

¹⁴Narowogiana ni kold waina eu dua Solomon asa natau sikai, e pei talenta p̃onotia latesa rualima takuna latesa tamate latesa,

¹⁵Pilake tea waina naatam̃oli sorisori maga eu dua e asa, go tea vakokoto maga waina eu peani nasum̃a sosori, go nawota maga ki narei maga ni Arabia, go tea maramara maga ni navanua.

¹⁶Go nawota Solomon e mari nakokoro p̃onotia dua ni kold waina e pei tea wokati‐p̃elewelea‐kiana: shekel ni kold p̃onotia latesa e pei nakokoro sikai maau.

¹⁷Go e mari kokororum̃a p̃onotia dolu ni kold waina e pei tea wokati‐p̃elewelea‐kiana; shekel ni kold p̃onotia dolu e pei kokororum̃a sikai maau: go nawota e doropusi ra ekopu ni nasum̃a waina e pei tea mariana ki nakau maga ni Lebanon.

¹⁸Go nawota e moro mari malo tasake ni navei‐nawota‐ana warua sikai ni napati ni elefant, po pulutigoro e ki kold wia liu.

¹⁹Napua sake paki malo tasake ni navei‐nawota‐ana wanogoe, e pei malo vavadu elatesa, go malo tasake ni navei‐nawota‐ana elagi kakana e pei tea wori‐tagele‐kiana natakuna: go naruna e doko taleva go taleva ni nadigi maga ni malo tasake kakana, go laion dua ero lawodu nap̃irikia ni naruna dua wanogoe.

²⁰Go laion rualima sikai tamate dua eu lawodu taleva go taleva ni malo vavadu latesa wanogoe: tea waina e dakiusi a e da pei tea mariana doko te namarakiana sikai mau.

²¹Go lasa munu maga ki nawota Solomon eu mamau puti pei tea ni kold, go lasa maga ni nasum̃a waina e pei tea mariana ki nakau maga ni Lebanon eu mamau puti pei tea ni kold wia liu: te sikai kakada e da pei tea ni silver mau; e da pei tea midoakiana naga e pei navatuna mau naaleatia maga ki Solomon.

²²Nalakena nawota e pei talakea ni taua ni rarua maga ni Tarshish waina eu doko natasi, eu pilake taua ni rarua maga ki Hairam: paka sikai sara natau ketolu rarua maga ni Tarshish eu rumai eu do musagi kold, go silver, napati ni elefant, go magki maga, go pikok maga umai.

²³Nalakena tea wanogoe nawota Solomon e pei tea warua liu nawota maga mamau puti ni maramana nalo ni nasogolapaana go nalo ni namanumatuaana.

²⁴Go tea ni maramana mamau eu rumai punusi Solomon, naga euga rogo namanumatuaana aneana, waina Sup̃e e lawo ki nia nap̃op̃ona.

²⁵Go eu dape navituaana adeada umai sara naata sikasikai, lasa maga ni silver, go lasa maga ni kold, go tea suniana maga, go p̃olaga, go tea ni nap̃o wia, horse maga, go mule maga, te seara sara natau sikasikai.

²⁶Go Solomon e piragi saisai ki kariot maga go naatam̃oli maga ni horse: go e pei talakea ni kariot manu sikai p̃onotia pati, go naatam̃oli maga ni horse tivilia sikai manu dua, waina e doropusi ra eu doko natokoana maga ni kariot maga, go Yerusalem tokora waina nawota e doko asa.

²⁷Go nawota e mari silver e dapala vatu maga Yerusalem, go e mari sidar maga eu dapala naita maga waina eu doko nap̃aloa, nalo ni nalaapa‐liu‐ana.

²⁸Go horse maga waina eu pei agi Solomon eu pae Ityipt umai; go tea vakokoto maga ki nawota eu pakotovi ra navata go navata, go navata sikai naulu sikai.

²⁹Go kariot sikai waina e pae Ityipt umai e pei shekel ni silver p̃onotia latesa, go horse sikai e pei p̃onotia sikai rualima takuna lima: go e dapala nogoe raki nawota maga ni naworawora ni Heth, go raki nawota maga ni Siria, eu piragi ra umai pae nam̃elearuda maga.